Duhdawtnak khawthim part 7 

Luai Dum hnenah cun bayakyaw timi cu sut fiang ding in zan riah khawh veten a thlan hlo. A ka in  bayakyaw … bayakyaw ti phah in a phun phurhpho. Luai Dum cu zaute ah to in a rak to liarliar. Hrete a hmuh veten nonak a rak kian ih a kiangah a to ter. Hrete khal cu a thawsa khal reh man loin “Luai, bayakyaw an timi hi ziang si?” tiin bul nawn in a sut.

Luai Dum cu a mangbang in a mitmen a danglam vukvi. Hrete in a ti hrimah a ruat ih a thinheng zik. “Ziangah cu lamlam?”

“Ka thei duh ih cunah” a theih lo thu a sim hnu lawngah a simfiang sal.

“bayakyaw timi cu sangkeu a si bik ko” tiah a rak sim.

“Aw, a sile cu tu sun ih an ei mi kha si ko ding” tin a mahte tong vek in a phun.

“Ziang tin e” Luai Dum cun a sut sal.

“Aw, tu sun cu mawtaw ka ri ih cumi kha Nute in in ra tuam hlawm. Cule a rualpi pawl lakah in hruai ih a rualpi pawl in “bayakyaw na ei ve duh maw, in ti, bayakyaw timi kha ziang a si ti ka thei si lo ei duh ka ti ngam lo ih cu nah ka lo sut” tiah Luai Dum cu zoh kerker in a sawn.

Luai Dum cu a mangbang deuhdeuh. A mitmen a danglam vivo. “Ziang tin e, Nute in a lo tuam hlawm ih a rualpi lakah a lo hruai maw! A va mak ve!” tian Hrete ih liang cu thing phah in a au.

“Si e, ziangah maw cu lawm mam na mangbang”

“Mangbang tuk, Nute in cutin tlangval a biak dah lo, amah duh ih heltu pawl hman a nu le pa hnenah a sim ringring ih zo hman an ter ngam ngut lo. Kan Pastor fapa Mangte ti lo cun!” tiah a sim bet.

“Mangte na timi cu zo vek si, ka theih mi si kem?”

“Tu zarh kan khawm le ka lo hmuh ding?”

“Ka khawm ngam lo, Nute a khawm ve pang ding?”

“Khawm ding e, an ni cu an khawm ringring. Pathian maw na tih Nute?”tiah bul nawn in a sut.

“Ka tih dan a bang awk lo” tiah Hrete cun a el tento thei lai.

“Thai zing cu kei mah in ka lo thlah ding. Lole cu man malte man na ri lala pang ding” tiah a capoh.

“Poi lo, ne ta le cu ka ri nawn lo ding ka zum, thlah duh hlah, kei mahten ka feh ko ding”

“Ka thei, na ri lala ding ih Nute in a lo tuam hlawm na beisei si kha” tiah a ti hrim bet.

“Lamlam” a ti ih tin ding in a kam.

Zingpit ten a tho ih mani lam ih mawtaw bawhnak Taungphila zin tek ihsin cu a rak bawh lala. Mawtaw a ra thleng cu a parah a to khat tiamtiam zo. A dungah mallai dingnak a um. A tlawngtlai ding phangah a kai thotho. A hmaiah kawl fala pakhat a ding. Kawl fala ih lu le a hnar cu a zawn aw cekci. Kawl nu sam cu thla thum hrawng kholh lo ih a uam mi khi a bang. Lai lam pitar pawl ih samrim hnak in a tak deuh. A kut khat lam in le mawtaw tlang cu a vawk tengteng. A ke khatlam cu retnak a um lo ih khat lam lawng in a ding. Khat lam cu thlilakah a zam rero. Thli in a semna deuh ih a hni fentak a phawih zik, a kut khatlam in a hni a kai, khat lam in mawtaw tlang a vawk. A hnar cun kawlnu sam rimsia a hip rero. Culaiah mawtaw khu a hip phahphah fawn. A hrangah cun thih te rori si ko. Phunsang tlawng a kawi lutnak ding hmunso te ah mawtaw a kual zawngah Hrete cu a lu a zing cumco. Tlawngta si lo mawtaw totu pawl cu an tum ih an thilri pawl an thum theh cun tlawngta pawl cu an thawl huphi. Asinan Hrete cu to thei a si nawn lo. Ti vate kiangah a va to ih a duh er kheng in a awk rero. Thlapi le arsi pawl cu an phe cupco vek in a mit tiang a rau thluh.

Ziang thluk rei a kun ti a thei awk lo. A dunglamah nunau tong awn thawm cu a thei ih dunglet her ngam loin a kun kel in a kun ngernger. Thei lo vekten an thlan hlan locu a kun tum tikha a dung fala um pawl cun an thei ih an mah sawn in an va naih. “Hey.. Hrete, hi tawkah ziang na tuah rero?”

“……………” ziang khal a sawn thei lo.

“Maw.. ziang na tuah, na luak lala maw?”tin fala aw mawi zet cun thinphang aw zet in a sut.

“…………..” fala nu aw ihsin Nute timi kha a thei cih ih ziang khal sawn ngam loin a kun ngernger lai thotho.

“Khah dai in aw, theh le ka lo phur ding” tiah a kiangah to in a hngak.

“Nute, kan tlai pang kei, ra aw kan feh ding”, tin Nute rualpi pawl cun an sawm.

“Aw, in rak fehsan men uh!” tiah rualpi pawl cu zoh cuang loin a sawn ih an fehsan. A rualpi pawl cun mangbang hehe in an zoh in an fehsan. An feh phah in Nute ih danglam dan le Hrete par ih a that lawm mam hi an mang a bang theh. Mipa hrimhrim bia dah lo le bia tu um khal ih nu le pa hnen ih thlen ringring theu an rualnu Nute ih thinlung cu  an thei thiam thei nawn lo a si bik.

Hrete khal cu a lu zing le luak thawn a mahten buai pit tawp in a rak buai ve. Nute pekmi dai cu a in theh in zinkap ah a ra to ih a kam pawl a hnul fai.

“Ka lo hmai sawng tuk. Tuam hlawm cawp ka tul ringring ih ka ning zak.” Tiah kun ngerngi ten a tong phutpho.

“Hi vek cu ningzah ding si lo pi, kan ni khal mawtaw todah losehla cu hi vek in kan um thotho ding, ningzah ding a si hrimhrim lo”, tiah Hrete ih kiangah to phah in Nute cun a hnem phah rero.

“Na luzing a reh le cu kan feh ding, lole cu tlawng na tlai ding ih a tha lo”, tin Nute cun a sawm.

Nute dungah cun a to ih tlawng inn pi lamin an pahnihten an feh.