Duhdawtnak khawthim part 4

                                                                         4
Lai tlang tlangval cu hni fen a thiam lem lo nan a feng tho tho. Angki rang ban sau a hruh ih angki zal ah pen  a pai. Style ti aw nawn in thlalang cu a zoh aw zawk rero. Luai Dum ra thlen ding cu hngak hlaptuk ah zawngte banhla uam vek , inn leng lam cu a zoh phah phah. Inn hmai ah buh---but---bun—leh? Bike thawm a theih ve ten a va suak ih a rualpi  Luai Dum a rak si ngai ngai.
“Na man zo maw?”
“Aw…..ready…….”
“Asile kan pok men pei cu.”
“Si mai…..”
A hni thawn bike par a to cu a rem ve mei. A kai ih a to ve mei. Phun sang tlawng an thlen hlan ah a sam pawl an  hnawk thluh man. Tlawng inn pi an thlen ve ten ,a sam siti hal cu a cil mal ten a kut ah a phui ih a sam a cul sal.Bike thlalang ah a zoh aw. Lai tlang lam ih nitin lo hnatuan le nisa tuar a si ih a taksa  le sam cu zang fak um za in a ro ve. Hmin pek nak lam an feh hlan ah an vak kual ta. Luai Dum in,
“Rual,-------Kuam ei na duh maw? Kan lei pei cu,”tiah a sawm.
“Ka ei duh lo, na duh le cu kan feh pei cu;” tiah a thlun ve.
A hmun an thlen in kuam cu an lei , an fun ter bet. An feh sal zik zawngah ,a pitt….pittt…..pitttt……Aih…..Dup…..Dop…..Dung….Bike pakhat le thirleng to putar an pah aw. Bom puak vek in an pah awk nak hmun ihsin lei khu a hlawm hlawm in van lamah a so tual to.
Tlangvalpa le Luai te khal bike par ihsin an tum sal. Laitlang  tlangval pa a man hlap tuk ih a hni le bike ih thir te thawn an awk. A tlan zawng  teah….tit….tuar … ti ah a awn a thei nan a zoh man lo. A  tlan tho tho. Dawr ih um pawl in an mit hup in an hnih san .
An pah awk nak an thleng cu zo le zo an pah aw tih tla an thei thei lohli lo.An hmai cu a bal theh. Bike to tu tei cu an mah ten an tho ih an cul aw fai, lei khu pawl an thin aw theh cu ….“Ai…., nan mah unau maw si, ziang tin saw---ruai ri;”tiah Luai te in a kai tho.
“Nan khawng aw naa maw?”
“Na lo ve , ziang kan khawng aw ngah lo pi; tiah an ning zak hmai sen hiam hiam thawn an sawn.
 Lai tlang tlangval in thir leng to tu putar a kai tho . Kawl tong le thiam tuk si lo , biak dan ding thei lo in, “A hnih san men “. A hnih san kha kawl putar ih thin a ti heng ih kawl tong in a hro ciam co. A diriam in thir leng cu a tho sal ih a tlan san. Ziang in hro ti thei ve si lo cu a liam tiang a zoh. A thinlung ten “thirleng to thiam khal mi nung pah men lo in,bike tiang tiang an pah ve tho  a si hi, kei thiam lo in mi nung ka pah cu zia te um lai ,”tiah a ruat ih a mah ten a hni.
A rual pa Luai Dum lam a hoi kir sal . A hmuh mi minung ruangah a mit men hmuah a kau thluh .A ka ang hia hia in a zoh . A thinlung ten , “kei mai thirleng to thiam lo ruangah maw ka lo pah ,nan mah pah ding hrim hrim in nan um saw” , tiah a ruat man.
“Ra aw, kan feh ding, a mah a um ruangah sihi; mi kan pah. A hmel ka hmu thei loh, ka ti rero lai ah  kan hmu lala. Ka deh that ngai ngai ding . Ra aw kan feh ding” tiah Luai te ih Bike tun din sal tak cu lawng in an feh tum zawngah,
“Ziang saw nan rel, ka thei thiam lo,”tiah tlangval pa a zoh thul, unau hnih tei a zoh thul.A tong a kai ban lo.A mah lawng aa hia hia in a um.
A nau hak tu in,” Hey --- na aa maw si , hni phel feng in tlawng inn ah ziang na tuah, na ning zak lo maw?” tiah a thin heng ning zah thawn ral rin nak a pek ta.
Luai te in tlangval pai ‘hni cu a zoh ih pum naa le mitthli for thluah thlo in a hni. Bike le thir leng pah awk ngah pang cu hngilh ta hrat in laitlang tlangvalpa cu an zaten an hnih san. A nih khal a zoh aw sal ih tu lawngah a thei  aw. A ning zak tuk ah a lu ar bawm hluan in cokaa a tia. A man hlap tukih  bike par ihsin a tum zawngih awn a theih kha a hna thlam in a mang sal. Ziang rel loin a hni cu a her ih thaten a feng sal. Hni duh lo ih tha ten a um cun a tlangval dang vek si lo a hmel le ruang am cun nauta sawn ih mitah a tling tuk. A sam ro phualphi tih lo cu tlangval mawi a si tih cu a thinlung  sungah a hmin sin. A hmel fang pawl cu zoh fiang poh le a mawi deuhdeuh vek in a thei.
An feh ding cu Luai te in a kham. “Hmin pe dingin si lo maw nan rat. Kan feh thlang pei cu, kan nih tla hmin pe ding si kan si, ra uh kan feh ding” a tiih el lo in an pali in an pok.


Peh lai ding............

Biazai pawl (4)

Thin diriamnak tlang cu khui lamah
Saklamah maw tlanglam ka pan ding
I khih hmuhtu dingteh zo le pawl si?
Rawl le ti thawl thawn maw kan pok ding.

Hnangam daihnak ram pawl hi teh
Ni tlaknak maw ni suahnak lamah
Ka thei fiang lomi ram pawl ka lan
Hotu ka thun, dunglam kutsit in.

An palhnak le mawhnak a phah aw
Cumi thei cing in ka za ka bawng
A ne nawi ka khawm, hmin siatnak thawn
Ka riahsia lo, ka tuah zo mi parah

A thupi bikmi Pathian ka hngilh 
A phenthlam lawng ruat in hmai ka nor
A takram ka tlen cun ka hmu fiang
Ka buainak pawl zaten ka fiang vuarvi.

Ka um harphenah biazai ka ngan
A siar paihtu pakhat pahnih hrang
That hnem ding ka dutzet fawn
Ngan ding cuca le ka thei sal lo..

Ngainak, duhnak maw ka ngan ding
Tuarnak maw, lunglennak sawn?
Ai.. lungawinak bia ka ngan ding
Asinan ka lunghlim fawn lo..

'Ziang mi thu hla si ka ngan ding '
AW.. ka ngan ding ka mangsal
Cu tin ka ruah rero lai fang
Hi.. biazai pakhat a si zo ual !!!

