Unau Li

Unau 4 an si.
Upa bikcu kum 16 a si ih nunau a si. A hmin cu Senhri Par a si ih High School a kai rero lai. Tlawng inn ah tla an choir group ah a tel ve. Rinsan zetmi hlasak thiam a si. A nau kum 13 mi cu mipa a si. A hmin cu Hlawn Dawh Thang  a si ih tlawngah cathiam lam ih hminthang le theih hlawhzetmi a si. A nungcang khal zoh mawi in thinheng nei lo vek nauhak tleirawl te a si. Pathumnak cu kum 7 mi a si. A hmin cu Sokhlei Iang a si. A ni cu Malaysia ih suak a si. An nauta bik cu USA ih suak a si ih kum 4 mi a si. A hmin Lian Hrang a si ih a ni cu tlawng a kai hrih lo.  Nu le pa cu nitin ten hnatuan in an bill hrangah heh leh heh, thazang neihhmuah in nitin ten hna an tuan ringring.

Zarhte zing …..
Zinglam 4:00 am.
Tingti…/…..Tingti……/… tingti……
Trump….. alarm awn a phit lohli.
Trik… ihnak meisa a eng…. Eng tuk lo ding in dimbik a vang.
Thawm thang lo ding in inn sangpa bik cu a tho. A kam a thuah, a hmai a phiah.
A rak it lai pawl hrangah thawmthang um lo ding in dim theih tawp in a thawm a dim. A ke kal tiang a baibah theh.
A thawmnaw hruh ding a ret cia mi la in mi leng pindan ah a thuam a tuah.
Motor tawh a lak hlanah Mino pawl ih tuahmi calendar cu a von bih sal. A fapa in an tlawng inn ah laksawng a ngahmi a um ih “ ka lo fehpi ding” ti ih a tiammi kha a von mangsal. Tu zarhte ni cu qhaten a hminsin lai khal a von mang.
An fapa ihnak pindan lam cu veikhat a zohsal hnu ah motor tawh cu a lak ih a leng a suak.
Zinglam 5:30 am
Alarm a awn lala.
A hmaisa tu vek thotho in
Thawmthang a dim. Meisa dimbik a vang aw sal.
Naute kum 4 mi cu a itnak kiangah taksa hlum a um nawn lo ruangah puan dap in a her rero
Inn sangnu bik cun theih lole hmu lo vek in a um san. Cule an inn hmai ih motor ra din ding bawh in a hngak.

“Hello, Thangte, na pa ka si. Tu ni kha hna ka tuan ih na laksawng lak ka lo telpi thei lo ding.”
“Asile zo si in fehtu ding”
“…………”
“Maw, zo si in fehtu ding. Poi lo, mi ka phone  ding ih ka rak hawl ding”. Cule phone a tlak vukvi.

“Ka U, ka Nu teh?’
“Hna a tuan si ding, ka thawh ihsin ka hmu lo. An suncaw rawlbawm tla ka hmu hai lo”
“Ka U phone a ra. Rak kai aw.”
“Hello,”
“Hai, Boihte, Na nu ka si. Tu sun kha nazi 12 sung hna kan tuan ding ih tu zan nan tlawng ih choir concert kha tu zan kan sung in kan ra thei lo ding ih thaizan le sisal sehla tiah”
“……….”
“Ka tong na thei maw?”
“Aw, sinan, mizan le nan ra lo zo, tu zan nan pelh lala ding”
“Ka fanu, hnatuan a tul si, Hello… Hello… Hello…”
“…………”

Malay ihsuak kum 7 nu te in a u nu cu thu a sut.
“U,uu, na nu le papa cu hna an quan lala maw?”
“Aw, an quan lala”
“Na nu le papa, hmuh ding an um dah lo, hna lawnglawng an quan. Ka ngai tuk thlang nan…”

An tlangval tleirawlte cun
“Ka ti ve ciah, ka nu le pa hi innah tla thaten ka hmu dah hai lo. Hna lawnglawng an tuan. Tlawng ih kan tulmi hman in tuahsak dah lo. Mi an ngaihsak lo tuk.”
“Tu ni tla hi rualpi pawl cu nu le pa, unau pawl thawn sungkim ten an ra telpi ding ih zoh an mawi dan ding cu. Kei hmuah zo hman ih telpi um dah lo. Thlahtu hman ka nei lo ih ke in ka feh lala ding si khaw.

“Eiha, ka nu hi rawlsuan ding hmeh tla in tanta lo pi. Zianghmeh ka suang ding tih tla ka thei lo.”
“Rawl hmeh em sai cu in rak leihsak cia tha nan si.”

