Ka Tlun Zin

July ni 11 zing ka tho cu ka thin malte a harh vang deuh. Asinan zing dang vek thotho in ka itnak parah vei thum li hrawng cu ka her aw ta. Pom ding a um lo nan a um sun lukham sau cu ka ke thawn ka cep feufeu. Kum thum lai a rei zo mi ka phone sony ericson te cu ka zoh ih miss call timi te kha hmu. A tlun ih nazi ka zoh ih pakua a ti zo ruangah ka tho vukvi ih dai bual ding in dai bual innah ka lut. Zan pali ah UNHCR office thleng ding ka si ruangah ka phur pawl tuah ding pawl tla tuah hlohhloh a tul ding tiah ka thinlungten ka ruat phah vivo. Cu tin sunvu ten ka buai hnukhno. Van thatah rual pi le unau in in bawm ih malte cu ka buai a dem deuh. Sungkua, nupi fanau um lo ti fam cu!! Buai khal a dem deuh vek nan khua a har tum vek tla a bang zet.

Zan lam kau hrawng cun UNHCR office feh ding in ka pok hruamhro ve. Taxi thawn ka feh ih a hmun ka thleng veten a sunglam ah ka lut cih. Vanthat, kei mah lawng in rak hngak hi a rak si. UNHCR sungah bag pawl an tah. Kilogram hlei le hlei lo an tah theh in bag thawn a sung lut vivo dingah sangka kiltu in in hruai. Ka bag kha a rit deuh ruangah ka hnuak lohli thei loih in bawm bet. Zin kapah in ret ter ih a sungah to ding in sangka kiltu pa in in sim. In sim vek in ka va to ih a rei hlanah ka hmin in ra hlam. UN card kha ka rak ap hrih lo si in. Bag cuai an tah nakah ap cih ding a rak si. Kan fehpi ding pakhat a ra thleng thei lo ih kan feh san. Officer pawl in, "Poi an ti hmel lo nawn". Cutin mai bag ciar cu thei le thei lo in kan hnuk vualvo ih bus sungah kan san.  Nunau le nauhak pawl cu bus sungah an lut ih mipa hmuahhmuah cu bag kan san. Tong lettu fala mawite in kan buai phang in thaten thu in sim ta. Bus sungah to kan rem theh veten KLIA lam pan cun bus cu a pok luailo.

KLIA kan thleng veten kan bag pawl kan thiar cupco ih lengte parah kan ret. Lengte thawn inn parah kan nor kai. Lift thawn a si ih a hahdam nasa. IOM lam ihsin in tluntu le zin khih hmuhtu an um vivo ih hawi aat a dem zet. Kan bag pawl cuai an thlaih, vanzam ticket pawl in pek rero thlang. Ka hmin a thleng in ka feh ve ih A Ram timi lawng a si tikah an buai thok. Cu ruangah hmin dang kan bun duh a si khalle hmin ngai deuh le sau deuh kha hril thiam a tha zet tiah ka ruat suak rumro. DHS tumah hmin bet na duh maw in ti kha ka rak bet lo ka sir aw tuk. Asinan tluangten kan theh thei sal ih ka thinlungten Pathian hnenah lungawi thu ka sim rero. IOM palistic bag khal in pek. Hi bag sungah kan ca thupi pawl a um thluh.

Zan 9:00 pm a si in KLIA ihsin kan pok ih Lufthansa timi vanzam tumpi cu kan to. July ni 11 ni zanlam ih fehsuak hi mipum 34 kan si. Naute pahnih le nauhak 6 an tel. Immgration khalah zo hman in a hleice in check khal a um lo. Kan vanzam ticket lawng thaten in zoh sak. Vanzam kan lut tiang cuh aw le pah aw cupco in kan um loih Chin mi kan fel bik tum a si ding tiah ka thinlungten ka ruat. Tuluk, mi rang le mi dum zate rawi in vanzam sungah kan lut. Van zam sung ka lut cu ka um dah zo mi inn hmuahhmuah hnak in a tha deuh in ka thei. Tonak khal mak ta ra in a tha. Hla ngainak a um ih TV zoh ding khal a um. Dai lengnak le makta ra, a dung ih thil pakhatte tham le veten a hlo vukvi. Asinan buai thlak pakhat cu dai hman a ngah lo ih cahnah hman a si ih hmang thiam lo hrangah a buai thlak zet. Nauhak pakhat tla cu cahnah hman duh loah a tap ciamco.