Kha.. ka lo ngainak thu pawl
A sangsangten ka tar lang
Siar awla, hngilh aw hlah

Ka covo um sun le rothil sui
Cu hnak ih ropi le hlu ka nei
Van sang ihsin a tla mi ka dong !!

Ka lo ngainak hi a luar sinsin
'Na' ka ti bik mi le tuar har mi cu
Ka ngainak le duhnak na thei loh hi!!

Na feh hlan ahcun ka siang lo

Siang lo cingten in tan thotho
Khawhar lungleng ka um hnu
Sepi ruahtuar bang ka tuar cuahco

Ni khat hnu nikhat ka tuar suak
Tuarnak ni a tla thei hrih lo
Na zuunkung tuarah ka lungpuak
Ka nun ram le zalam tiang a hlo

Thinlung pacang in ka ruatsal
Um dan le tlan dan ka thiam zo
Nang lo khal in ka ngam thei sal
Na thangsung tlak ka tum nawn lo..

Leng dang ngai loin kan leng
Kan nuam awk, cam khat te
Lungthin hlim in a kek mauimo
Nang thawn kan um tlang cun

Tanghlum sungah pom aw in
Thu tinkim kan ruah awk
Can le tikcu khal kan thei lo
Nuamnak innpi sungah kan hlim

Timar khuang in lungthin a fim
Ka lu kham le puan ka rem
Ka kiang ka dap, lengnu pom tumin
Aih... ka zan mang men maw rak si !!!!

Mitthli Biazai Group menber pawl Debatenak maksak

Chairman in tuansaktu Pu DL Senling a si ih a mai khai khawmnak in cancem ter a si. Thu hmaihruai pawl cu tar lang loin Debate thoknak ihsin tar lang a si. A siartu nan zaten zir ding le cawng ding mi thutha pawl nan sar ngah ding ruahsannak thawn hi Debatenak hi tar lang a si. CT khalah tar lang zo a si. In ra lengtu nan zaten hnenah lungawi thu lo sim phah in .....

Salai Mitthli Pu Chairman, a hmaisa bikah ka ding lala ding, pa bik hnatuan tlung, hmuaktu um lo can ah khin, Pa hrangah ziang thluk in thin a na ding. Lunghlim ten rak hmuaktu inn sangnu cun pabik hrangah thazang thar a suak sal. Cu tikah sungkua hlimnak le nuamnak timi a thok cih. Cun, inn sungsang felfaiten a rak tuah tianghlim cun pa hrangah ziangkim hi a nuam thluh. Nu a fel le pa a nuam. Pa thin a num le inn sungsang a nuam vivo.

Salai DL Senling  innsungsang a nuam theinak ding cun NU bik a si ko ee... Hnatuannak ihsin bang nawn in inn ah ra tlung ih mi rak hmuak vervo tu um lo le innsung baal le t'awp zet hmuh cun thin ziangtin a nuam thei ding tin a si... Mai pawl in ziangtin ruat hngai pei maw...? Mai lam ihsin zo in saannak run nei ding...?

Starpoem Cincin Nu a thu pi sawn le pathian in mipa a tuah hmai ding maw Pathian tih zah nak kan nei a si le inn sung sang kan neh ding ih NU maw PA thupi ti khal el awk nak a um ding ka zum lem lo.

Salai Selawn Pa khal a thupi Nu khal a thupi ti cu kan theihcia si ko. Cumi ihsin inn sungsang ahcun Nu a thupi sawn. Inn sungsangah a thupi sawn a um lo tivek khal a si lo. Inn sungsang ah cun Nu rori Nu rori. "Nu thlum Pa al" timi tawngfim kha nan hngilh si pei maw?

Zilthli Lal Nei Thluai Pu chiarman, kei inn sungsang nuam suak thei dingah PA a thupi sawn zia ka hmuhdan ka rawn rel ve ding ih kan pupa ttong tthim khal ah "mipa hnah nei" ti hi a rak um. PA hi cu NU hnak ih khawruah nei sawn, kawruah sangsawn in kan pipu khal in an rak ruat cio. Nunau hi cu beidon awl, riahsiat awl, thinnau awl, ruahnak lam ah khal mipa kan lo tluk lo, thazang lam khal ah kan lo tluk cuang lo ti cu zo khal ih pompi mi a si ko. Cu ruangah inn sungsang kaihhruainak lam khalah "inn sangpa"
Kan lo tluk thei cuang lo ding ti cu a fiang nasa in ka thei cunah inn sangpa hin mi kaihhruaidan a thiam hi cun inn sang nuam a suak tengteng ko ding.

Michael Van Humanism/humanities subject pawl kan zoh asile, Innsang nuam din theinak dingah cun "Pa" hi thupi sawn vekin lang hmansehla, Himi Subject pawl thotho ah hin innsungsang "Nu le Pa" karlak ih thenawknak a suah nak hrampi bikcu ihkhun par ihsin asi tikhal kan hmu thei.in rak theithiam uhla, Ihkhun par lam cu "Pa" bikih tuanvo sihmansehla "Nu" in "Pa" ih lungtho ding le thazang cak dingin a duat ih a thlem thiamlo ahcun "Nu" thotho in a tuar ih"Nu bik" a thinheng cun innsungsang cu a buai thok..Curuangah innsungsang nuam theinak dingah cun "Nu" hi a thupi sawn tin keicu ka hmu. Leitlun ram pi pahnih Greek le Troy khal kha kan zoh sile "Nunau" a si bik kha an cuh awk..ka nganmi hi zahmawh lam ah in rak ngai sak hlah uh,ka ngan dan hi a ruhrawt lo tuk lam hokhaw.. John Westly (Zobik a si ti ka theilciah nawnlo ih ka dik lo si le in rak ngaithiam uh) cun,Khawvel ih nu pawl hi ka nu vek sihai sehla cu thawnginn timi hi a umlo ding a ti kha nan cing ve maw? Nu ngai lo ben,Pa le fate pawl lawngin innsang din ti a umdah silo..Nu bik cu a rak thupi ko e.

Lasi Doll innsung sang nuamnak ding hrang ahcun Pa bik hi a thu pi sawn in ka ruat. Pa bik hi mi rin um lo si bang ta seh la pa bik in in sung sangah nuam ti lo in aleng ah fala dang thawn nuam in um bang ta seh la cu a inn sang ah nuam ati lo ding ih nu bik si maw a fa le tla si maw an par ah a lung a kim lo ding ih phun nawi nak simaw  buai nak lawng lawng a hawl ding pa'i mithmai hmu lo insang cu in sang nuam a si thei lo.

