Duhdawtnak khawthim Part 6

                                        Duhdawtnak khawthim Part 6

January   7 ni……      
Tlawngta pawl cu air- con bus sungah an khat tiam tiam. Tawngphila zin tek in Hre te khal a rak bawh ve. Tlawng fehnak bus a hmuh ve ten man hlap zet in a kai. Tonak a co lo ih phar kai in a ding teng teng. Air- con bus an to nan rei an to hlan ah angki tang cu a ciar thlep thlep. Air-con a dai tuk ih an  ciar cu asi lo. An tam tuk ih mit thep fuk fo nak ding umlo in an khat. A to dah lo pawl a si ngel cel ih a pum sung in a dangah  ziang si maw hnawh  so tu a nei . A lung ci a mitt um. A mit men a ti ria ria thluh. A ding khal ding tha thei nawn  lo in mi dang a hngoh san. Kawl, nu thau deuh lam a si ih a rak kawk bet. Thih tan in phar cu a vawk ih tlawng inn cu a thleng thei.
 Tlawng inn bus cawlh hmun an thlen ve ten,taw lu thei lo in an tlan suak. Bus par ihsin a ke khat lam a tum zawngah  a khat lam tu cu midang in an rak pal sak . “Phuk…..” a ke dam hri a cat. Poi hrih lo. Hram rul deuh nak a hawl. A hmuh ve ten a tlan tur to ih. “Awk~~ ……Ok~….. Awk~~…..” A mit hmuah a sen theh. 

Tui zing thawh hlam a ei tak a cem thluh zik. A cil hnang pawl cu a angki in a hnul fai. A dang a thip tuk ih  dai hawl dingin dung let a her tum  zawngah   aw a thei.
“Hre te , ziang na cang?”
Dung her ngam lo in a kun sal. Zo saw, ka hming i thei tu. Nu nua aw le a si fawn . Nute aw vek a bang. Nute a si ding cu a zum ban si lo. Nute khal  sisehla   tu vekih  hmai tonawk ding cu a duh ve ce lo.
“Hre te, ziang na cang,  na  pum na maw?” Na nuam lem lo maw? Tiah aw in a sut bet.
Zoh lo a tha   nawn lo . Thih le thih , nun le nun tih a si kha. Pa can a cuh ih dung let hawi dingin a kam a hnul  sal. Dai khuat khat kengih ding zir zi fala mawi  te pakhat cu a hmu nan ni in Hre te mit a sun ruangah a hmel thlam lawng a hmu thei. A luak nakah a tha cem duah do thawn a hmu fiang thei lohli lo. A mit a nuai sal ih tha ten a zoh sal hnu lawngah a hmu fiang thei. A zum cia le a theih cia vek ngai ngai in hnih zawng ih biang sum mawi te nei tu Nute a si ngai ngai.
“Ziang na cang? a vei thum suh nak,
“Umm….ee…...”
“Bus na ri maw si?”
“Umm….aai…..ka luak!;
“Na tak sa maw si?”
“…..Aai…..;” tong ding a thei lo.
“Maw ,..tha ten i sim aw.”
“Aw …,  bus ka ri ih ka luak, ka ke dam tla a um nak ka thei nawn lo , khat lam lawng a tang,” tiah kun nger nger in a sim.
“Kha …dai in aw,”
“Lungawi…..,” a  aw a suak fang fang.
Dai a in theh in a hnap a hnuk ih khat lam a her sal. Aduh er kheng in a hnap a hnit sal. “Thlawr….;…..Thlurh …...tu lawng ah zang vuar vi in a thei aw.  Asinan   pakhat a tang lai. Ake dam hri cat. Christmas lak sawng ih a pu pek mi ke dam. Tam a hruh hlan tlawng inn ih a voi khat hruh nakah a hri a cat. Khat lam tu cu a hmu nawn lo. “Ziangtin ka tuah ding,” inn ah ka kir sal le a tha sawn pei maw, tiah a thin lung ten a ruat.
“Ra aw kan feh ding,” Nute cu a feh tum zawngah,
”Umm….rak feh aw, ka lo thlun ding,” a ti nan a din nak kel ah a ding lai.
“Ra aw,  na ke dam cu khi tawk “bayakyaw” dawr  nei tu pa tuah ka fial. A theh cing ding; tiah a sim fiang. Duh dawt nak le zangfah nak ih khal Nute ih mit hmai pan te cu  Hrete in tha ten a zoh. Amah le mah a zum aw lo. A awm a cum aw. A mang si lo in a ngai ngai a si fawn. A  par ih hi vek lawm mam ih tha rualpi a tong dah lo ih a lungawi nak van a tong. Asinan “ bayakyaw ” a ti mi kha a thei thiam lo. “Hi vek tlawng innpi ah ka ke dam tuah nak a um si ding ,”tiah a thinlung ten a ruat. A sut ngam nawn lo. “Thu na duh, na aa tuk aw ,” a ti ding a phang ve.
Tong lo in Nute ih dung cu a thlun.  Bayakyaw  dawr ih to Nute ih rualpi pawl in an lakah to ve dingin  Hrete cu to nak an pe. Nute in a khuat san tak a pe sal ih ke dam khat lam tu khal an rak theh zo. Ke dam kengin  a ra suak sal ih Hre te cu a pek.
A mang a bang tuk nan ziang khal sut ngam lo in  a to men. “lungawi….”tih lawng cu a tong kam thiam mi ah a cang tum.
“Kan kohhran , Pu Kap Thio tei inn um,a si hi , a hmin cu Hre te an ti,” tiah a rualpi pawl thawn thei ter awk nak a tuah sak.

 “Aw …singai….ziangah na khawm dah lo maw?” An lak ih thau deuh hlum deuh  Thluaipi in a sut hmai sa bik.

 “Khawm dah lo”

 “E,…Hre te, sabuti  na ei pei maw?” An lak ih tawl bik Mawi te in a sut sal.

  A cui  bayakyaw   lala ---.An ei tak le sang kio.  Bayakyaw  cu ke dam tuah tu maw, ziang saw a si ding. A ruat buai. Tlangval  pakhat, Phun sang tlawng thleng ve zo in  bayakyaw  thei lo ih um ding cu a duh ve celo. A suh lo le cu a thei si lo. Suh ding cu a ngam hrut hro lo. Poi lo, tuizan le Lian Dum ka sut ding. Tu cu duh lo ka ti men ding; tiah a thinlung ten a ruat suak pup pi ih, “Duh lo….,”tiah ring  nawn in a au suak  lohli.

pehlai ding... 

Ngantu Salai Mitthli