“Ka U, ziangmi thawmhnaw ka hruh ding, in rak zohsak hnik aw”
“Na bizu ah a um lo maw, kha tawkta kha na duhduh hruh men aw”
“Thawmhnaw fai tla a um nawn lo,”
“Ka thei ve lo. Na duhduh kha hruh ko aw”
“Thawmhnaw fai zianghman ka nei nawn lo pi, tu sun cu ka feh sal lo men ding”,
“Feh aw, na ninghman zak lawn”
“Ziangah ka ningzak ding, thlahtu tla ka nei lo. Thawmhnaw faitla ka nei lo.”
“Ni dang tla ke in na feh theu ko ual, na vah tamtam thawn”
“Ni dang ih ka vah le tu ni cu bang aw lo pi. Rualpi pawl cu nu le pa pawl thawn an ra din pi lala ding ih kei mah lawng tlawng ih va feh lala ding”
“Ka lo fehpi pei cu”
“Ka duh lamlam lo. Nang thawn feh ding hnak cun ka feh sal lo mai ding”
“Asile na thu”


Sunpadir 12:00

Suncolh can.
“Rual, hi nah rak to aw. Kei rawl ka sat zo. Ei ka man. Ziang hmeh na keng”
“Hmeh tuktak men. Hmehken ding khal ka nei lo e. Nu pa ih 12 hrs hna von quan cun innlam timlam awk man tla si thei lo e”
“Si tho tiaw, nang tla cu fate fala na nei zo ih zia zet pei cu”
“Tu lai nauhak cu e, na thei vek, sor tha teh an si sawm?”
“A fala un ii zo si lo maw?”
“An thinlung cu nauhak aa vek hawn si ah”
‘Rual, thudang kat duak in, nan kawhhran kha mipum ziangzat hrawng nan si ta kha”
“800 le 900 kiangkap hrawng kan si ding, naute suakpek pawl siar tel in”
“Si ngai, nan tha hnem zet pei cu, tiaw”
“Aw, tha hnem ve ko, dunglam ih nauqap thawm a tam sinsin si ko”
“Hitin thuruat theu mi ka nei ih, ka lo ruah ding ih nangteh ziangtin na ruat tih cu ka thei lo”
“Raw lei phah in kan rel tlang pei cu, in von ruah hnik hen”
“Nan kawhhran hi kan ni peng hrangah cun a bur ih tambik nan si. Kan lo zohbik mi tla nan si ih calai lamteh ziangtluk in hma nan lak timi hi ka ruat theu si”
“Ekhai, ka zum ban lo daih si maw in suh”
“Kan tang nasa ho khaw. Library tla kan din suak thei si. Magazin tla suah ding tivek thu ka thei”
“Library cu nan din zo ih a tha tuk. Mi ziangzat in saw library cu tlan. Upa pawl teh in cabu nan san dah maw?”
“Cumi cu thei ve hlah maw, pheh thu loten, kei cu ka lut dah lo. A luttu khal ka hmu cuca na he”
“Cunah hitin, kei mah palung in khua ka rak ruat ve theu. Cucu ziang a si tile, mino pakhat, lole upa zo tla si thei, mipakhat nan lak a tul in ka thei. Miphun thangso timi cu kan duh cio, a sinan sumpai cemding le kan qhukqhun lala. Cui nan lakmi pa in Library tla nitin a kil ding. Cumi a kil phah in ca a ngan ding. Mino hrangah, Sunday school hrangah, nubu hrangah, kawhhran hrangah, miphun hrangah tin kan hmang tangkai tengteng ding. CBA,NA pi tla in a rak lo thawm tla si thei ho khaw”
“Ka fiang phahphah, von rel peh hrih hnik aw”
“Cumi nan lak tak cun, cabu thatha tla a let thei ding, fulltime in calai hna nan tuanter ahcun kan miphun hlo ding ti ih kan phan le ka tih rero mi cu a dem sutsi ding tiah ka ruat. Cumi cu mission pakhat thotho a si fawn. Si lo maw?
“Asi ngai tak ti aw”
“Nan kawhhran in cabu tla nan suah ding ih kawhhran sung lawng nan zuar duhtawk lo hmanah CBA,NA sung le a lei duhtu hnenah nan zuar thei. Nan kawhhran sung vial hmanah uk 100 nan zuar thei hrimhrim. Kawhhran ih suahmi a si cun a thu dang ho khaw, himi nan tuahsuak thei cun missionary ropi tak nan tuahsuak a si ding.
“Tong a thaw si ding, nazi a awn zik lala ual”
“Si ngai tak, kan thuthaw bang. Nazi a kim ol tlat”


Zanlam kau
“Ka pa, tlawng in thlah man kem? Nazi 5 ah thlengkim thluh ding a si ih tu ka pok tul.”
“7 ah si lo maw nan thok ding kha”
“Sinan, tuanah kan thleng tul si.”
“Zanriah suan ding hmeh le um fawn loih bazar tla tul ding nan, na nu teh a ziangah saw hna a rak tuan ve ih aw. Mandatory an ti le si fawn loih inn lam tuangtim tul tla tansan ih hna a tuan cu tha lo nan”.
“In thlah theh le tlun lamah na bazar thei ding si”
“Si ngai, ti aw. Na nu tlun tiangtal  kan hngak ta pei cu, na nau le rakzohtu um tul si.”

