Zarhpi Dairy 3

Ka ih khun lu ih ka tar mi nazi cu 8:00 am awn hrih hram hlahseh timi zumnak thawn puan sung ihsin ka bih dekdo. Ka ruahban loin nazi 9:30 am a rak awn ziar zo. Ka puan sinmi cu ihkhun taw ah ka sirh ih dai bualnak lam pan cun ka tlan turto. Daibual sangka ka nam zawngah a sung ihsin “Ka um lai, ka theh zitte “ timi ka U ih aw ka thei ruangah sangka kiangah ka va ding sal. Tlunvan ihsin vur tla (snow) cu mi thep loin ka bih ngernger. Nauhak tho hmu nei bang in ka to cuahco.

Ka tak ka kholh theh veten thaw hlam ei ding in cabuai kuhnak cu ka ong. Ong lo sehla ka hlawk deuh ding ka zum. Ziangah tile ziang hman khuh aw mi a rak um lo. Zing dang ih ka ti kel vekten dai khuatkhat cu rilrawng damah ka in. Zarhpi khawm awk ding kan si ruangah thuam ka tuah theh aw veten Biak inn lam pan cun kan feh. Kan feh tla silo ka to sawn. Kan biak inn khawm awk tla hi ka ning deuh tlang. Hmel hmuh bang lawnglawng tong awk khelkhel tin ka rak phun zai zik theu. Pathian biak tum loin fala lawnglawng ka zoh ruangah tla si men ding.

Biak inn sangka ka luh veten Pastor in a kut dai tiamtiam thawn in rak hmuak. Huam lemlo le paih lemloin ka hnih san ih tonak ding lam ka pan cih. A hmai tuk ih to tla hi calcang tuk kan bang ruangah hmaituk lo dungtuk lo ah ka to. Kiang le kap ka zoh ih mah le ruahnak cio in an to. Ziang thu le thu saw an ruah ding cu thei ve hlah. Ruah ding nei cuca lo ih um khal hi a rak nuam ve phah ko. Ruah ding neih mal khal hi dam reinak an rak ti kha. Rei ka to hlanah kan tonak hmaiah mipakhat a ra to. Malte a thau deuh ruangah a hmailam ka hmu thei lo ka phang ih a sir deuhah ka thawn. Ka tonak ding zoh loin ka tawn ruangah cekcek (PK) ben mi ka to nen ngah. A thok pek ahcun ka thei lo nan mi dang ka kiangah an ra to ih ka tawn awk sal lawngah ka thei. Huiha ! Malmak vialvo tin ka phun pherhpho ih zun inn lamah ka feh tum. Biak inn sangka ka ong zawngah mipakhat thawn kan pah aw bet. “Sorry” timi lawng in ngaithiam ka dil ih ka fehsan zik zawngah “Sorry, ti lawng ngah ding maw, nang mai ruangah ka ke dam hri a cat ual” tiah a ke dam hri cat cu a kut in a khih. Si ngai, a ke dam sang (ka pi ra tum duak aw ti ding khawp ih sang) cu peng riairiai in a um. Huiha ! vansiat le malmak !

Ka taw ih kawp cekcek khal ka mang nawn lo. Ka ningzak maw, khua a hlum tla ka thei nawn lo. Ka thaw a sa. Ka tlanhri a pawt. Asinan a leng ahcun snow a tla lai fawn. Tuah dan ding ka thei ciamco lo nan a ke dam cu ka lak. Ka khai, ka bih rero nan tuahdan ding ka thei lo ih ka ret sal. Ka liang cu lu dai zikte in ka khai so (ziang aw ti tha ka tinak ). Kan kiang ih lek nauhak pakhat ka kai ih labar (rubber) a nei maw nei lo ka sut. Van that, pakhatte a rak nei. A ke dam cu rem le rem lo in ka tawnsak. Huiha ! Hna khat cu ka theh sal.

Nan, himi nu hi ka theih dah mi khal a si lo. Zarhpi nitinten ka khawm theu nan hi nu hmel hi ka hmuh dan mi a si lo. Khui lam mi a si ding. Mi khual maw si ding. Cang thei lo. A umdan ka zoh ah mikhual cu a si thei hrimhrim lo. Ziangah mitu a hmin ka suh ngah lo. Ka taw ih bet cekcek cu ti dai thawn ka kholh phah in ka ruat. Ka thluak le kut khal daiten an cawl man dah lo. Tul thei ringring a si hi.

Ka taw bet cu ka zumhnak ih ol in a fai lohli. Ka tonak kel pan in ka fehsal. Ka tonak ah mitu fala nu a rak to. Tonak dang lawng ka hmuh lo (ka hmuh duh lo hrim tla si ding) ruangah a kiangah dai ziar in ka va to. In rak zoh ih ka zoh ve. Asinan a mitmen cu malte a rum deuh. Biak inn sung si losehla cu in deh duh men ding.

A mitmen rumpi cu ka hrangah zoh a nuam sinsin. Ka thinlungten mi dang ra to bet sehla cule a mah ka neih deuh ding tin ka ruah rero lai pacang (thau hnunhni) cu a ra to ngaingai.

Fala kiang cu ka va naih hruthro. Ka tawlh hrehhro. A takhrim khal ka hnim ngah thei zo. Hmailam ihsin thuthan le thusim mi pakhat hman ka ngai ngah nawn lo. Ka kiang ih to lasi vek mawi fala cun ka thinlung hmuahhmuah a luah thluh tum. A luah men lawng hman si nawn lo, a lak in a lak thluh tla a bang.

Ziangah cu lawmlam tla nan ti men ding. Lamlam, cumi hman in a daih hrih lo. A sam nemte cu tham ka hiar. Biak inn sung a si hrat. A hmin tla ka thei lo nan ni bang in a tleu ruangah Nite ka ti men ding. Si, Nipi ti ding lam a si nan Nite tin ka ko men ding. Khawm tiak lohli ka duh tuk thlang. Khawmcan a sau hleice tla a bang lamlam. Ka thinlung theu hi cu ! Sinan khawm tiak ding tla ka siang lo. Ziangah tile a kiang ih to hi nuam ka ti.

Khawm kan tiak veten ka suak ih sangka ri in ka rak bawh. Ka pah ngah mi fala a ra suak ngaingai. Rak biak ding lamlam, a zoh hman ka zoh ngam lo. Ka mit ka khup sualso. Ka thawhthawt cu a ring sinsin. Ziang ka cang. Mah pacang’ tin tha ka pe aw rero nan ka thinlung cu a zam thotho. Ral bawi Nepolean hman duhdawtnak huham ruangah a thia rero ka mangsal ih ka hna ngam sal.

Cutin bia ngah loin a liam zik ngaingai. A dung thlun cun cak nawn in ka dawi. A zawn ka tleng zawngah ka ding tum rero nan ding ngah loin ka lan. Aw kei pa theu hi cu !

A mah sawn riangri in ra biak sehla timi tla ka ruat lamlam. Beidon tlak nasa. Poi lo, hmaizarh tla a um lai pam tin khua ka ruat sal. Asinan hmaizarhah teh ka tong nawn kem maw? Poi lo, ka tong hmaisa bikah ka biak sal men ding” tin ka ruat ih kan inn lampan cun ka tlung miarmo.