Nazi pakhat le khuai sung kan zam ih Thailand international airport ah kan cawl. KLIA kan um laiah tum tul lo in tinan midum pawl kha zum an kai deuh ih kan zaten in suah ter ih vei khat in check thluh sal. Ti hnuaihno in ka thlun aw lala. Cu theh in vazam sungah kan lut sal ih transit nak ding Germany ram Franfrut ah an nazi zing 7:00 cekci(malaysia tlawng kai ni hnih sun 1:00 hrawng) ah kan thleng. Cumi ah nazi pathum sung in hngah ter ih nazi 10:00 ah USA lam pan in kan pok sal. Hngah sung a rei lonan thinlung a man hlap deuh maw cu thei hlah ka ning zik man. Mi dang bang in nazi tampi hngak ding ka thinlung ka tuah rero nan hngaktu si hi thil har zet cu a rak si.

Germany ram ih kan hngah laiah hmuk pawl kan ei khawm vialvo. KL ihsin hmuk kan rak keng ngah kha vantha ka ti aw nasa. Khual tlawngah cun hmuak tivek te hi ken ringring a tha. Dai ken a ngah lo ruangah a hrek khat pawl cu dai an lei ih bur fate ah dollar 3 lai an cem. An lung a awi tuk lemlo a bang. A hrek khat pawl in hmuan te neuh Raja kha an rak fun hlenhli ih hmuk ei theh ah an hlawm aw dialdo. An lung a rual tak!!

Cutin USA lampan cu vanzam kan to sal. KLIA ihsin kan pok hnak in minung kan tam deuh. Mi rang tong khal theih ding a tam vivo. Hmun khawmte ah tonak kan co ih hna a ngam nasa. Tucun tipi thuanthum thlun zam ding kan si ih taw a sa duh zet. Rawl in pek mi le Europe rawl a si ih a ei thei lo kan um hnuaihni. Aa Lu suan,arti keu, le hmuk pakhat a siih a dang cu ka theih lo mi, cun mai duh mi a ti....thawn a si. Nazi 8 sung vanzam parah kan to ih USA, Chicago cu zanlam 4:00 hrawngah kan thleng thei.  Tu cun USA ram ka pal ngah ve thlang. Leitlun nun hi a mak tiah ka thinlungten khua ka ruat. Leitlun ih pabik an rak ti rero theu mi USA leilung parah ka rak ding ve thei hi mak ka ti lo thei lo. Asinan tumtahnak ka nei lo cun ziang vek rampi cang ka thlen ih ka um khal le thathnemnak a um lo timi ruahnak cu a ra suak vukvi. Thu ka ruah rero laiah "Next" timi aw ka thei ih ka zoh cu ka hmaiah zo hman an tangnawn lo. Ka feh ih kut zung ka nam, hmin pawl in khum theh in ka mit an zuk(ka thei fiang lo, in zoh ter ih cu theh in OK an ti,). Cui sin IOM hna tuan pawl in in hruai ih hmun khawmah in to ter. Hmin an ko in kan hmin kan sign. Cu theh in kan bag pawl in lak fial ih kan va lak sal. Cui sin hmun dang in kan umnak ding hmun ram ciar pan in kan feh ih kan then aw darh thluh. A sangsang in an kut ka kai ih "Fanger puai" ih tong aw sal ding in kan thlah liam awta. 

Airport lut zik tinten kan ti kel te taikhap kan hlit, but kan hlit, bag pawl kan ret ih scan nak sungah kan thun. Cu theh in ka umnak ding ram vanzam hngak in nazi pa hnih sung kan hngak lala. IOM hnatuan pawl an um vivo ih buainak ding khal a um lo. Thinhar ding khal a um lo. Mirang tong thiam lo khal le umnak ding inn tiang cu hna ngam ten kan thleng thei cio. Tumtahnak thar, sun mang thar thawn USA ramah khua kan sa vivo ding a si hi tiah keimah ten thazang ka pek aw ih hnangamten ka umnak ding inn lampan cun KA TLUNG.

hminsin : IOM hnatuan pawl an fel tuk ih vanzam par lawngah in umpi thei lo. A dang hmuahhmuah cu an mah thawn kan um tlang vivo ih kan duh mi le hai mi khal mi an tawlrel sak thluh theu. Hmai sawng in bia ngam lo tla kan um pang ding ka phang zet