Salai Lbluai Mai duhmi hman ei ngam lon’ thla 9 sung rori harsat ,zonzai tuar in ,in kilkhawl a pum sungah thla 10 a hongkim in a thlanhriput le thihnai suak in in hringsuak tu NUcu a sunglawi tuk.kan thinhar phang le rilrawn phang in zan khal ah it lo sing lo sun khal ah kan ning tih phang in kan kiang nai ah um in in kilhim tu nu cu a va sungalawi tak ve.minung kan hong si thlang innsang pa khal kan kimvel ah in kil in zoh a hnisiamsi innsang nu khal a lungawi ve.Innsang pa cu a suahvah tul ah in tansan theu nubik um lo sehla innsang nun ah a famkim thei lo. Innsang ih nubik a um lo cun, ar fano humtu nei lo,kil khawi tu nei lo bang in fale pawl cu a sukso ah tawivak ciamco.

Hnem Tawi Pu chiarman , Innsang nuam ter tu cu Pa rori pan teh , Nu cu a thupi tuk a dik , asinan Nauhak cun Pa kan rinsan zia cu , mi in in hmuhsuam tik ah ka Pa ka lo sim ding ti'n hnarpor tak in si fa le pawl in kan hngal san. Pa umnak inn le Pa ih kilkhawl mi innsang cu raalhruang ih kulhmi innpi thawn a bang ti tongfim a um kha . Pa umnak le Pa ih kil vel mi innsang cu Lungpi tlun ih innsak vek si. Thlisia le ruahsia khal in a tul sawi thei lo. Innsaang ih lu hi Pa an si vek in innsang nuam le nuam lo cu Pa pawl ih an din/sak mi ziang vek tak a si ti mi par in a thum aw thluh . Curuangah innsang nuam si ding ah Pa rori an thupi si hi.

Kawllian Sailung In sungsang lu bik cu pabik hi a si ko nan,a thupi bik cu nu bik a si la2 fawn. Ziangah kan ti le pa cun nui hnenah rinnak tampi nghatin insungsang ziangtinkim an ruat man theu lo.Curuangah nubikin pasalduhzawng le rintlak a um ih insungsang le fate thazetih a zoh thei a siah cun, pa in nupi fanau leh insungsangah hnangamnak a hmu. Ei le bar hawlnak le insungsang hrangah taimaak a suah ih,cutin iinsang nuam a suak theu....curuangah pabik hi insaang ngulpi si khal seh la nu hi a awktu tak a cehfeek cu a si!!!

Julie Lung Hnem Par Zu a in zetmi inn sangpa hman a nupi le a fale thinlungah a rak thupibik ringring. Pa hi nan thu pi tak.Tlunlam ih ngan cia bang in nauhakkhal in mi thawn an tawhawk tikah a kiang ih kil sawntu ka nu ka lo sim ding ti si sawn lo in hnatuannak ih um a pa sawn kha ka lo sim ding a ti theu. Innsung sang riahsiatnak ton tik khal ah Pabik ih hnemnak hnak ih nu bik hrang ah sunglawi a umlo asi kha.Zutama pa innsang hman ah hi tluk nupi fale ih thinlungah a rak thupi bik mi le a nuam mi innsang asi ahcun Pafel te innsang ah ziang tluk in mual nei mi innsang le a nuam mi inn sang asi ding ti hmuh a thieh.

Van Ruah Caankaitu, ka ban ka rak thlir ve, tlai hnu ah in ti siang hlah aw... innsang hrangah "Pa" hi lu bik an ti asinan "Nu" cu hngawng asi. Hngawng tel loin lu cu a ding hrimhrim lo. "Nu" a thupi tuk!!! Hngawng um lo cun maw, lu khi hlum lurli'n ke ih sih sukso men ah a cang ding. Innsang ah "Nu" bik ih nundaan ih zirin "Pa" khalin mipi lakah sunparnak a ngah.(Thufim31) "Nu" na thupi.

Senhri Man Lu a um lo Cun. .. hngawng lawng in mi a hruai suak thei lo ding. Kan bah pit rero ding si. Cu ruangah hngawng lawng in lam zing tha a hruai thei lo lu bik a um lo cun. Cu ruangah inn sung sang khal ah pa in zin tha a hmuh ih a feh pit a si le inn sung sang a nuam. Nu in hruai Tum khal seh la a lu bik pa in a thlun duh cuang lo ahcun nu cun a bah pit rero ding. Pa lu bik nangmah na Thu pi bik.Zin dik ih na feh pit hmai sak le na inn sung sang a nuam ding.

Timote Vuk Innsang nu fello, mi lom, mi thapek thiam lo asi cun Pa bik in thape thiamtu dang a hawl thei. Inn sang nuam a ti nawn lo, cuti cun tawhawknak a suak, inn sang a buai.., curuangah Inn sangnu a thupi... Pathian t'ihzahtu minu cu a sunglawi, man a nei...a fate le a pasal in an lawm...pasal malte umlo sungih sen hlekhlek ih rak cei aw mai innsang cu a nuam lo ding. A fel, mi zawithei, Pathian t'ihzahtu innsangnu a thupibik. Tuisun ni tiang zukhmawm zianghman tham lo koih ka um theinak le Pathian lamih ka nun thuk sinih ka luh theinak cu ka Nui' ruangah a si... Innsangnu a thupibik rori...

Vanessa Doll Pa le cu Innsungsang ih Siangphahrang tluak an si. Innsungsang hrang ih Paraltha, kan raltha lo caan ah raltha zet ih um ngam ding in' le tong ngam ding in thazang in pek ringringtu, nei lo lak ihsin Insungsang hrang ih nuam nak ding le,mi bang hai seh ti ih duh sak ringring tu.....Innsang Pa Bik hi,A thupi bik ko. PA nang mah hi ziang kim ih.ziang kim na si..na thupi tuk rori.

Van Lal Mawi ADAM amah lawng a um lai ah Pathian in ADAM hnak ruh lak in EVE a ser cuih san lai hmanah NU a rak thu pi tukzo....kan in hnen pa in ziang i sim tile “kan nu umlo hnu cu khua khan dan ding ka thei lo” ti ah I sim dah.....cun kan kohhran ih MoTHERS DAY tin tein NU sunglawi zia a thupit zia a sim titen mitthli tla lo an um dah lo.. PA cu thu pi lo si lo in NU cingcing a thu pi sawn e. Pathian khuakhan kan thei ban lo nan EVE sung lawi zia lang ter dingah ADAM a ser hmai sa tla a si ding. PA a thu pi lo ka ti si lovin NU a sung lawi ce, rin lo pi thinphannak kan ton tikah “Awi ka NU!” kan ti hmai sa si lo maw......?

Piggypiggy Tluang Nunau ai in Mipa hi sersiam hmaisat an si Mipa cu nunau ih lu a si ih Hruai tu ding khal a si. In sang pa in a hruai that na na ahcun inn sang nuam khal din a theih!!! PaPa nangmai hnak ruh te ih sin NuNu sersiam a rak si PaPa ....NuNu hrangah na va thu pi em!!!! Zirnak hramah Nu a si !! Ci a tuh tu Pa Pa na hruainak kan tul ee!!

David Cungte kan lai pu pa tong fim ah “nu pi tha le lo ram tha”  ti um kha nu cu in sang than so le mi nei nung si nak ah le in sang a nuam thei nak dingah tla a thu pi bik ti nak si cu.