An fapa cu pindan ihsin ra suak in a pa lam cu a pan lohli.
“Tu sun cu nuam lo tuk. Mi dang rualpi zaten nu le pa in an fehpi, hrekkhat tla cu sungkua in an ra tluh. Laksawng an lak zawng khalah nu le pa in an va lakpi thluh si. Kha vek ding cun ka feh nawn lo ding”, tiah hnoh nawn in a pa hnenah zual a ko.
A pa a mitsing. Thu a ruat. Theih fiangmi nei vek in daiten a cawl. A fapa ih tuar mi pawl a ruat sak. A lainat. A tangah rei lote a pom.
A nu cu hnatuannak ihsin rat lung in, inn sung a ra lut. Pa bik cun a rak hmuak lohli. Asinan hlim hmel pu pakhat hman an um lo. A tum hmeuhmeu theh.
“Inn teknu, mandatory a si lo ahcun overtime tuan nawn lo awla a tha ding.” tiah pabik cun nupi a rak sim lohli.
Khat lam le hnatuan bang thawn aw sang nawn in,
“Ka tuan lo ahcun ziangtin bill kan pek cawk ding. Sumpai lakluhnak dang na thei maw si. Ziangah cuti mi na rak ti ciamco.Hnatuan bang thawn”
“Fanau pawl ih tulsam mi tla kan ruat sak a tul phah ko si, tlawngkai nikhat ihsin ni nga tiang kan tuan cun pakhatkhat cu zarhte ni kan cawlh a tul.’
“Na duh le cawl aw. Kan inn man, motor man, sofa man, TV man, tivek pawl bill pek ding na neih cun tawk si ko.”
“Cuvek in tong hluihlo aw hlah. OK, tu ihsin cun kan duhmi zianghman kan lei nawn lo ding.”
“Kan duh mi kan lei loah ziangmi si kan lei nawn ding”.
“Kan sungkua hrang kan tul mi lawng kan lei tlang ding”.
Nupi cu a dai vukvi. A fanau pawl in duhdawtnak an tulzia, an tanghlum khawpkham loih an thlabar zia a von hmuh fiang.
Cule pabik ih tongmi  cu a theithiam sinsin.
“Ka rak palh ngai. Mi bang ka duhtuk ah le mi neih vek neih thluh ka duhtuk ruangah kan sungkua sung ih duhdawtnak kan rak ruat nawn lo. Ka palh”
“Kei tla ka palh ve,”
Cule an fanu ih Choir concert nak dingah an sungten an pok suak lohli….”

March 19, 2016 , BIG DAY! A ra suah keh dan !

Sung Thluai timi Pa Mang Tin Sawn le Nu Mang hluan tei fanu upa bik hi August 10, 2008 kum Malaysia ah ka tong hmaisabik a si. Sunday sun a si ih khawm tiak ah bus toin Sungai Wang kiangah kan tum. A naupa Thangte thawn an si. Ka zoh ringring ih a zam deuh cu a bang. A kut kaih a pelh rori. 
A hmaizarah ka tongsal. Asinan kan biak awk hrih lo. Khawm tiakah Ding Lian ( Bass tum thiam lole Tlirlung ) hnenah a phone number ka ngah. A ni khal cun a si rori tin in pek mi a si lo. A zum hmang ve thotho. Bus bawhnak ah Kap Lian Thang ( a tu Rev si zo ) le midang pahnih an si. A dungah ding in phone ka call. A kai veten ka phone cu ka zal sungah ka pai sal. Phone number a dik tih ka thei cun a tawk. In ko sal rero nan phone ka phit ruangah a lut lo. A phunzai nasa. Kap Lian Thang in, " Tlangval si tuk ding, zo si in sim ve awla?" tiah a capoh rero. Bus an lut ngah hnu ah a dang bus to in ka phone sal ih cumi ah ka sim sal. Cucu kan biak awk hmaisa bik ( phone sung in a si).  Salai Kap Lian Thang le Mai Tuan Nei Mawi tei neih awk tumah mo tian a tuan ih ka rak zoh nasa. Cumi an ra suak lamah fiangten ka zoh ih a bah zik rori. A lungthin a luar tuk si pei maw ka ti? ( tu hnu ah cun a si lo a ti rero ko hih ). Cumi ni ah mawi ka ti hleihluan cuangce.
Kum 2 sung phone in siseh, a leng in siseh ka rak biak ve hnohno. An inn ah tla ka leng. 2010 kum lawngah ka lo duh in ti ve fang. Rei ve pam nasa. In rak duh ve maimai lo tla si ding. A mitkem zawng um tla ka thiam si thei men. 
A hngilh thei lomi hrek khat pawl cu " nang hnak in ka ngo deuh, tin kan ban ka rak tah awk dah" "Zunghruk ka rak pek dah nan a duh lo (hlawk lo ve nasa)" "Nei awk ding in vei tampi ka rak dil nan Malaysia um laiah neih awk a duh lo hrimhrim." "Sizung a um ih zanvar in phone ka biak, cumi cu a lungkimbik mi lakah a tel" "Genting Highland an group in kan feh" "2011, July 11 ah USA ka feh ih 2012, july 11 ah USA an ra thleng ve"......
Cutin, cantampi ka hngak sal. A nau le tlawng theh tiang lawng siloin inn le lo tiang ready thepthep hnu ah Mipi hmai le Pathian hmaiah kutsitnak ropi, rualpi unau, kawhhranpi ra suak khawm in sunglawi zet in thitumnak kan tuah a si.

