Duhmi na siar ding

 Ziang tikcu caanah kan ton aw sal ding tih theih lo “ Duh Mi” ra kir sal aw. Nang ngai ruangah maw khuazan sing thiam loin ka um. Kan tonawk sal thei ding ni cu kut zung khiak ih siar rero cingin caan timi khal a hngaktu hrangah cun nuam nai ten a her ti’n mawh nei lo ka puh mawh. Thlanglam in a suak ih saklam ah a liam sal qheu mi ninu cu thin bang zetih siar in, Tui hnu veiziat a suak in a lutsal hnu lawngah nang le kei kan tongawk sal thei ding tih ruat in ka hngak hlap qheu.

Khi…….. a sang mi van parah khuaduur cu a fin aw khawm. Leilung parah vanruah cu sur tahrat in ka lungthin sungah duhdawt mi hrang ngainak cem ti a um thei lo. Sawmnak tel loin a ra thleng qheu mi ngainak lakah felfai ten na hlim hmel cu a hlan bangin ka hmu. Khui tawk ka thleng le ziang ka tuah khal le na phenthlam ihsin tlan suak thei lo tu maw ka si. Lamzinpi kap tinak na hruk qheu mi kerte senthawn nang ka lo tong pei maw tiah ka hawl thup qheu. Kan to qheunak pangpar hmuan ah ruahsannak thawn hngak in! Kan pahnih ten ih kan puah cok qheu mi le ken rem sal qheu mi cabu pawl lakah na zuk mawite tal na tan pei maw tiin pek le pekah ka hawl sal theu. Hmanseh, a liamzo mi tikcu pakhat ih qhinghrim hlei loah a net nakah kei mah pakhat lawng ka um. Kan feh qheunak lamzin hlun cu cuan in a thup ten lung zuur ka qahnak pawl tla na thei pei maw… Cui zanlam tluanah kan sulhnu keneh pawl an um. Hmanseh tuah cun zilthli nem lak ih vut nel pawl in cui keneh cu a cimciah qheh zo. Van thiangpar ih kan siar qheh mi siAr pawl tla an lang. Hmanseh zilthli ih lam hruai nak in khawduur pawl an khat thluh zo. Aw leitlun hmuah khal in sulhnu an malh qheh thlang ding maw. Nazi second cu pakhat hnu pakhat a tlan rero, saduhthah kim loin  ninu’n in liamsan. Rin loh ih ka ke kal cun kal khat hnu kal khat hmai a rak nawr rero thei suak in, dung let ka hawi vukvi sal. Ningzah in ka ke kal cun zawhte ek ka pal ngah lai lai. A rim nam nawn nan kei mah lo bang ten ka khawt rero.

                       Sang sin ngai nak le ruah nak thawn, a hnawn fang mi hram note, zilthli nem hrang caan ih cang diado mi thinghnah pawl lakah zoh nih ngai nak hla fing cu sak rero…? A kim zetmi hla fang pawl cun ka lungthin  muril cu I cawih rero.

                    Loney……. I’m Mr.Loney

                    I have nobody….to call of my own girl ( Akon Hla). Aw ring zet in  Ka hei au suak nan a net lam cun khui lam ah a liam ral tahai ka thei lo, kei mah lawngbaangzet in ka tang. Zilthli lakah ka hla fang pawl le vut nel pawl an zam an hlo. Qul lo zet in, thinghna par ih a tlai miarmo mi ruahti te cu pak zet in ka hai hmu. Hmanseh , rei lo teah a cui zilthli nem pawl hniksak nak ruangah tuarthei nawn lo’n ka hnawm fam mi leilung parah lak ding um nawn lo’n a tla hlo ral ta.

                   Aw…. A thim cuahco mi mero lakah ka hrang ih Arsi tleu mawi te cu nuam nai te’n a hlo ral cuahco ta ding maw… Tisuar a rat caan ih a siatral mai le ol-ai-te ih a hlo sal qheu mi vut nel lak ih zuk ngan tak bangin kan duhdawtnak cu sihram hlah seh maw… ka ruahnak le a theinak sungih na aw thawm, ka mit thlam le lungsung Ca-hmai parah na hmel le mawinak an khat qheh. Ka hrang I pek mi na duhdawtnak, nawmnak pawl tla ziangtin kimah a hlan bang in a thar hlam ringring. Na duh saknak ruangih nganmi Bezai, a mawi… mawi nak thawn a khat qheh mi duhdawtnak inn ropi cu ka sunmang ruahnakah a famkim qheh zo… Lungawi aipuang sim dingin – Nang Cuh!!

                  Tawnsal um nawn lo hmanseh ka leitlunah na phenthlarau a nung ringring ding. Na ann nem leh na qanghlum pawl tla zan a thawk le a cem nakah a hlan bang a nung ringring. Mipa paziat, veiziat na sim zo ti ka theih lomi “ I miss you boy” na qongkam pawl tla ka thinlung sungah a cam ringring. Ziangtin kim in ka ruahnak sungah tu hlan bang a kel te’n ka hmu. Ziangtik cu caan khalah!

                  “ Na hrangahcun maw… ti riaro lawngih eng thei mi sathau mei far bang ka nun hi tti ral ko hlan ngam tu ka si…..” Cumi cu, hloral nak ding lamzin sikhalsehla sualnak pakhat tin ka ruat sianglo… khuanu’ii  remruah saknak tilawng in….!