Crazylove Mawite Pa a thu pit daan zia cu ..inn sungsang Pa bik pathian thu thawn a inn sung sang a hruai tu cu zohthimtlak inn sang nuam a si ringring. Inn sang Pa bik zuu in ringring mi inn sung sang khi ziang tik hman ah a inn sung sang a nuam dah lo..Cu ruang ah ziang tluk in si Pa pawl nan thu pi tha ten ruak hnik uh. Inn sung sang nuam a din thei tu le zoh thim tlak Inn sung sang suak thei ding in Pa pawl in tuan vo tum pi nan nei. Pathian a tih zah tu Pa kan ram kan miphun in kan tul..Pa cu pathian sang tu nan si, nan thu pi tuk...ziang vek inn sung sang nan din ding SaLai pawl.....????

Sabuti Chun Tai Kan Debate aw-nak ah, NU Bik a thupi tin- a Hmaisa zo. A thu pi Ko NU cu , Inn sang pakhat ah an Pa bik le an Nu bik an fa leh fimthiamnak thu ruang ah an el aw ... an fa pawl le mi fim thiam an um lo ....NU cun inn sang nuam le Fa le fim thiam nak dingah NU le PA in ziang hman kan bawm lo a ti. Mi pawl cu an Fa le tlawngkai anfeh ah tla an thlun kan Fa ziang vek a bang....? Zan ca an zoh ah tla an kiang ah an to an kil , kha pawl cu a tu ih mi langsar tam deuh pawl hi an si a ti, an PA cun - Laimi ih mi lang sar pawl kha teh- an NU le Pa in an kil cuang lo pi a ti, NU cun kan san a bang aw nawn lo, nang cu inn sang ei le in ah na can a cem si,, , kan Fa le hi Caw thlah ,Naa thlah in kan thlah si, kan Fa le fim thiam ngaih nak a um lo a ti .. (1) France Ral Bawi pa cun kan Ram ah Ralkap a thu pi lo, Nu an thu pi a ti. (2) India Thufim ah Saya 100 hnak in NU pakhat a thupi saw an ti (3) John-W... cun ka NU vek 10 um seh la Leitlun ah Thawng inn a um lo ding a ti ...(4) Since Father an ti mi pa tla kha cathiam mi a si lo a NU in ca zirh cop mi a si. Inn sang nuam ding ah le, Fa nu fa pa hrang duh sak bik tu cu, Pa hnak in Nu hi a thu pi ti cu a fiang tuk. Kan Khua le ram ah , Pa- Pastor ih an fa hi a Zuva an tam cuang . Nu- Pastor ih an fa pawl cu a Zuva ka hmu hngai dah lo, ziang ah ti le an inn sang , a fa le a kai hruai thei tuk ti a lang. Nuhmei fa le Pahmei fa ah tla Pahmei fa hi a sual an tam deuh ding. Phun dang ah ruat lo in!

Dede Fefe Inn sang hrang ah cun Nu khal thu pi Pa khal thu pi, sinan Pa hi an thu pi hlei ce ding tin ka ruat. Ziang ah ti le Pa ti mi hi cu a khuitawk ram khal ah inn sung sang ih lu bik an si. Pa um lo ah hin inn sung sang thu rel khal a kim fiang thei lo. Kei hi pa thu pit zia hi lang fiang tak in rel ding cu ka thei lo ka pa hnen ka um lo ih pa hi ziang vek ti ka thei lo..sinan ka nu in pa din hmun le nu din hmun in in zoh tik ah pa a tuan caan ah hin ziang tluk in pa ngaingai um sehla thil hi a kim sawn ding si khawh ti ka ruah ah hin PA hi cu an thu pi ngaingai. Nu in cu ziang tluk in pa vek in zuam khal se la Pa ngai2 an um lo ah hi cun thil 100 sung ah 70 lawng hi a kim thei. Pa bik um ah hi cun nu pawl tla an thin nau lo, fa le tla an thin nau lo. kan Pa le pawl hi ziang hman si lo te khal va si hai se la "Pa " ti mi hin a cawi sang hai ih upat tlak hi an si zo..Cu ruangah kan hrang ah cun PA hi an thu pi tuk.

Zilthli Lal Nei Thluai Kan pipu pawl khal in insangpa hi a thupit sawnzia an hmuh fiangtuk ruang ah ttongttimnak ah tla "makpa ttha le liangdam ttha" an tinak san cu a si. Innsang hruaitu PA bik a tthat lo cun inn sangnu a buai. Inn sangnu a buai cun fale pawl hruaitu neilo fapa bang an vavai, fale an vavai cun inn sungsang a buai, inn sungsang a buai cun sung le khat tiang in an buai, sung le khat an buai cun khawtlang tiang a buai. Cu cu an buainak hrampi ttha te'n kan zoh a si le insangpa bik ih fehpisual ruang ah a si. Cunah ah inn sangpa hi inn sungsang lubik le thupibik a si.

Salai Mitthli Nu umpi mi fate pawl hrangah Pa tul loin Hmeipi (nuhmei) pawl tla khi zoh uh la, pahmei timi hi tam an um lo ding. Nuhmei tangsung ihsin tanglian nauhak hi siar cawk loin an tam. Kan um rero lai ding. Nuhmei tang ihsin pitling in leitlun pumpi tiang ih hminthang pawl hi kan zoh a sile Pa hnak in Nu pawl an thupi timi tla kan thei ko ding ka zum. Curuangah Pa hnak in Nu ih awka le kaih hruainak hi a tha in a thupi sawn. Inn sang hrang khal ah a thanso pi an tam zet.

Hnem Tawi  Pu Mitthli a tlun ih na run ngan cu a dik na sa , Asinan kan thei cio ding Theipi kung in Apple a rah kel lo , ti duh san cu Pa lawng in ci an thlah kel , Nu ti mi cu an cituh mi rahmawi rahtha kungtha a suak ding ih kilkhawi/sawmdawl tu hi an si.A ci um lawn thingno te a to dah lo. Fa le pawl nuncan zoh in a Pa hi ziang vek ha si an ti theu. Misual / mitha mifel fa pawl khi mi in Pa'i fa tete an ti theu. Thisen ih hnatuan dan le thisen in lai a rel thei dan cu mi in , in lawm ah maw in dem ah maw Pa'i thisen keng tete in ti lala. Pa hi aw an va thupi tete. Fale in mw Pa'i keneh kan thlun kohkoh.
Leitlun ah Pahmei ai in nuhmei an tam ngai , Ziangah tile Pa in a innsang tha ten a din cun insang nu'i lungthin hmuah a luahkhat theh ih hmai in a hruai , a zirh , innsang nuam ti hi a zirh ta . Duhdwtnak ah tlasam lo ding in duhdwtnak thawn innsang a din cun vanduainak run thleng in Pa in tan hman seh , a innsang pawl cun an Pa hnak ih patlin an hmu nawn lo . Nu khal in Papi um nawn lo man seh Pa ih a tanta mi duhdwtnak sung ah a ziam ih tangdang a ngai lo hrimhrim. Hi thu pawl zoh in Pa hi innsang hrang ih hram , thilci ti hi a fiang . Curuangah innsang nuam din ding ah cun Pa rori an thu pi sawn.