Mai Kimmy ( Ma Kim) le a album

Mai Kimmy ( Ma Kim) le a album

Mai Kimmy in Nelrawn Cirhti Pathian thangthatnak hla mawi in timtuahsak hi cu santhar mino pawl kan vantha kan ti ding maw, lole hlasak ding tha kan nei ti sehla ka luar tuk pei maw cu ka thei lo. Evan le Pastor tampi in hla thluk hrekkhat pawl hi nasa ten an sawi ciamco theu. Thimnakah Rock hla hi satan thatthatnak hla thluk a si tivek, rap hla cu tongtha lo umnak hla a si tivek ruahnak dik lo le ruahnak tha lo khi tampi an rak tongsuak ti cu kan thei. Ka sim duhmi sawn cu ziangvek hla thluk a si khalah Pathian hmin thangthatnak hla a si cun Pathian thangthatnak hla a si.

Nelrawn Cirhti album ih aphaw (cover ) zuk

1. A hla thulu pawl

2. In Runtu,

3. Zangfahnak thawnin

4. Ka lo thangthat

5. Ka ziangkim

6. Rinum

7. Bawipa nang na tha

8. Siamtu Pathian

9. Ka nunnak

10. In hruai aw

11. Ka diahnak lungpi

12. Hlan Uhsi

Hlapuhatu pawl kan zoh a sile, S. Kei Lian Uk, Rev. Mike Zung Ceu, Ma Hngak, Rev. San Cung Nung, Ngun Tawng Kham, Ta hning Uk, Zante, Aa Van, le amah Mai Kimmy ( Ma Kim) an si. Hla phuahtu kan zoh a sile santhar hla a sinak a lang zet.

A hmaisa bik ih “In runtu” timi hla cu ka play veten ka um hmun in ka rak khir ve thettho. Mino tampi thinlung a luahcih timi cu kham theih a si lo. Kan hla thluk khel a si nawn lo ih mino pawl duh a hlawh zet tiin ka hmu.  Rev Mike Zung Ceu ih phuah mi “Ka ziangkim” timi hla sungih “ Biathli te I sim, a lianngan bikmi dawtnak…… Nang cu ka lungduh kim sunglawi ka biazai” timi hlathu pawl kan zoh a sile thinlung sung a thukbiknak ihsin ra suakmi thu pawl khi an sinak a lang. Upa pawl duhdan theuvek hla thluk nemte le a si fawn ih ngai a hahdam in lung a lut duh nasa. A hla thu fehdan khalah ka lungkim. A hlathu pawl an danglam vek in a saktu Mai Kimmy khal hlasak thiam a sinak a AW khal in a daih ta hrimhrim ih ngai a hahdam. Hi mi album ka duh hleicenak cu hla thluk pawl khi santiluan duhmi hlir a sinak khi a si.

