Letpanchuang luhnak catar 

Kan seherh dingmi Letpanchuang khua

Letpanchuang khua hi Tahan khawpi ihsin North lam ih um a si. Tahan thawn peng 9 hrawng ih hla aw a si. Letpanchuang khua hi khaw dang pa nga thawn peh aw mi khawte pi khal a si. Letpanchuang khua lawngah inn 4,000  hrawng a um ih suakthuan tlawng (high school ) pakhat, hramthok tlawng pahnih a um. Bazar tum ngaingai a um ih leknak bualrawn 3 a um. Sii zung khal a um. Chin hnam phunkim tlangleng khawmnak a si ih khaw sung cu group 5 in an qhen.

High School le bazaar cu khaw kiangkap khaw 15 hrawng ih pan mi a si ih bazar tla cu sunvu ten a qhing dah lo. Tahan le Letpanchuang karlak cu zing ihsin zanlam tiang motor tlan a um ringring. Cimi lai lakah bike line tlan khal cat lak loin a um.

Ziangah Letpanchuang khawte thuhla a rak ngan ciamco tin tla nan rak phun men thei. Kawlram cozah dam hrampi sungah khaw sung mi 5,000 an kim cun cozah theihpit mi khawpi (town ) ngah a thei. Cu laiakah Letpanchuang khua cu a inn vial hmanah 4,000 hrawng a si. Myone pek si sehla a kiangkap khaw peh aw pawl cu veng ih qhen cih a si ding ih inn thawn sawmtelah a suak ding. Letpanchuang khua le Ing Gyin Khung a peh aw ih Ing Gyi Khung le Lunghawh khua a peh aw. Lunghawh le Tayakung a peh aw ih Pyitawta thawn khal a peh aw vivo. Pyitawta khalah tlawng inn tum ngaingai a um ve. Cun Letpanchuang le Zonuam a peh aw ih Zonuam le Haikhawl khal peh aw thei mai dinhmun a si.

Letpanchuang in khawpi sinak co sehla cu laitlanglam khawpi hnak in a cnagvai thei deuh ding. Ziangah tih a sile tu ih tlangqong an hman bik mi cu Falam qong a si. A hlanah lusei qong an hmang deuh bik nan tu cun Chin qong rori thiam thluh a si. Tlawng inn le bazaar ih an hman bik cu Chin qong a si.

Letpanchaung khawpi sinak co sehla Kalaywah thawn direct feh thei ding in lamzin kan sial ding ih Kalaymyone pal a qul nawn lo ding. Cu tikah Tahan lam khal an ra tlawng ding ih Tahan khalah kan tlawng ve ding. Cumi lawngah lairawn ih um Chin mi pawl kan kal a cak ding. Lairawn um pawl kan kal cak thei cun Falam khawpi hman kan cawm riangri thei ding.

Letpanchuang khuaah tlawng innpi qha a um nan zirhtu qha(tlawngta duhsaktu cozah tlawng saya) an um lo tin tu baite ah thu hla simtu ka nei. Asinan boarder le hostel qhaqha tampi a um ih ka thin a nuam deuh sal. Fimthiam zirnak lam khalah hnuk tlai lo ding in kan zuampi a qul.

Cozah thuneitu lam hnenah khawpi ngah thei ding in nor dan a um pei maw? Tin tla keimahten ka sut aw rero. Cule kan thei dingmi cu Letpanchuang ih um pawl cun hmundang kawllak kan um tikah Chin ram in ka ra kan ti tlangpi qheu. Cumi cu ziang a si tile Chinfa kan sinak le kan umnak hmun le ram hi Chinram a si zia zo hman in kan palh lo ruangah a si. Letpanchuang in khawpi sinak co bang sehla Chin miphun tampi kan hlawk sinsin ding timi tla ka ruat. Asinan kawl biaknak phungkhi hmun khi cu a siatbal thei dan um sehla qha ka ti. Ziangah tile man pek um loih an sak mi hmun le ram a si. Himi kawlbiaknak hi 2002 kum kiangkap hrawng ihsin an sak mi a siih tu hlan ahcun khawpuai tinten kan tuahnak hmun awl tum ngaingai a si. Ziang le khaw le cozah hminsin mi khawpi pakhat a si ding hngak cuahco pah in..