Salai Lbluai Ziang thei lo kan sentet lai, in kilkhawi tu ka nu ar ih a fa a duhdawt hnak in in duhdawt sawn.A hak mi rawl lak ih sin a nem mi rawl in kan sungah rawl in pek.Nui’ duhdawtnak a thuk zia, fale hrang an ruat zia ei in tha ei ngam lon maw fale thasonak hawl in suk le so ah thlanhriput in hna a tuan.Sunloih tlak ka nu Upat tlak ka nu, fa le pawl in nu hi sunloih uhsi. Tihzah tlak ka nu, rinsan tlak ka nu, fale pawl in nu hi sunloih uhsi. Fale pawl kan nih khal in nu duhdawt thiam in, a dam sung caan tawite ah duhdawt thiam in, nu duhdawt hna a thiamtu cu Pathian tihzah tla a si, lamtha in hmuh tu a si. Nui’ duhdawtnak a thuk zia thiltha neih mi hmuahhmuah fale hrang tiin ei in tha ei lon maw fale hrangah ti in suk le so ah thlanhri put in hna a tuan. Nui’ duhdawtnak cu fale kan nih in samtum hman sehla sam thei ding a si lo. Cu tluk ih in duhdawt tu cu Upat tlak sunloih tlak ngaingai a si.Fale kan hrangah Nu hi a sunglawi in a thupi tuk.

Senhri Man na thiam tuk... Hnem Tawi... ka rawn bet ding... pa cun lai king bang in a duh duh nak ah ci a thlah i a tuam hlawm. Pa nang mah in na inn sung sang kha arpi in a fa a fin khawi bang in nangmah in na fin khawi a tul. Cu ti ih na fin khawi thiam lo a si le na fa te pawl cu an thek darh Aw thluh ding. Nu pi zoh dan na thiam lo bet bet ahcun na nu pi khal in na fa an lo hmeih pit sak duh lo ding.

Van Ruah zovek ram uktu le mifim mithiam, hruaitu sang zetzet le mi ropi pawl khal nu'i pum sungin an suak, nu'i ttang an thleng hmaisa bik, nu'i anka an thei hmaisa bik, nu'i nuncan an hmu hmaisa bik. (naute khi an ttong thiam lo, aan an cing lonan, an zirnak cu an hmuhmi le, an theihmi le an dai ngahmi in a si.) milai ih zirnak hmaisa bik cu NU... a va thupi tak em...

Vanessa Doll  Mother day a thupit vek in'Father day tla a rak thupi sinsin ve.......kan mah in sersiam tu kan PA hi a um lo ta seh la...hi ti dinghmun tiang in' tla ka rak um thei lo ding. PA kan hrang ah na thupi,na sunglawi ringring ko..example::mi hnen ih sin sawm nak ca ka ngah tik ah khal ah tla si seh...cu..PA te sung...Cu...PA te inn sungsang., cu mi..PA te inn ah ti khi a si tam sawn theu in ka thei....ziang khal si seh la.PA ti rori cu a sung lawi in hmin a nei cingcing ko.

Kawllian Sailung Mai pawl, nan rel mi hmuah cu a dik nan ,innsang a dintu silovin din a sizo mi innsang tinuam leh ti ttha tu dingsawn Nu' khan a dinhmun thupitzia a theih loh ruangah leh a sinak thupi tuk kha a diklo zawngih a hman ruangah thentheknak a suak a si sawn. Curuangah khawkhaannak tha a um nan rahtha a suahnak ding a kungpi (nubik) a that loh ruangah a rah cu bawr khal sehla a sung a rak nget theu a si hi maw....!!!

JulieLungHnemPar Inn sangih  raltha bik tu Pa. A duhdawtnak ruangah innsang a nuam. Sam thei lo ding mi Pa ih duhdawt nak. A par lam ah Nu cu pa lo in khal fale an cawm thei nan ti a hman ve tho nan Pa um lo mi innsang ah fale khal in Pa ih duhdawt nak a hal bang in Nu bik khal in a hal ve. Ral tha zet mi Pa um lonakah innsang nuam dan a tlamtling lo. Pa a thu pi zia kan thei ko ding.

Timote Vuk A tlunih kan ron ngan kha mah le mah fak aw ti zawngin in rak ruat sak siang hram hlah uh. Ka duhsan cu nu fel, Pathian t'ihzahtu cu fale hrang pasal hrang meifar a si. Nui' awka thlum le thlacamnak cu innsang nuam tirtu rori a si. Nupi fel, nunnem te tla cu nei sehla hnat'uan tlung bang khal thing kan cek hngal lo ding zoha ti thei..! Nu an thupibik. Adam le Evi kha Eden hmuanih dawisuah an si kha Evi ruangah a si... At'ha le t'halo, a tawh kaitu cu NU an si. Innsang nomnak dingih thupibik cu nui' mithmai pante le awkam thlum a si.

Starpoem Cincin Pa in nu lo in fa ahring thei lo vek in nu khal pa lo in fa ahring thei lo..Nu a thu pi sawn ti tu cun Nu ih zoh thim tlak mipa si se la a tha sinsin.

Van Lal Mawi can mal te a awm lai ih NU sung lawi zia leh in duh dawt zia. ISAAK ih thlaw suah kha zo ruangah JAKOB in a co? (GENESIS 27: 12-13. ) kan zoh le kan hmu thei .cang. 13 nak ANU IN. KA FA CAM SIAT NAK A THLENG A SI LE KEI MAI PAR AH SI SEH ka lo sim mi tuah sawn aw. ka duh tuk hi BIBLE cang te hi. NU sung lawi zia in duh dawt zia, cun dam loh nak kan tawh lai can khalah PA it thah lai NU cun it thiam lo'n thin harin in hnem theu. NU cingcing a sung lawi hlei ce.....

Zilthli Lal Nei Thluai Leitlun ih mi hminthang Billy Graham cun "vanram hmuh a duhduh ka inn ah ra leng uh" ti ah raltha zet in a ttong ngam. Inn sangpa in inn sangkaihhruaidan a thiam hi cun inn sangnuam VANRAM thawn hman tahtthim thei ding tluk inn sang khal a suak thei ti fiang zet in kan hmu thei. Curuangah inn sangnuam dinsuak thei ding ahcun inn sangpa a rak thupi bik cingcing.

Salai Mitthli Inn sungsang tinin kan tulbik mi cu Nu thotho hi a si. Pa pawl cu lamrhuaitu an si nan khih hmuhtu cu NU thotho an si. Nu bik in a saduhthat a rel mi hi fate le sungkua hrangah a thathnem pi theu ringring. Pa cun "Nunau thu le sepi ki"a ti tak nan in Nu thu lung PA pawl hi an lam a tluang thei zet. Nu ih zohkil lemlo mi PA kha a thuamhnawh hruh tla a mawi dah lo ding. PA bikcu nubik in a ceimawi hnuhnu cun a zohtu mithmuahah a mawi theh. Cu ruangah sungkua khatah NU le PA hi an thupi bik ih cumi lakah Pa le hrangah Nu hi a thupi sinsin.