Tu cu a video lamah kan tlan hnik sal pei. Kan Chin Pathian thangthatnak hla album kan zoh a sile, an mit an sing ding ih, an ban tlunah an ret ding, an kut pakhattu kha an tang hnuai lole an pum zawnah an ret dingih khatlam tu cu an retmen ding, pangpar hmuanah lole inn parah an din ih khua an cuan lole pangpar an tham ding, lole an to ding. Tawkfang le mirang Bible thuanthu video cu siannak um loin an mahte thu in an rak rawi ding. Pathian hla a si pam, an lei thotho ding tih si awmtak, uluknak tel lo, ti luklak ti theih nawn in kan tuah ih kan zuar. Video camera a that lo ih sapbei ah edit kan thiam lo lala thawn a ra suak mi cu rau nawn, zoh har zetzet an si zul. Cumi pawl pahbal ih danglam zet, mumal zet le fimkhur zet ih video in tuahsak hi kei mah bulpak in ka lungawi ti lo cu sim ding ka nei lo. Ma Hngak ih phuahmi “Ka nunnak” timi na sakih na thuam hruh le a  hla tla a rem aw tuk ka ti. Hla khat ah angki pakhat lawng na hruh theumi tla na danglamnak a si. “Ka Daihnak lungpi” timi tla cu lamphah rero in ka rak lo zawm ve ciamco. Thinlung hahdam zetih rak lampi tla thindi a riam nasa. Mai Kimmy ih phuahmi “ In Hruai aw” timi na sak laiih angki hruh kha cu malte ka lo sawi ve duh. A sual cu ka lo ti thei lonan khami hla na sak lai le na lang fiangnak poh ahcun hla thu le a thluk hnak in na tangbor kha thinlung a luah deuh sawn in ka thei thlah. ( Mipa ka rak si ve pan he )

A netabik ih ka ngan duhmi cu Mai Kimmy in santhar hla irawm puaksuak in tuahsak timi hi a si. Kan mino kan neh ding cu santiluan ih mino nehtu hla kan neih ve vivo a tul. A hlan ih hla in rak phuahsaktu pawl tla an thiam lo a si lo, an mah le san cio ahcun an tha in an thiam, thazang khal kan rak ngah ve zet thotho. Hlanlai ah kan um ringring lo timi kan theih a sile kan thu le hla a tha vivo ding. Cucu hla phuahtu le a saktu ih tuanvo a si. Hla nem le tluangtlam lawng hi Pathian thangthatnak hla an si cuang lo.

Salai Ruatte ih hla ka zohsalnak

Tu lai mino hla phuah le sak thiam lakah Salai Ruatte a ra suak hi cu kan mino kan vantha kan ti ding maw? A zuamnak le a thiamnak parah upat ka pe ve duh a si.
Youtube ah a hla pawl a thlen hnu lawngah kan ni lam cun kan rak thei ve ngah fang. Kawlram lamah ziangtluk in a hla pawl an lar ding timi cu ka thei lo. Tu cu kei mah pulbak ih ruahnak le theih sunte ka rak lo hlawm ve ding.

A hmaisa bikah a hla thulu pawl kan zoh hnik ding.

Lungthin Mi khual
A kuai dingmi lungthin
I hngilh siang hlah
Ka mitthli
Lung phum
Ka lo duh lai
lungleng
Ruah zawi mero
Mitthep loin
In damter
Pinu le
Lairam hla pakhat( a thulu ka theih ciah lo ) pawl hi an si ih album hmin cu Mitthep loin tin a pek thu youtube ih thlami ihsin ka rak thei.

A hla thulu pawl hi kan zoh a sile lungkuai, lungleng le zuunngaih hla pawl an si tlangpi. A hla pawl hi an nem in lung mi a len zet. A hla thulu tete pawl khi thaten kan zoh a sile tongfang mawi danglam deuh a bet vivo in ka thei. Thimnakah " ka lo duh lai" timi tla khi ka lo duh timi in famkim zetnak " lai" timi a vunbet tikah a thu khi a thukter sin in ka thei.
Ruahzawi mero timi tla khi tongfang mawi danglam pakhat cu a si hrimhrim. hivek tongfang thar si lo nan hmandah lomi tongfang a si tikah a danglam cuang vek in ka thei. Lungthin mikhual timi thulu tla khi cu vek thotho a si. Co aw lomi fala le tlangval timi khi a fiang ter zet ruangah ka duh zetmi thulu le hla a si. Mikhual timi cu umta ding a si loih tlungsal ding, fehsal ding mi a si hrimhrim.
Salai Ruatte ih hla pawl ka ngai rero tikah a hla zaten a mai ir-awm suak hlir tih ka von hmu fiang betbet cu danglam ka ti sinsin. Himi pakhat ka zoh tikah sawmso le hlirsin dingah a phu ve hrimhrim tin ka hmu.
A hlathu pakhat ka duhzet mi lak ihsin " Lungthin mikhual" timi sung ihsin " na rim thawte a tanglai" ti vek, " Nang hngilh theinak thazang ka nei lo" ti le " thlencan a cu lawngah tuar a naa" tivek hlathu danglam, mawizet le thuk zet khi tampi kan hmu thei ding. Cu ruangah a hlathu pawl khi an thuk vualvo ti sehla a sual tam lo ding.
Cu ruangah tu san mino lak ihsin sawmso dingmi mino a tling a si timi ka ruatsuak. A hla pawl kan zoh a si le 2014 may thla ih thlah mi Ka lo duh lai timi hi 8,800 tha lawng in kan zoh lai. A dang pawl cu 3000 hnuai deuh hlir an si. ( tu ni tiang)
Ram sung media lam ihsin a thuhla suah le suhnak tla in neihsak thei uhla kei mah bulpak cun ka lungawi zet ding. Khui tawk khua a si ih a tu teh khui ah a um? hla dangteh a suah peh tum lai maw? tivek tete theih tla a hiar um zet.

