Ka sunmang neih sun

      1

Kan khua le kan inn cu kum 5 lenglo ka suahsan hnu ah ka pai inn nuamte pan in ka tlung sal. Ka khual tlawngnak le ka tuah ka tuannak ah hlawhtlingnak ngaingai ka nei lo nan hminsia le thangsia cun ka um ve hrih lo. Kum 5 sung khua ka suahsan ih ka ra kir sal cu nau le pawl an tlangval in an rak fala zerzer zo. Ka khuhhri rual pawl cu nupi fanau thawn hnawk celcel in an um fekfek thluh. Asinan ka thinhna a ngam deuh mi cu ka rualtha zet Sumte in nupi a rak nei hrih lo mi si. A ni tiangtiang in nupi in neihsan sehla cu ka ra tlung ngam nawn lo ding ti tiang in ka ruat. Khawte lam ti fam cu an fala tlangval zik fang maw ti cun Christmas le kum thar boruak khawdaiah nupi pasal an nei cece men.

Khawte um tla hi a nuam ve ngaingai. Thei ding le hmuh ding a tam lo nan um har timi a um dah lo. Um har zik ngiangngo a sile fala inn ah leng in sunvu te to a ngah. An mi mitkem mi kan si hmanah thaten mi an biak. Tongkam sia thawn mi hmuaktu sawn kha an hminsia bet lai. Fala lai ti famcu an hminsia ding phangah an mi duh lo cingten tongkam sia in mi an biak ngam lo. Kan ni tlangval hrangah le hmai hngalnak!!

Asinan pasal an neih le veten a lengtu le a hnak ih upa tlangval hmuahhmuah cu a nau le khukhri vek in mi a zoh lala. Mah hnak ih upa mi rori tla, “Nupi nei thlang awla…” mi an hei ti sapbei. Hrekkhat tong thei deuh tla cun “Nauhak tete, tha ten nung aw…” mi an ti bet. Fakhat neih veten an mah le mah cu kum upa pi vek ah an ruat aw sual.

Khualtlawng tlungpek cu an sunglawi zet theu. “Na khualtlawng tlun veten nupi thi aw”, tiah capoh awknak tiang a um theu. Ziangah tile khua le ram kan suahsannak a rei cun mi khual vekah kan cang ih mikhual timi cu zo hmauhhmuah ih zohthat le biakthat an si. Mi lak khalah langce a awl ngaingai. Thuamtha hrut sehla fala pawl ih mit a la duh zet an ti. Curuangah nupi ding mitmei phah in khua tang rero a tul.

Thlakhat lenglo lai inn ah cun ka um huahhi men. Lo hnatuan le tuan kupkap thei lo. Sumdawng a sile mi bang ti nei lo. Fimthiamnak lamah le rual le pawl in in hlawih thluh si. Inn ih rawlsuan le zial rawt lo bang cu tuan thei le tuah thei ka nei lo a si bik. Mi rinsan ding ih ka um lo sapbei ah ka pa in nupi nei tlang aw tiah in fial leuhleuh. A thak lo pi lu kheuh rero a tul.

                                               2

Zing khawvang hlan ih Bazar kai ding feh pawl tong thawm le feh thawmah tuanten ka thang ih ka tho. Tuah ding ciamco ka neih lo rungah inn leng tokham sau ahcun mi veivak ka rak cuan vivo. Hrekkhat thirleng thawn bawr liailiai in an phur ih hrekkhat pawl cu an lu, an liang le an kut pawl lawng loin thil an phur ve. Hanghnah hangrah khar ding(leisak thluh ih zuarsal ding, phohte zi) rak bawh tengteng khal an um hnuaihni.

March thla thok fang a si ruangah khua a dai tuk nawn lo ih zingpit taksa cangvaihnak tuah ih tlan rero khal a um cuci. Kan inn hnen pathau hnunhni pa tla zingpit taksa cangvaihnak tuah in a her nuaihno cu hla ral ihsin ka hei hmu thei.