Lasi Doll Pa um lo seh la ka sem suak lo ding. Pa cu fahniang le hrang ih kan zir lai bu tha bik a si. Kan hmel mawi nak thlalang tha bik a si. Kan nun in hruai tu tha bik le lam zin dik ih in khih hmuh tu tha bik an si!!! Ka pa in ka sentet lai ihsin nun i sim lo bang ta seh la ziang tin ka cang ding Cu ruagah fahniang pawl hrangah siseh inn sungsang hrang khal ih a thu pi bik mi cu Pa a si tin ka ruat .

Van Ruah Inn sangnuam dingah ti thu kan rel asile remdaihnak (peace) a um ttul... UNO in ram harsa, ram buai le ram farah bawm dingah hohatu nunau maw mipa hnenah bomnak kan pek ding timi thu an rel... MIPA kan bawm asile, meithal le ralthuam an lei ding, ralkap an lalut ding. NUNAU kan bawm asile ei ding nei lo an bawm ding, nauhak pawl fimthiamnak an zirh ding, ramsung remdaihnak le nunnomnak hrangah tthahnem zetin an hmang ding ti'n an ruat suak. Innsang remdaihnak le nomnak thlentu cu NU asi.

Sabuti Chun Tai Nu A Thupi Dan ... USA P- Bus cun kan Ram hi NU Pawl in- in Uk sehla Pa Pawl in zoh men seh la a ti .... Hell Ram Cakuat kan siar cio, kan thei cio ko ding ka zum ! NU le PA a thupi zia NU in a thok ko kha. Kan Bawipa Jesu a thih ih a tho sal can lai ah tla NU pawl si lo sawm hmai sabik ah Thlan ah an thleng NU Cu an zam a ttha mi an Seherh cuang a fiang tuk , Van siat harsa kan tong san ah tla aw ka NU kan ti theu kha, Inn lam ca kan kuat tla le ka NU le Pa, unau zaten nan dam maw kan ti ko kha. Inn sang Nuam nak ding ah NU hi a hmin kan sal hmai sa lawng si lo in a thupi tuk mi a si ti cu fiang tuk in a lang

Hnem Tawi Ramuk tu a tthat lo poh cun ram mipi kan har , mai khua le ram ah um nawn lo'n a suk so ah kan thekdarh aw theh. Pangpar tla khi a parmawi tak lai ah a parzik in hun khiak hman la a mawinak a hlo . Tiduhsan cu Ram uktu, inn sang dintu pa a tthat lo , a innsang a ngaih sak lo cun thendarh aw theh mi in saang , lungrualnak leh nomnak um lo mi innsang ah an suak , Pangparkung ih a mawi nak tak cu a par hi si , par tlun ah a hnah leh a kung an to lo . A zik / lu ah a par theu. Cuvek in innsang ih lu ,zik si mi Pa hi innsang ti mawi, ti nuam tu an si . Aw Pa hi innsang din tu ah mi thupi bik maw an rak si.

Zilthli Lal Nei Thluai A tlun ih Salai Mitthli thu thawn pehparawk in leitlun ah PA tel lo'n Nui' (nuhmei fa) ttang ih thanglian mi hminthang, mi ropi le upat tlak zet minung tampi hmuh ding tampi an um a dik lawlaw. Hmanseh minung cu nitin kan caanhmandan hi kan thuanthu kan rak ngan rero hi a rak si. Cui Nuhmeifa khal in a ngan ve a mah bulpak thuanthu cu mawizet le mi ih zohtthim ding tlak ko in a ngan thei ruangah mi hminthang a can theinak cu a si. Asinan a innsang thuanthu a vun ruahsal tikah thuanthu hi a tlamtling thei dah lo. Ziangah ti le a PA innsangpa in thuanthu mawi te a rak ngan lo ruang ah a si. Khami nuhmeifa in a fimnak, a thiamnak le a hminthannak hmang in le thinnau lo te'n zuam in insang nuam thuanthu ngan tum khal sehla a ngah lo rori. Ziang ah tile PA bik hi a um lo ruang ah a si. Fale pawl thuanthu mawite ngansuaktu kan si theinak ding ih a thubik cu inn sangpa hi nan rak si.

Salai LbluaiKanthu raldo mi hi Nu/Pa thupit thu a si ih hinah hringtu Nu/Pa a si bik.An pathnih in an thupi ti sehla el ding a um lo. Hinah hin an sinak ka sim duh. An sinak zawn ih thupitnak a si sawn. Kan pupa tongfim ah Nu thlum Pa al ti a um. Leilung pi ah Nu cu a thlum mi an si.

*U.S president a vei(16) nak A.Lincon in a zung sungin a langnak ah thingfa a phun ih a hmin ah Mother tree tin hmin a sak. Pa a hmang lo. Kan umnak leilung khal hi mother eart tiah an ti. Nu kan suahhlan ih thla(9) kan umnak kan suahhnu kan damsung, kan umnak mother eart, NU A THUPI BIK.

*Kan Bible ah a langzet mi Paul in ka fapa a ti mi timote hi a pa Greek mifim a si,a nu cu Judah mi a si.biaknak le taksa lam ah thazet le felzet ih a hruaitu cu a nu a si. Thaten ruat sehla ka duh.

* Kan ram zalennak in tuahsak tu Col.Aungsan an unau rual a kiltu le a pitlin tu cu an nu Daw Suh a si.Cathiam a si lo naan a fa le lawng si lo in a pasal U Pha tla thuthentu(lawyer)cang ko in a tawlrel sak tu a si.A fapa pahnih in kan ram hrangah an nunnak an pek theinak hi Nu a thupi tuk zia a lang ter a si.Nu hi leilungpi a cemlai hlan lo an thupi ringring ko ding.

Duhdawtnak Khawthim part 2 + 3

Duhdawtnak Khawthim

2                                             
Nuamnaiten an inn lamah unau hnih tei cu an kir sal. A ke bai uaih au cu dunglamihsin tlangval pa in a zoh cuah co. A ke nat lai tak ih a mit sing curco lai kha a mitthlamah a lang pem pem. An liam tiang a zoh ih cui hnu lawngah inn sungah a lut.
“Pu, kan dung zan ih thirleng thawn ka khawng ngah ka ti tak tei an si kha,Unau maw an si ngai?”
“Unau e, a U tu kha Yangon ah tlawng kai in a um ih tu nai te ih ra tlung a si kha.”