Tucu, a danglam deuh in tong tlang sehla....
A video kan zoh a sile, aw khi a suak tha lo nasa. Camera quality tla a tha lo zet tih cu a fiang. Sum le pai harsatnak ruangah a si tin ka pom hnget zet nan hi hnak ih tha in kan suah vivo tum pei uh, thuanthu kan ngan cengceng ahcun hihnak ih thu tha le ngai nuam in kan khawm lawlaw pei tiah Salai Ruatte kha ka sim duh.

:Lungawi
Salai Mitthli

Salai Sun Ceu Night ih ka biazai siar mi

April 12, 2014
Lungdap lakih cirhti

Santhar hla mawi irh suaknak na qang awm
Zonzaih tuarnak phunpi hrang thuanthu nung
Tahqhim ka nuam lam khih hmuhtu si-ar
Na thawmthang in a hnin, rampi ram khat.

Na sunmang bang zo’n hmu ve thiam?
Na sulhnu zaihla sungmu ril a khawng
Hngilh ni um lo, nonawn lungthin a thar
Bangtu um hen maw, na qingqang hrikhat.

Na zaihla mawi cirh bang luang santiluan,
Na hruaisuakmi Chin santhar zaihla mawi
Tu sun, tu zan, tu tikcu le thaisun
Zo in a thlahthlam siang ding, Chin awn mawi.

Ai Thang Vel minun fu cangkhat khiak in
Santhar nonawn hnen ra leng hram aw
Vei khat te tal
Vei khat te tal
Na hla mawi pakhat te tal sak in,
“A mawi sinsin ding Lairawn” tih te tal.

Salai Mitthli

Duhdawtnak Khawmthim

8

Inn leng ihsin hngaktu Nute cu Hrete in a hmu veten a hnen lam pan in a feh cih ve. Ngai thiam dil ding in a feh nan Nute kiang a thlen cun a tong ding tak hmuahhmuah cu a hlo theh. Naute tong thei lo vek in a aa hiahia. Nute in “Ra aw, khi nah rualpi pawl in in hngak thluh zo” a ti ih a ban in a dirh. Hrete cu ziang khal tong man loin Nute ih hnuhnak lam cu a feh ve mei. Sabuti dawr ah cun Nute rualpi pawl cu to hmun an rem thepthep zo. An va thlen le veten tonak an rak lak ih an lak ahcun an pahnih in an to ve.

Nute in “Hrete, na ril rawng maw?” tin a sut.

“Aw, rawng ve ko” tiah bul nawn in a let nan NU lak ih um a si ruangah a ningzak timi kha Nute cun a thei thiam cih. Curuangah sabuti cu pakhan hnih in a cah ve ih rualpi pawl thawn an ei.

“Hrete, tu hi kan ei theh len kan zuk aw ding. Cui sin tivapi ah dai kan bual ding, in tel ve aw maw” tiah Thluaipi in a sawm.

“Ai.. kei ti leuh ka thiam sawm,” tin a sabuti cu sem phah in a sawn.

“Kan ni tla kan thiam lo pi, cun tiva pi ti ruangah na tih si kei, tai can lawng si” tiah Mawite cun tiva thuk lo thu cu a sim ve.

“Nan ni teh, cu mi sim rero, in thlun ding ruangah sabuti hman a ei rero zo hi” tin Nute in Hrete mitmei phah in a ti ih Hrete cu um ngaihnak thei loin a lu a sut bupbo. Cule veten an zaten “YEII…..” an ti ih an za an beng.

Sabuti ei theh veten Nute in an rawl man cu a pek ih tivapi lam pan cun an pok vualvo. Nute in Hrete a phur ih mi dang rualpi pawl khal mah le phur ciar phur in an feh. Tlawng pangpar hmuan sungah ah zuk aw ding in an va feh nan zuktu pa a um lo ruangah a mah hawl in an her vutvo. Zuktu pa an hmuh in an ko ih pangpar hmuan sungah cun an rualpi zaten an zuk aw.