Cuti ka to cuahci laiah kan inn kiangte ah thil an lei aw rero cu ka hei hmu. A leitu in,

“A zaten ka lak ding si, in thum deuh awla”

“Ai… cang thei lo e, na duh lole cu kei mahten ka zuar ko ding”,

“Silo… ka lak ko ding, nan mallai cu in thum awla, telkaht ziang hmuah in na zuar tum”

“Ka thei cuang lo, bazaar tla ka thleng phawt ding ih……”

“Ka lo dilnak vek in i pe ko aw…..maw….”

“………………”

“……………………..”

An tongmi zaten cun ka thei ngah thei lo. Cuti an biak awk rero laicun khau a vang vivo ih an hmelkhal cu fiangten ka hei hmu thei tlang. A zuartu cu kum note khi a bang, zingpit a sinan a thlan cun a angki a hnawng ter mi a zangcin cu fiangtuk in ka hmu. A rak leitu le bazaar sung ih hminthang anti mi Pi Tial hi a rak si. A phur pawl cu a zaten a thum ih pakhat tete an siar rero. An siar theh in an san thluhsal ih thirleng thawn nuamnai ten bazaar lam pan in an feh netno. “Fala note asinan ningzak loin bazaar sungah thil tla a zuar ngam” tiin ka thinlung ten ka lawm rero. A pumrua khal a tha ih, a taksa khal a eng zet. A hnar cu mawi tawk in a kawng ih, a hnih  zawngah a biangsum a lang, a khabe le a hmur cu naute vek in a duh nung. A hnih zawngah a mawinak cu fiangtuk in a lang sinsin. Nan hi nu hi veikhat hman ka rak hmu dah mi a silo. Bazaar pan ih an feh cu an liam tiang ka rak zoh duahdo.

Bazaar ti fam cu tong a phunphun tla theih ding a um. Tong sia, tong tha a phunphun cu bazaar sungah a leng kual rero. Sangkiaunak lamah cun tong hi ralrin a tul zet. An khawng duhtukah “Na ra cawl lo ding maw? Tu tum ka sang cu a thaw ce……” ti bang pawl. Arsa sawhciar zuarnak lamah cun a dan a dang deuh. “Aih.. khui lamah na hlo, ra to hnik, tu ni ka arsa a thaw zet ho khaw?” ti vek in khualtlawng tlung mi an lawm vek khi asinan an hnen ih to tengteng tul in mi an tuah thiam. Hanghnah hangrah zuar pawl a sile, “Tu ni rori ih lak mi a si ih a thar hlam tuk, hi vek ih thar hlam cu na hmuh lo ding”, tin an mah rori in khen sungta an va lak mi tla khi a bang thei zet. Cuvek in a mah le zuarmi cio ah thiamzet in an zuar celcel. Fehnak zin bek betbet cun thin a theu duh nawn …

Tuah ding dang cuca ka neih lo ruangah inn leng ahcun rei nawn ka to. Ka rual Sumte in zing thawh hlam ei ding in ih ra sawm ih bazaar lam pan in kan feh. Tu zing ih ka hmuh mi nute cu ka mitthlam in a hlo thei hrih lo. Veikhat te hmuh sal sehla ka thin di riam ding nan tin kei mahten ka ruat rero. Lahphak dawr kan thleng in kan to ih ka in ding le kan ei ding mi sang cu kan cah. Kan thil ei ding mi a ra thlen hlan tiang kam khat hman tong lo in kan to cuahci men. Cu laiah “Rual, ziang na cang, na tho tha lem lo bang!”

“Tho tha nan, tu zing ka thil hmuh mi in ka thinlung ih hnen tuk deuh e…”

“Ziang hmuh tha lo saw na hmuh”

“Aih… hmu tha lo hmuh cu a si lo, hmu tha ka hmuh sawn ruangah si…”

“A cui hmuh tha hmu rori, ziangah kha tin na mithmai a um”

“Ziangtin saw, ka mit hmai cu a um?”

“Mah le mah cu ziang tin na thei awk ding, na hmuh mi cu ih sim ve awla”, hni suamso phah in i ti.

 “Tu zing ka fala hmuh tak nute, hmuh sal ka tum deuh nawn ih cunah ho khaw”

“Aih.. khui lam fala saw na hmuh ! Cunah si tho ding zinpi lam hawi ih na bih tengteng….!”