“Asile ke natu kha a nauhaktu maw?”
“Aw, a nau tu kha cu  Kalay University ah kum khat nak lawng si ding a kai, ka thei fiang lo,” tiah a sut mi cu thin sau ten a sim.
“Aw si ngai,  an um dan ka zoh ah , an lian ding ka zum?” tiah a pu kiangah va to phah in a sut bet. A pu in fiang ten a rak zoh ih a hnih san.
“Ziang…..”
“Tui hnu thir leng ih na pah sal le, cawh na kuan tul thlang ding,” hni phah in a capoh ih a tong a peh. “Midang deuh kha hril thlang aw maw?”
“A nau ta tu kha cu pah hrih ka duh …..,” an pu vah in an hni.
A pi rat tho pek cun “Nan pu vah teh a ziang le ziang saw nan hnih rero?”tiah a mah le mah a zoh aw phah.A sam buarpi cu thai thih in a hriat rero. Dung lam a zoh aw thul, a ke lam a bih aw phah.Amah ten a phu hrung aw. A lung kim thei lo ih “Ziang saw nan hnih ; sim uh,” tiah Pu tar kiangah to hmun rem aw phah in a to ve.
Pitar ih tong cu an hnih suak sinsin ih an pu vah cun an hni sal. An hnih poh le pitar a thin heng sinsin.
Pitar cu ziang sim loin an um san. Tlang val in buh bel a kholh ih a pu in mei  sa a muah. Pitar cu a to nak kel  ah to in tisa sen cu a in rero.
“Tui sun lam tlawng hmin pek ding na ti teh,feh pi tu ding rual pi na nei pei maw?”tiah a pu in Tlangval pa cu a sut.
“Aw nei ding,Luai Dum thawn kan feh ding, thai thawh  ei theh  hnu le kan feh tum”, tiah a sim. “Aw….” ti ah Putar cu a lu a su ngulh ngo.
“Tangkaa kha, na pi zawngah ka ret, na hei zat in rak la men aw, Kei cu meeting  nak lam ah ka lo feh san ding.

3

Tlangval tei inn ihsin hla an thlen hlan ah “Ka hua tuk, lai tlanglam mi thang so lo pawl hi, mah tlangval pipi thir leng hman to thiam lo, a hmel pi thawn. A hngawng in ka dek that lai ding,ka ton leh tik cu a hringin ka ei thluh ding.”
“cut…cut….. ai…ai…ka nu …aih… a na tuk!,” A ke na lam in lung to a sit bet. “Na phun tam tuk ih ka ke hmuah a aa thluh tum ! tiah a    u   a met phah.
“Um …men… ka mit kem tuk,mi zan ah kei in pah, tu nang a lo pah bet…..In tih hrim si ding; ti aw….”
“Nang khal le cu lawm mam,kan theih mi khal a si lo kha, kan van sia hrim hrim.”
“Umm….mi zan ka pa in in kok lo ih zia te um, Tui zing cu in kok ding ka zum….” tiah a nau cu kuah phah in a tong phutpho.
A caan caan le a mit a nuai phah phah.Anuai na deuh ih a mit ek cu mit sungah a lut ngah pang. Anuai sinsin , a na vivo. Mitthli le hnap dawp hniang hniang ko a nuai hnu ah a reh sal.December zing dai a si nan a thlan in a luan nakah  a ciar theh. A nau nu in thi zik in a hnih san.
“Nan ni  unau hnih teh nan va rei lawm mam ha, Nute ziang na cang ,uaih auh rero,tiah  a nu in a  rak sut.
“Lai tlang pa pakhat a thir leng zir in a pah ngah , mizan ih  in pah ngah tu kha…ka mit kem tuk..Nu,”tiah zual a ko. A nu in a rak hnih san men. A u    tu zia a theih zo ruangah ziang siar lo in a nau  nu te ih ke naa cu a zoh sak.
“Tui sun tlawng hmin pek  teh na feh thei pei maw,Na ke le a na fawn, thai sun lam ah hmin pe men aw,” tiah a nu in a ti.
“A poi lo,  ka feh thei ko ding.”
“Keimah  ka tel ding si,cu lo le bike a to thei lo ding,”tiah a U tu a mah feh duh tuk ruangah a rak sawn lohli.
“Asile cu nan mai thu, petrol tla kha  nan thun hngilh pang kei. Na pai meeting hlan ah tangkaa  kha ziang zat nan la ding ti kha sim ta awla, cu lo le ka theih lo in tangkaa  nan hmang a ti lala pang kei”.
“Aw,” an pahnih in an sal rual.


pehlai ding.....

Biazai pawl ( 3 )

Thinhar mang bang ka um tik ah
I hnihsan siang hram hlah aw

Riahsiat ninghan ka ton tik ah
Dung lam i hersan siang hram hlah aw

Na zuun tuar ih lung a leng tik ah
I tlansan siang hram hlah aw

Lungawi hna ngam ih ka um tik ah
Lunghlim ten i lawm ve hram aw.

Zan thla eng le si eng thuai 
Zau tual ah thu nuam rel in
Sa duhthat nak zakim thawn
Duhdawtnak thu kan ruah aw

Thlipi le vanruah sur lakah
Thawmthang thei lo bang len
Thu nuam le duhdawtnak pawl
Kan pahnih ten kan ruah aw

Ngai thiam awk lonak ralpa
Kan kar lak ih a suah zan
Ka ruah awk le sim mi pawl
A sangsang ten a hlo ral !!!!

Zangfah dil in vei zahra luan
Tilhthiam, khukbil tangdornak thawn
Ngai thiam dil in ka sim ko nan
Zilthli sem hlo bang ka anka a zawm!!!

I tiamkamtu ka palh
A hmun le ram ka hngilh
A tikcu can ka luan
Ka tlai, lamzin hawl in... 

Tuah ding mi tuah loin
Tuah lo ding mi ka buai
Ka mawhnak thei loin
Puarthau in tluang ka khawn

Mai thu thaw mai voih thaw
An ti bang ka lung ruh
Kei mahte feh ka duh
Mual phonak hram thok maw..

Ka hrang tulmi ka fiang
Dar(nazi), meitek(meitalh) le nupi
Mipa tin hrang tul ngai
Cu lawngah famkim ding...

Parmawi duhmi a sang
A rim a tak, a mawi
A sung hlei cuang kei hrang

Tu thingsang par ih par
A zoh tu hmuah suk zoh'n
Hngal le puar in a thlir 

Par tinkim hluantu bang
Tluang a khawng khaw zadeng
Bawi nu bang in a to

Hngalnak le puarthau man
Khiaktu, lawmtu nei lawn
Kum khat hnu leng U...vivo.

Ka khawp thei lomi biazai
Ka ning thei lomi biazai
Ngan lo in ka um thei lo
A thuknak lamah i hruai
A sangnak hmunah i sawm
A thuthup pawl i sim
A hruangkulh thu i ruah
Ir awm puak mi bia
A thupten ngan i fial
Duhdawtnak huham cun!!!
Thiam le thiam lo si loin
Ka ngan sal theu, a cui biazai!

Tuu hmul bang nem le var
Puan mawi sintu a ra suak
Tih zah upatnak thawn 
Ra suaktu hmauh an ding.