Tiva an thlen cu Hrete ih ruah vek si loin tai can ngaingai hi a si ih an zaten daiah cun a ceng ciamco hnuah Hrete cu tiva khatlam lungpi parah a to ngerngi. Culai fangah Nute in a dung lam ihsin a tul ih Hrete cu tiva sungah cun a tla. A ke le lungpi a khawng aw ih tai canah cun a hak buanbo. Cumi cu rualpi pawl in capoh ah an ruat ih an rak hnisan. Rei nawn dai sung ih a pil hnu ahcun Nute hni rero lai cu a tawp vukvi ih Hrete kiangah cun a dawp ve. Rualpi dang pawl khal an ra ih Hrete cu an ra hruai. A khuk a pem ih a ngal khal a khawng aw. A khuk ishin cun thi a suak ih Nute in a puante thawn a tawn sak.

Nute cun thiam aw lo zet in ngai thiam a dil rero laiah, “Kei mai mawh sawn si, dai leu thiam lo rori ka lo thlun pan he” tin a mah le mah mawh thluk in a phun aw rero. Rualpi dang khal cun Nute cu an kawk rero ve. Hrete in “Nute mawh si lo, kei mai mawh ka ti cu” tin ring nawn in a au ih an zaten an dai khepkhep. Cule Thluipi cu rin lo ah a hni ciamco. Mangbang in an zaten Thluaipi cu an zoh thluh. Thluaipi cu a hnihnakah a pum hmuah a na theh ih a pum dawm rero phah in “Nute le Hrete hi an mak tuk aw, mawh an phurh siang aw lo veve” tin a tong ih Hrete lo hmauh cu an hni thluh.

An hni rero laiah Hrete cu vei le khat ah vuk tin a ding ih a tlan turto. Hrambur lam pan in a tlan ruangah Nute le a rualpi pawl cu an lungphang ih a dawi cih. Hrete cun “in thlun hlah uh” tin a au vivo. Nute le a rualpi pawl cu an thla a phang ih an dawi vivo. Hrete khal cu a tlan vivo. Tawkfang a tlan hnu in a ding ih Nute le a rualpi pawl khal an ra thleng ve cih. “Ziangah ka dung in thlun” tin tawiten a sut puppi.

“Kan theih sawm, na ningzak tuk na tlan hlo dingah kan ruat ih cu nah” tin Thluaipi thotho cun a let. “Silo, ka zun a phah tuk ih zun thawh ding in ka feh mi si, nan ni in le in dawi si ka tlan vivo pan teh” a tlannak san a sim cu “SHIIIII” an ti ih an mahten pumna in ko an hni sal. Hrete khal cu hrambur lakah a relh ih tuar tha loih pahtu cu nuam nai ten a thlah hrethro.

Duhdawtnak khawthim part 7 

Luai Dum hnenah cun bayakyaw timi cu sut fiang ding in zan riah khawh veten a thlan hlo. A ka in  bayakyaw … bayakyaw ti phah in a phun phurhpho. Luai Dum cu zaute ah to in a rak to liarliar. Hrete a hmuh veten nonak a rak kian ih a kiangah a to ter. Hrete khal cu a thawsa khal reh man loin “Luai, bayakyaw an timi hi ziang si?” tiin bul nawn in a sut.

Letpanchuang luhnak catar 

Kan seherh dingmi Letpanchuang khua

Letpanchuang khua hi Tahan khawpi ihsin North lam ih um a si. Tahan thawn peng 9 hrawng ih hla aw a si. Letpanchuang khua hi khaw dang pa nga thawn peh aw mi khawte pi khal a si. Letpanchuang khua lawngah inn 4,000  hrawng a um ih suakthuan tlawng (high school ) pakhat, hramthok tlawng pahnih a um. Bazar tum ngaingai a um ih leknak bualrawn 3 a um. Sii zung khal a um. Chin hnam phunkim tlangleng khawmnak a si ih khaw sung cu group 5 in an qhen.

zarhpi ni dairy 5

Zarhpi ni Dairy 5

Inn ihsin Yangon ka suk pek ahcun rinsan awknak le sunmang pawl thawn ka nuam awk zet. Hmun dah lole ton dah lomi hlir ka hmuh tikah khua le ram cuan in ka aa hiahia. Khawpi pakhat hnu pakhat kan hlan vivo. Motor le tlangleng khawp neknek ka to hnu cun sam thur bialbial in Yangon khawpi cu ka thleng ve rulri thei. Phone number ka thei mi umsun te cu zinkap phone dawr ihsin ka ko. Ka phone hman man ka pek lawngah ka tangka zal sungah sum le pai a mal timi ka thei awk fang. Cumi ihsin cun ka tha a nau sualso thok si ko.

