Duhdawtnak khawthim part 5

5

Hmin pek nak lamah cun an pali in an her vut vo. Sun hnu hrawng cun an theh fel  thei. Tlung lam pan in bike ret nak lam ah zo khal tong lo in an feh . A hmun an thlen in ,  “pakhat khat  kan ei pei cu nan ril a rawng lo maw?” tiah a sut.
 “Rawng ----zik,” tiah a u tu in a tong lai ah,
“ei kan huam tuk lo e, nan mah te va ei ko uh.Kan nih kan tlung ding” tiah Nute in a ti ih a u kut ta bike tawh cu a pek.
“Si lo e, pakhat khat kan ei pei cu a rei lo ding pi, ra uh canteen ah kan feh pei,” tiah a sawm tho tho.
Caanteen timi thei lo tlangval pa cu ziang khal a tong ngam lo. Caanteen timi cu ziangvek saw si ke,hmun nuam maw, man lo ih duh duh ei thei nak saw si ding, ziangah thil ei dingih a sawm rero; tiah a ruat buai nasa.  A mithmai ah cun a hni nan a sungril cun a khua ruah a har nguaingo. Ziangah laitlanglam ah ka rak suak titla a ruat ih a thinheng tum lamlam. A lu cu a khawih hruthro ih, “si lawn, kan feh pei cu!”; tiah a nauhak  tu cu a zoh phah in a tong suak phutphi.
Cu lawm mam ih an sawm ruangah el nawn lo in canteen lamah an pali cun an pok.
A hmun an thlengih  mai duh mimi an cah.  Pakhat lawng in ziang ka cah ding ti a thei loih a um  men. Hnatuan tu in, “U pa, nang teh?”
“Umm,ziang hman” tih lawng a sawn. An pathum in tlangvalpa cu, an zoh thluh.
“Ziang hman,” ti lawng  cu a nawlh sal ih tisa sen lawng a in,
“Nan thei aw cia maw si?” Luai Dum sup aw thei loin a suh phut phi.
“Thei aw cia lo,  nan….. veithum kan tonawk   nak.  A vei thum thum in kan bah cu a si hi, phawt in; a tiih laitlangpa cu mit mei phah in a u tu in Luai te cu a sim. Thei thiam har tuk in a hni, a haa lang fang fang Luai te cun sut fiang nawn lo in hla ral ih ra mi pakhat cu a zoh. A nai deuh deuh ih a hmel a hmuh fiang ve ten, “Hi---- Dam tha maw, hi nah ra to ve aw!   tiah a au  tleu tleu. A si nan an zawngah to lo in a kiang  hla deuh ah a to.  “Rualpi hngah mi ka nei ih cu nah ho khaw,”tiah a to rem zawngah cun a sawn.
A thil cah tak pawl a ra thleng, Luai te Orange a in. Nute in noodle kiau, cun a u nu mit bial pungpiin mami a hrawp hruihhro.  An thil ei tak zoh ih mang bang cu  laitlangpa! Nute  hman mi fung hreu pahnih  cu a thup ten a bih rero. Nute in ,a mah zoh ah a neih aw ih cang khal cang ngam lo’n kun nger nger in a ei. Tlawng kai ngai a si hrih lo ih minung khal an mal. Caanteen ih toah cun an mah pali le mi pakhat saklam dawr ah bike pali nga hrawng a tlar aw.  Tlawng ca zirh tu hrek khat pawl lawng an to.
Lai tlang  tlangval le topi tu pawl khal zo hman tong loin an mah thil ei, ruah nak thawn an ei hlurhhlo. Lai tlang pa a tisa in tak a cemih ketli a lak le Nute a thil ei tak thaktuk ih tisa thlet tum ketli ban cu ketli parah an kut an thuam aw cut ci. Cule zam rang ten an la tlangih, “nang la hmai aw” tiah an tun aw. An la lo veve tikah an ban sal ih mi tu vek tho tho in an kut an thuah aw lala.
Nute cu , a ning zak deuh in a hni. Lai tlang pa in  “ keimah  ka lo thlet sak ding” a ti ih ketli cu a kai, a thle
A cem zik thlang lam a si ih a thle na deuh kha a sin a phawng. Nute pakan parah “Kiling…….Kalang……ciirr….,” tiin a sin le pakan khawng aw .
“Hre te , nang theu le…..!” tiin hmai sawng mit hmai a tong man.  
“Poi lo e, poi lo…..! tu  cu ziang kan khawng aw lo ih zia te um lai,” tiah Nute in Hre te timi laitlangpa cu zoh phah in a capoh  bet.
Hre te ning zak tuk in a hmai hmuah a vam  theh tum. Kuak cawng sehla cu a ngah ding  ti tiangin a hnar tla cu a ling in a ling. A sam ro rumri tla a kang phutphi  ding tih a phan um zet.
Cu hnu lawngah , “Aw , nah min cu Hre te maw?”tiah a nunau nu tu in a sut bet.
“Aw…..si e…..,” A aw a suak fang fang.
“Kei hi Nute , a nih hi ka u a si ih U Cer a si.”tiah Hre te ih ning zak khuh tum in an hmin pawl a sim.

“Na ke na teh a zia deuh tlang maw?”tin a sut sal.

“Aw, zia tuk zo…”
“Mi tu ka lo suh ah vei thum kan ton awknak nan ti fawn,tuah hming pawl nan sim aw lai fang si, hei--- nan lak ih um cu ka aa thluh tum.”

Hrete le Nute cu an zoh aw ih an hni hruthri. Certe cu leng U lanta ding tih theih thiam um nawn in a to hmek hmek. Luai Dum khal cu tlun lohli a duh ruangah Hrete a sawm.
 “Hre te,”
 “Ziang……?”
“Kan tlung men pei cu”
“Si ko……..,” A ti ih a tangkaa a suah. Nute in, Hre te ,kan mah kan pek ding, nang ziang khal  ei lo in na pek le cu ni dangle in biak duh nawn lo pang ding,” tiah biang sum lang ko  hni phah in a capoh.  
A biang sum te cu tu lawngah a hmu lai.
“Si lo e, rualpi le ka nei ve fawn lo, rualpi kaihawk nakah tui tum cu keimah in man ka pe ding,”tiah a ti. Cert e cun ziang siar  lo in a um men . Nute cu a biang sum lang ko a hni sal. “Hre te, tui tum cu na tong dik na sa. Zo maw dan in phiang kum ah vei khat cu na tong dik ve si,” tiah a capoh ih Nute in, tui ni lawng maw, ni dang cu kan mah in kan lo dar ding ti nak si maw,” tiah a bet ih an pali in an hni thluh sal.
“Si ngai, Nute le Hre te cu kum khat nak ding veve nan siih a rem cang tak ual,”tiah a ti. Zo khal  an tong lo . A mah in a peh sal.
”Kan nih cu zan lam kai ding kan si ih Hre te hi ka hruai thei lo ding, rualpi thar a nei ih ka hnangam deuh”, tiah a mah lawng cu a tong cuak co.
“Na rel hlan ih sin , rualpi lawng silo rualpi lan tiang ka tum si maw,” tiah Hre te in a thinlung ten a tong rero. Cer  te cu zokhal  zoh loin  a lenglam a hawi . An tong cu thei lo vek in a um san men . Luai te in , an kiang cabuai ih to rualpi cu,
“Kan lo tlun san hrih ding, sun tha awla,” tiah a biak ta.
“Awle----,” tiin tawi ten a rak sawn.
An zaten an pok ih Tahan lamah nuam nai ten an suk vual vo.