Puan thlam phen ih hmel mawi
Lasi nun nem bang hmeltha
A zohtu hmauh lunghlim'n
Mawinak le thatnak cun a neh.

Kan rem mi zai hla mawi
An tiam mi kumkhua hrang
A sam bo mi pakhat lawng
Kekkuai mi kei val lungthin!!!

Duhdawtnak Khawthim

Duhdawtnak Khawthim

1

Kling….kling…..kling….kkling…tlan…..uh…rak….tlan…..uh….Phum…..thlurh….Ai… a na tuk…

Thirleng zir rero tlangval pakhat le mawi zerzi ten cei aw, Biak inn lampan fala pahnih pah aw thawm cun kiangkap thawm celcel cu a daih ter rupri. A rei hlanah kiangkap dai reprep cu au thawm thang cun a khuh hlo sal. Sam ro phialphial, mai hil tiamtiam, ka ang hiahia ih ding thirleng mawng zirtu Laitlang tlangval cu fala pahnih ih pakhat a pah ngah mi sawn in ring mangkeng in a kawk ciamco.

“Mi hlo thlau pa, thirleng mawng thiam lo cu ziangah na mawng rero, inn ah daiten um men hme!” tiah a aw neih hmuah cun a hro. Fala pakhat sawntu cu ziang khal tong loin lamzin ih bahtu cu a kai tho. Tlangvalpa cun “Ai, in ngai thiam uh! Kei mai mawh rori. Thirleng ka zir pek ih brik(brake) khal ka thiam hrih lo ih cu nah ho khaw”, tiah thinnuam lo zet in ngaithiam a dil rero.

Tlangvalpa cun a phah ngahmi fala nu cu kaih tho tum in a kun zawngah “Nang ih kaih tho khal ka tul lo, ka nau in in kai tho thei” tiah a rak hro bet. Tlangvalpa cu a lu a kheuh ih a thirleng sawn kha a va tung ding. Khawm feh ding unau hnih tei khal cu Biak inn lam pan sal loin an inn lamah an kir. Tlangval khal a thirleng cu to ngam nawn loin nuam naiten a nor ih bai cuapco in a tin ve.

Inn a thlen in a thirleng cu inn sungah a luh ih a khuk thipi cu a hnul fai ih si vai pawl a hnih. Tawk fang a um hnu in a pu ra tin ih thirleng mawng a thiam deuh tlang maw tiah a ra sut. Tlangval pa cun ziang khal sawn loin a tonak kelah a to ngerngi.

Tlangval pa hi phunsang tlawng kai ding in laitlang an khua suahsan in a pu tei(a nu u) tei innah um ding in ra mi a si. Kawlrawn a thleng dah loih thirleng mawng khal a thiam lo. Poi hai tikcu canah thilhfial theih ding in a pu in thirleng mawn a zir ter mi a si. A thok pekah cun a pu in dunglam ihsin a kai theu nan  khawm zan a si ruangah tu tum cu a mahten a zirnak a si.

“Ni dang le kei mah ka lo zirh sal ding” tin a pu in a hnem ih a it san.

Tlawngkai ni khat zing cu tlangvalpa tuanten a tho ih a pu it that thaw lai cu a kai tho. Inn sung ih thirleng khal cu a suah ih a pu rat ding cu a rak hngak. Zingpit mi um lo laiah an pu vah in thirleng mawn zir ding in an suak. Tawkfang an zir rero tlang tin in “Kha, tu cu nangmah lawng mawng tlang aw, na taw kha ti eu hlah la, na fehnak ding lam hla pi khi zoh in mawng aw” tin a pu cun a sim rero.

Tlangval pa khal cu thirleng parah to in a mawng ve mei. A mawng vivo ih zintek a thlen zawngah mi pahnih amah lam ih ra tlan cu a hmu ih kian a tum a rero nan mi pahnih ratnak lamah cun a thirleng hmai lam cun a pan vivo. “Ai…ai… kha.. kha.. rak kiang uh..” a ti zawng le an pah awk thawm “Bommmm… thlurh….”timi awn cu a thang.

Putar khal cu thawmvang a theih veten a ra tlan lohli ve. Tlangval pa cun a pah ngah mi pahnih cu a va naih ih thaten a zoh fiang cu kan dung zan ih a pah ngah mi fala pahnih kha an rak si. Fala pahnih khal cun thaten an zoh cu “Aih, nangmah lala maw, mit kem za! Thih na duh maw?” tin a upa tu thotho in a hro cih. Putar cun “Si ngai, nan mah unau ho maw, ziang ti lamlam saw? Zingpit ih” tin a lakah ra ding in tlangval ih pah ngah mi nute cu a kai tho.

Fala nute cu a dingtum ih a ding lohli thei lo. A vorhlam ke cu bai aw khuapkho in a ding thei nan a feh tum zawngah a bah. Tlangvalpa cun a kai thosal ih a liang a pok ter. Fala pakhattu in tlangvalpa cu a tul ih a nau nute cu a mah liangah a pok ter. Tlangvalpa cu a bah zik ih a Pu in a kham ngah ruangah a bah sal lo. A thirlengtu kha a tungding sal ih an dung in a tlun.

“Kan innah cawl duak uh, sii tla kan hnih ta ding” tin Putar in a sawm ruangah Putar tei inn lampan cun a feh. Inn an thlen in zaute ah an to ih tlangvalpa le puatar cu inn sungah an lut. Sii an lak ih fala nu hnenah tlangvalpa cun a va keng. Amah in culsak a tum nan falal pakhattu in “Nang ih culsak a tul lo, kei mah ka cul ve thei” a ti ruangah tlangvalpa cu an kiangah aa hiahia in a ding.

Putar cun an in ding coffee kuat a ra keng ih an pali cun coffee an in. “Ziang ti lamlam saw, zing pitpit ih unau nau nan len” tiah a sut. “Ka pu, ka pa in meeting ka sawm hngilh va sawm uh, a ti ruangah zingpit taksa cangvaih pah in ka ra lo sim tum” tiah tlangvalpa pah ngah mi fala nu cun a sim.

“Aw, si ngai. Hi kan tlangval hi Laitlang ihsin ra thlengpek a siih thirleng mawng ka zir ter rero lai fang thawn nan tongawk ngah ih ngaithiam ka lo dil”, tiah Putar cun tlangval pai aiawh in ngaithiam a dilsak.

“Pu, nun na sim nawn tul ding, lole cu kan khua fala pawl a pah ngah vivo ding ih leiba na kuan cawk zik lo”, tiah fala nu cun a capoh ih an zaten an hni nan tlangvalpa cu a ningzak ih inn sungah a lut sal. Fala nu khal a ke na a zia um deuh cun inn lampan in an unau hnihten an kir sal. An tin hnuah tlangvalpa cu a ra suak sal ih a pahngah mi fala nu dunglam cu mitmu pawt ko in an liamhlan tiang a cuan.

peh vivo ding mi a si.....