                 Zan cu a qim deuhdeuh cunka ruahnak sungah nang ka ngainak a thuk in a tam sinsin. Hmanseh, hi ka ngainak pawl in na hrangah that hnemnak  aneil lo ruangah ka tha a nau sal men. Ziangtluk ka qangih, ka zuam rero theu nan ngainak kar lakah tumtahnak si lo in kut cun hngilh a thei lo mi phone number 01******** cu a vun hmet suak sal pang qheu. “ Qut… Qut…” tiih awn thawn kar lakah ka lungtur cu fiangte in ka thei thei. A thim qheh mi zan cu  athuah sawmsahrih kaan in zilthli nem lakah thazaang mal cing ih na qong mi qong kam te cun ka hna ihsin a run pah tlangih ka thinlung sungah, lung muril tiang pah in I sun.

                Khua duur a kiang zo nain ka mit sungah khua duur dup hnakin tlak man sawn fim rialri te mittli cu a khat. Vutcaam hrek khat cun, “ Kei cu a hlan ah minung pawl ih hmur ah thawzet in ( ziangkhannak) ka si” Vutcaam dangpawl cun, “ Kei tla a hlanah cun a man khungzet mi ca hlap ka si ve nan. Nauhaak pawl ihin puah cawk nak ruangah hi tin ka cang.” a ti. A vei hnihnak ka van pawl an cem qheh sal ta. Ka lei khawvel pawl khal a cim qheh ih thlisia lakah ka pumhlum in ka fen qheh zo.

              “ Pasal a nei cing ding!”

               Ziangtik khal in manghmanah a tuah ban lo mi thu maw I sim. Duh mi…. na fim tuk ruangah maw? Kei ka aa tuk ruangah saw ka thinlung zate in a lunglet qheh hman ka thei thiam lo. Duh mi…. nangin I bum sawn maw,  kei mah ten ka zum sual aw si ding? Kan hlim tlang lai ni pawl ka hngilh thei lo.Duh mi… a lem men lawng maw I rak sim, ka lo uar tuk ruangah saw? “ dUh dAwt nak” qongkam kan rel mi pawl ka mang ringring lai. Duh mi….. na tum tahmi maw a si, ka thin nau tuk ruangah saw si ding? Qek tla bang na qong kam thawn a siat ral qheh mi Bezai le dawtnak in ropi pawl cu thlisia pawl ih a semnak ruangah zoh mawi lo zet in a siat bal qheh zo. A cip a ciar in a kuai qheh mi cu ka awm sung lungthin maw an si.

                Pil qheh ko ka mit kang sing ih ha cang rial hruphro hmanseh I sim mi rim nei lo thutiam pawl cun hliau hluah hlo’h alh in I kang ih ka ruahnak lungthin pawl tla cu vutcam bang an cang qheh. Duhdawtnak phenthlam pawl cu mei khu bang a zam ral lungzuurnak in a duum kiarki te ka mitthli cu a luan thlak tir. A nau zel mi lungthin pawl cu thuanthu ih a thok nak lawngah maw nehtu a rak si. Ziang hmuahhmuah hi a thawk te’n khir sal thei sehla. A cui thoknak cu ka hrangah a net si tir ka va dhu so. A tawizet mi mani pawl cu puhmawh rero cingin ka hrang thaisun cu ka dir. Hmanseh, ka hrangih thaisun pawl cun a kal thok nak ding lamzin a pit theh. A tlusia zo mi thaisun pawl cu cuan in.. tlak siat nak pawl hmuahhmuah in in qem bet qheh ta.

               Duat zetin ka khawi hnuah duhnungza thawn a rak par suak ding mi duhdawtnak pawl cu mawi zetih a par zik zawngah riahsiatza ih siatbal sak thu ka ruah in hlingbang I sun ka lungsungah. Riahsiat le lungkuainak pawl cu veikhat te au suak phah in thinhengnak cun phattlang cu na pi’n ka vun thong. Ka mitthli duum fim kiarki te cu qhep fuapfo in “ Zuntuar in nang ngai hmanseh a ziami qheh zo mi pangpar cu an vul sal thei nawn cuanglo.” Aww… zo hman theih loh te ih kho mi pangpar mawite tla a ziam sal tikah zo in an thei cuanglo. Cubang , zo hman ih theih hrih lo ka sinak pawl zate cu daiziar ten la kir sal in a lawng qheh zo ka thinlung sungah hngetzet in ka hreng bet. A net nakah cunt ha zaang tel lo le a fiang thei nawn lo mi ka ruahnak thawn ke zungpi hawi lam ka pan vivo. Ka thlengnak kipah nang ka lo tong pei maw tiin ruahnak ka nei sal qheu. Hmanseh a tanglai mi ka thinlung ruahnak cun “ A cang thei lo mi ruat rero hlah! Tlangsang parih sawkhlei le leipar ih vanim tla cu thil dang pi an si” tiih au thawn cu dim teten a thang ka thie.

                 Nang le kei cu a sang van parih Ni le Thlapi bang maw. Ziangtik hmanah komhaw thei lo mi thil nung pahnih kan si. Van parah an pahnih ten um tlang khal she nai te’h um tlang thei lo mi maw an rak si.

                 Hmmm… khi vanpar sir pawl lak ih pakhat a si mi Arsi tleu te pakhat kiangah a thupte’n relh thei ka duh. Nan, ka lo duh lo ruangah tiin ruat sianghlah maw, a kuai mi lungthin pakhat nei tu ih lungzuurnak lawng a si.

                                     

                                                                                                   A cem

                                                                                                      Dingte ( JZ)