Sun ni hlawh in na thu ka ruat
Na phenthlam in i ciah zanvar
Na sih ta mi hri phang a phelh
Ka peh sal tinten a cat ringring
Zawnruah thiamnak pawl an hlo
Ka khawruah mi pawl an ziam
Na phentlam cun i deng kuai
A netnakah vutcam bang ka zam..
Cutin kha tin ka ruat theu
A thok in tuahsal ka tum nan
A hrampi pawl tiang na phawng
Vanruah lakih biazai lawng a tang !!
Thu pakhat lo ruah ding ka nei
Thil um cia mi le um rero mi
A cang rero mi thil a si ko nan
Thei na cing in kan palh mi a um.
Zing ni a suak ih zan lam cun
A liam sal miarmo theu
Na thinlung cun a thei fiang ko nan
Na ruahnak sungah cun
Ninu pi in a vel rero bang
Thei na cing palh lo dingah
Ralringten ruat ciamciam aw!!!
Ka ngai zan le tah zan pawl
A sau hlei hluan ce bang
Sun ni le thlapi ka ning
Ni thla siar ding ka huam lo
A phun rero tu ka hmur
A tlawk phurhphotu ka kaa
Hmm, an ni pawl khal an bang
Colh lak an duh nan ka siang lo
Ka kut le ke khal an kham
Ka lu hmuah a ri bulbi
Rai thawi tu ding bang an lam
Dawtnak sal tuartu pawl hrangah.
A puak kuai mi lungthin
A tekdarh mi ruahnak
A pial aw mi lamzin
Ti suar bang ka nun ram
Hmun hnget neilo ka lang
Ka pal zut mi lei thil
Ka cam riam mi leiba
Mawhnak i pektu le
Farah zawnzai i cantu
Ka nun hlun hmuah ka hlit.
Ka thlendah lonak ram nuam
Ka hmuhdah loh mi ram mawi
Manglam bang, tum lo ramah
Phen tlam le rau thawn ka leng
Ka theih dah lomi lengnu
Na mawinak le thatnak cun
Ka tum lo ramah i hruai lut
Ka hrang dawtnak tang lai maw?
A thuknak lamah i dir vivo
Na hnen ih ta dawtnak ka hawl
Tum lo ramah ka suak sal
A netnakah Mitthli lawng ka co.,..
