Biazai pawl

Thu pakhat lo sim ding ka nei
Thuthup tla si lo nan
Zapi theih ding mi cu si lo
Asinan na theih lo le cang lo
Ziangthu saw? tin i sut hlah
Ziangah tile, a ziam ral pang ding
Demten ka sim khalah
Ringpi ka au khalah
Thei lo vekten na um ding 
Ziangah tile nang cu nunau na si
Asinan ka lo sim mi hmuah 
A dik, ka lungpuak, na hrang lawng
Curuangah na letnak anka ka hngak
Man hlap tuk tla ka si lo nan
Thei lohli cu ka duh tuk ve
Ziangah tile tangdang na pom ding
Ka phang tuk ve lala..
Ka lo sim thlang ding...thaten ngai
"DUAT..., ka lo duh tuk" !!!!!

Inn cak um loin ka sak
Thuam hrangah Pathian thu
A tlun cih dingah duhdawtnak
A phar dingah rinumnak
Zial hrangah zalennak
Luhnak sangka pi pakhat
Suahnak timi huatnak um loin
Sancem tiang beunak ding
Ruun inn nuam le sunglawi
Zohthim tlak inn sang hrangah
Nang ,lungduh, in sakpi ve kem??

Sun ni hlawh in na thu ka ruat
Na phenthlam in i ciah zanvar
Na sih ta mi hri phang a phelh
Ka peh sal tinten a cat ringring

Zawnruah thiamnak pawl an hlo
Ka khawruah mi pawl an ziam
Na phentlam cun i deng kuai
A netnakah vutcam bang ka zam..

Cutin kha tin ka ruat theu
A thok in tuahsal ka tum nan
A hrampi pawl tiang na phawng
Vanruah lakih biazai lawng a tang !!

Thu pakhat lo ruah ding ka nei
Thil um cia mi le um rero mi 
A cang rero mi thil a si ko nan
Thei na cing in kan palh mi a um.
Zing ni a suak ih zan lam cun
A liam sal miarmo theu 
Na thinlung cun a thei fiang ko nan
Na ruahnak sungah cun
Ninu pi in a vel rero bang
Thei na cing palh lo dingah
Ralringten ruat ciamciam aw!!!

Thin diriamnak tlang cu khui lamah
Saklamah maw tlanglam ka pan ding
I khih hmuhtu dingteh zo le pawl si?
Rawl le ti thawl thawn maw kan pok ding.

Hnangam daihnak ram pawl hi teh
Ni tlaknak maw ni suahnak lamah
Ka thei fiang lomi ram pawl ka lan
Hotu ka thun, dunglam kutsit in.

An palhnak le mawhnak a phah aw
Cumi thei cing in ka za ka bawng
A ne nawi ka khawm, hmin siatnak thawn
Ka riahsia lo, ka tuah zo mi parah

A thupi bikmi Pathian ka hngilh 
A phenthlam lawng ruat in hmai ka nor
A takram ka tlen cun ka hmu fiang
Ka buainak pawl zaten ka fiang vuarvi.

Ka um harphenah biazai ka ngan
A siar paihtu pakhat pahnih hrang
That hnem ding ka dutzet fawn
Ngan ding cuca le ka thei sal lo..

Ngainak, duhnak maw ka ngan ding
Tuarnak maw, lunglennak sawn?
Ai.. lungawinak bia ka ngan ding
Asinan ka lunghlim fawn lo..

'Ziang mi thu hla si ka ngan ding '
AW.. ka ngan ding ka mangsal
Cu tin ka ruah rero lai fang
Hi.. biazai pakhat a si zo ual !!!

Kha.. ka lo ngainak thu pawl
A sangsangten ka tar lang
Siar awla, hngilh aw hlah

Ka covo um sun le rothil sui
Cu hnak ih ropi le hlu ka nei
Van sang ihsin a tla mi ka dong !!

Ka lo ngainak hi a luar sinsin
'Na' ka ti bik mi le tuar har mi cu
Ka ngainak le duhnak na thei loh hi!!