Chin Biazai siar a vei khatnak, Indianapolis

Duhmi na siar ding

 Ziang tikcu caanah kan ton aw sal ding tih theih lo “ Duh Mi” ra kir sal aw. Nang ngai ruangah maw khuazan sing thiam loin ka um. Kan tonawk sal thei ding ni cu kut zung khiak ih siar rero cingin caan timi khal a hngaktu hrangah cun nuam nai ten a her ti’n mawh nei lo ka puh mawh. Thlanglam in a suak ih saklam ah a liam sal qheu mi ninu cu thin bang zetih siar in, Tui hnu veiziat a suak in a lutsal hnu lawngah nang le kei kan tongawk sal thei ding tih ruat in ka hngak hlap qheu.

Zarhpi Dairy 3

Ka ih khun lu ih ka tar mi nazi cu 8:00 am awn hrih hram hlahseh timi zumnak thawn puan sung ihsin ka bih dekdo. Ka ruahban loin nazi 9:30 am a rak awn ziar zo. Ka puan sinmi cu ihkhun taw ah ka sirh ih dai bualnak lam pan cun ka tlan turto. Daibual sangka ka nam zawngah a sung ihsin “Ka um lai, ka theh zitte “ timi ka U ih aw ka thei ruangah sangka kiangah ka va ding sal. Tlunvan ihsin vur tla (snow) cu mi thep loin ka bih ngernger. Nauhak tho hmu nei bang in ka to cuahco.

A rak lardah mi tongkam hrekkhat pawl

Tu tum ka ngan tumbikmi cu Tahan khawpi le a kiangkap hrawng ih tongkam rak hman lar zetzet mi pawl an si. Thei dah lo kan um bang in rak hmang uar zetzet tla kan si zul ding ka zum. Mirang pawl in SLANG an timi phun a si. Can tawkfang cu mipi in hman a si zet nan kum tluansuak ih hman cu an rak si lo. Tampi a um ding nan ka theih ban cin tawkte in tarlang kan tum hnik ke aw..

Ka sunmang neih sun

      1

Kan khua le kan inn cu kum 5 lenglo ka suahsan hnu ah ka pai inn nuamte pan in ka tlung sal. Ka khual tlawngnak le ka tuah ka tuannak ah hlawhtlingnak ngaingai ka nei lo nan hminsia le thangsia cun ka um ve hrih lo. Kum 5 sung khua ka suahsan ih ka ra kir sal cu nau le pawl an tlangval in an rak fala zerzer zo. Ka khuhhri rual pawl cu nupi fanau thawn hnawk celcel in an um fekfek thluh. Asinan ka thinhna a ngam deuh mi cu ka rualtha zet Sumte in nupi a rak nei hrih lo mi si. A ni tiangtiang in nupi in neihsan sehla cu ka ra tlung ngam nawn lo ding ti tiang in ka ruat. Khawte lam ti fam cu an fala tlangval zik fang maw ti cun Christmas le kum thar boruak khawdaiah nupi pasal an nei cece men.

Duhdawtnak khawthim Part 6

                                        Duhdawtnak khawthim Part 6

January   7 ni……      
Tlawngta pawl cu air- con bus sungah an khat tiam tiam. Tawngphila zin tek in Hre te khal a rak bawh ve. Tlawng fehnak bus a hmuh ve ten man hlap zet in a kai. Tonak a co lo ih phar kai in a ding teng teng. Air- con bus an to nan rei an to hlan ah angki tang cu a ciar thlep thlep. Air-con a dai tuk ih an  ciar cu asi lo. An tam tuk ih mit thep fuk fo nak ding umlo in an khat. A to dah lo pawl a si ngel cel ih a pum sung in a dangah  ziang si maw hnawh  so tu a nei . A lung ci a mitt um. A mit men a ti ria ria thluh. A ding khal ding tha thei nawn  lo in mi dang a hngoh san. Kawl, nu thau deuh lam a si ih a rak kawk bet. Thih tan in phar cu a vawk ih tlawng inn cu a thleng thei.

Mino le tumtahnak

Kum 2000 ihsin Chinmi pawl hi ramleng suah kan khih hmuh aw ti sehla India, Mizo ram teh ramleng a si lo maw si tin thusut thu cu kan um siang ding ka zum lo. Ziangah tile Mizo ram ihsin kan khua kan ram tlung ding cun ni hnih khatah kan thleng thei hleiah phunpi unau kan sinak in ramdang, ramleng suahah kan ruat aw tuk lo. Ramleng thu thawn cun duhtawk hrih ke!