Mino le kan tuanvo

Milai kan semsuah ihsin tong timi kan nei. Miphun pakhat ciar in tong timi ka nei thluh ih ca timi khal kan nei. Miphun pakhat kan si cun ka neih ding hrimhrim an si. Asinan kan tong le calai ah thindi riam thiam lotu kan tam zet. Kan thindiriam loh mi bet le hawl tum sawn loin siar tlak lole zir tlak lo ih ruahnak a um tikah miphun hrang thil poi zet a si. Thangthar tampi in kan tong le kan calai siar tlak lo, a famkim lo tin an ruat. Kawltong, mirangtong pawl kan duh ciamco.

Hnam dang tong kan duh le kan uar men cu a poi tuk hrih lo. Kan tong kan ca kan hnawng hlan tiang cu ! Thangthar tampi cun kan tong le calai famkim lonak bet le fimkhawi tum sawn loin a siar le a zoh khal huam lemlotu kan tam sinsin.

Kan pupa thuanthu ah kan calai neih mi uico in a ei tin kan thei ringring. Tu sanah teh zo nih in ei sak ding. Kan mah mino sung lala in maw ei siat ding. Kan ei siat lo hmanah ka hnawng ral tum tla si na hlam.

IT sanah kan ti ih website le online parah ca phun kim kan thlah. Kan tar rero laiah hrekhat mino in kan tong cu ka siar paih thei lo. Asilole, kan tong a famkim lo tuk ih mirang in ka siar theh zo. Online in thuthangpawl ka siar ringring titu pawl hi teh ziang vek thinlung le ruahnak an nei ding timi tla ka rak ruat buai riangri theu.

Kan tong a famkim lo tuk titu pawl hrangah suhnak malte neih ka duh. Kan tong in ‘tluahtli rero, tlawk burhbo aw hlah’ ti vek hi tongdang in in lehsak thei kem maw tivek tla suh ka duh theu. Kawl in bawah(life) timi a famkim in a tawi tuk titu pawl hrangah kan tong mawiten Nun, ka nun (my life) ti teh a tawi famkim ve ko lo maw?

Mirang in Nutural timi khal hi kan tongmawiten Pai kut suak (Pathian kut neh) tin mawizet kan neih mi pawl hi an rak thei ngah ve lo tla si ding.

Hnamdang pawl in Numi relnakah tongfang tampi an nei ve. Kan tong khalah tampi a um. Nunau, numi, fala, lengdawh, lengnu,nu..tvk, tampi kan nei ve. Kan tong a famkim lo a si lo ih kan tong kilkhawi kan thiam lo sawn a si. Mirang in Gay an timi mipa nunau vek ih um khi kan tong in Pathai kan ti. Cuangte thei cuca loin kan rak thlawk burhbo tla si na hlam!

Tu baite ah Lal le Bawi ah nasa zet in group mail sungah an buai celcel. A hnok in a  hnok. Kan khua tong lawng Falam tong ih kan ruah sung ahcun kan buai ringring lai ding. Falam khaw sung tong hi kan Falam tong a si tin kan ruah khal a kim thei hrih lo.

Upa pawl in an rak sim theu mi ‘kan ni cu kan thil tha hmuahmuah hnam dang kan then thluh’ an rak ti ringring. Adiknak tampi a um.

Kan tongtha le mawi pawl hiten ziangtin kan kilkhawi ding. Ziangtin kan humhalh ding? Nitin kan tong men in a fimkim thei lo. Kan tong ih cangan mi pohpoh kan siar ding. Ruahnak kan pek ding. Na duhdan na rel ding ih asinan na duhdan le na theih mi lawng kha a dik bik vek in ruah lo ding.

Pil tong (mai khaw tong) lawngkha  famkim thei lo ih kiangkap (khaw dang tong) pawl khal kan ruat thiamsak ve a tul. Pupa tongthim le pupa tong mawi zetzet neitu miphun pakhat kan si. Kan tong neihsun pawl kan kilkhawi ih kan tong kan karh zai thiam ahcun phunsang tlawng zir thei ding tiang ca le tong kan nei lai ding.

Lente, Zangiat, Ngawn, Tlaisun, Tapong… tvk tong lak ihsin khal in kan lak thiam a tul. Ziangah tile an ni khal Falam timi huangkulh sung ih um an si. An ni khal Falam thotho an si timi pawl hi kan theih thiam a tul zetmi a si. Curuangah Falam tong kan ti cun a peng sung ih um hmuahhmuah a tel timi kan fiang khal a cu tlang !