“Si hlah ee…..”

“Zo vek si… a pum rua i sim ve awla…., ka theih mi tla a si pang men thei….”

“Ziang le lam……”

Lamzin lam cu ka bihnakah kan thil in ding ra thleng khal ka thei lo. “Kha .. in ta aw, a dai thluh ding…” tiah ka rual Sumte in i sim hnu lawngah ka mang sal.

Thinsau cu hlawhtlinnak ih hram an ti bang in rei nawn ka bih rero hnuah tu zing zingpit ih ka hmuh mi fala mawite cu a thirleng nawr phah in bazaar lam ihsin a ra suak. A kiangah a rualpi pakhat thawn kan lam pan in an ra. “Sumte, khi mi a sang sawntu khi lo ziang, tu zing ka hmuh mi fala cu ..!” tiah phur nawn in ka hei sim. Cui fala pahnih cu kan lam pan in an ra vivo ih ka tonak dawr sungah an ra lut ve. Cabuai lawngah an to ih an pahnih in thu nuam an rel. Lahphak khuatthum an cah ih ka mang a bang deuh. “Mi pahnih lawng to ih lahphak khuatthum cah cu” tiah ka thinlungten ka rak ruat buai nawn. Sumte cu a tonak ihsin a kam lohli ih fala tonak cabuai lamah cun a feh. “Hi pa theu le, ningzak a nei lo maw si? Thei lo pi in a va biak tum lala si ding”tiah ka thinlung cu thlaphang nawn in khua a rak ruat buai nasa.

“Na ra bazaar maw? Ziang na zuar?” tiah Sumte cun a sut hmaisa.

“Aw, tu zing ka nu le lo an feh ih an bazaar man lo ruangah hanghnah zuar phah in ka ra bazaar duak”

“Aw, si ngai, fala mawite ih thilzuar cu na khawng theh ol zet bang ual”

“Ngeh… in khar thluh mi cu….!”

“Aw.. si maw, ka tonak ka ra cer ding….” A tiih a khuat le sang pawl cu a ra lak sal. “Ra aw!” I ti ruangah lungphu rang nawn in ka kam ve.

“A ni hi, ka rual Thangte a si, Thangte a ni hi Parte an ti(ka uar mi nute)ka pu ih fate a si, cun a rualnu hi Sungsung an ti”tiah ka rual Sumte cun ka thinlung thei zet in theihter awknak in tuahsak cih. Cu zawngah Parte ih kut cu ka kai ih lunghmuiten kan cibei awk. A kut nemte ka kai ngah cu ka taksa pum in a hit curco man. Meitha in ih hip khi a bang!

Parte cu hlaral ihsin ka zoh rero hnak in naite ih zoh le a mawi deuhdeuh in ka thei. A mithmul umdan cu biazai ngan thiam pawl khal in an ngan suak thei lo ding ti khawp in a mawinak cu a lang. A ha var note pawl tla cu innsak thiam in duk er kheng ih a rem mi khi a bang. A liangpar ih pho aw mi a sam mawidan tla cu Lainu ka hmuh lakah a mawi bik ding. Hna tuan lawzet ti a langnak cu a kut thahri pawl an lang zet. Asinan a thianghlim zet fawn.

Cuntin cabuai pakhat ah thu nuam rel in kan to. A hmel mawi ka zohnakah can a liam khal ka thei lo. Ban par ih an tar mi nazi pi cu ka vun zoh cu 9:00 am a rak ti zik thlang. Parte tei rual vah khal tlung ding in tim an tuah aw. An kam zawngah “Kha ti lawm mam in, I zoh nawn hlah maw, ka ningzak ve thei ho khaw”, tiah hni lo tla in a tong ta. A tongmi cu ka ruat rero ih kei mahten ka hni hruthri. An liam hloh tiang ka zohnakah ka hngawng hmuah a sau thluh tum. A cui sun cu sun ni hlawk in ka kek suamsi ringring in ka thei. Zan a si ding ka hngak hlap tuk lam ih ni a sauce vek tla a bang lamlam.

peh lai ding.....

Ngantu Salai Mitthli