Mino titi

                    Sak lam tlang ih ninu a liam miarmo cun khuapi hmuah hmuah ih theih mi Nu Len khal zinpi kap bazar kiang ih a kuam dawr te thianfai in sangka pawl a ong thluh zo. A rawl ei, reilo te sung ah mi tam pi in an hngak tiam tiam. Nu Len ih kuam fun tak ei cun hna tuan bang hmuah a reh thluh tih tiang khuate ih hming thang ve asi. Amah hi kum 40 hrawng ih upa nu pinu asinan tongkam thiam le a fel tuk ruang ah mi tin kip ih ngainat mi asi. A dawr hmai ih ra, zo tih um loin," Khui lam ah, na ra cawl ta ding lo maw? Asilole "Nan dam tha maw?", tih tal in a rak bia man ring ring. Suakthuan ihsin upa putar tiang ih ngainat mi ah a cang. Zuri sabah tangka pai lo na cing an rat asi khal le thinsau ten fun sak in a tin ter sal theu. Fala le tlangval pawl in le an duh mi hnen ih ca pek le thu cah duh mi an neih tla le Nu Len hnen ah ret in hnangam ten an pe, an cah mei theu. Cu mipa in cu minu a ngai, cu mi fala cu, cu tin a um...... cu pa in cu nu a leng,cu mi tei in mi tei inn ah mi khual thleng an um, cu tei sung in arsa an hmeh ding, cu mi in angki thar te a nei tih ihsin zo tei arpi a pul tih tiang in Nu Len ih dawr ah a thleng ring ring. Thu thang theih na duh le Nu Len ih dawr ah va sut aw, tih tiang in anti theu.

                       Zan khat cu ruah a sur phurh pho. Mi veivak khal an dem. Zan dang a bang lo. Ruah sur cing ih fala len cu a rawp hna ( hna bu) an tih ruang ah zo hman an leng suak ngam lo si ding. Mi bang tuk lemlo hna set U Lian cu thawng khum ferfer in a vak lualo. Salai le a rualpi pawl khal ruah lak ah tlan in Nu Len dawr tiang an leu vutvo. Nu Len ih dawr hmai an thlen le ve ten kuam an cah ih hulhliap ih to kham an cuh lohli.

              "Ka lo zum cia tho, fala leng ding thei lo pawl an ra ko ding ka ti rero lai ah nan ra suah lulhli, Leng ding tla nan thei lo maw si" tiin hni suamso in a capoh.

              "Si, kan leng loh ruang ih tap rero ding fala an um lo asi hi e.......",ningzak mitmei vek in Al Kheng in a vawn leh.

              Salai le a rual pi pawl hi tlawng hmun khat, tonak tlar khat ih to, tlangval thiam lo, calai lam paih zet an si. Calai ruang ah vei tampi thu kam an el aw. Thinheng le mual pho cun an um dah lo. Hmuh dan, thei dah, duh dan bang aw lo hi lei tlun ah lung khat ten um ding timi cu thil cang thei asilo. Tuizan khal, calai thuhla thawn Nu Len dawr hmai ah Salai le a rual pi pawl thu nuam rel in an kawm aw.

               Salai in hram a thok," Mi zan kha khui tawk tiang saw kan thlen"

               "Kan thlennak maw, Nu Len dawr ," haha.............. ka lo capoh men, mizan maw, evangilist tiang.

                " Aw, si ngai... tuizan khal ka peh sal duh. Evan, Pastor le kohhran Upa pawl hi an hna tuan mi Pathian thuthang par ah cun ziang hman rel siat ding ka thei lo. An tha tuk, an fel, thlarau hlo ziang maw zat an hruai kir. Chin mi hmai ngal ter tu an si rori. Asinan thlarau lam silo calai lam tiang ih kan baat awk vivo cun ka hnawk le ding ah ka ruat."

                "Evan pawl ih tlang lam ah ti leh suk vualvo, sak lam ah ti le so vualvo hi cu kei tla ka ruat buai thei nasa. Kan el ngam hrih lo asi hi ti au" tiin Al Keng in a bet.

                  "Nan vun rel ih kei tla ka mang, vei khat crused nak ah ka feh ih hi tin evan pa in a rel," Pathian thuthangtha kaa ih sim duh tawk lo in cabu tla ka ngan. Tui ni ra suak tu lak ih sin nan lei duh asile lei thei ring ring in a um. Mizo ih ngan tak asi ih nan thei thiam ko ding ah ka ruat. Asinan kan dung ah laipa hnen ah ka va zuar ih in lei sak duh lo riai ati. Cule a peh bet, Lai mi cu kan thin a te nau tuk, lai ca asi loh ruang ih kan siar peih lo cu kan niam tuk lai ati." Hnih suah capoh ah an ruat ih thu zir tu an za ten an hni. Kei cu ka hni thei lo riai. Tu hi mipi lak ah vei ziangzat a relnak si ke ,cu theih hlah maw. Tumkhat cursed nak ih vei khat a rel cun kumkhat ah vei hra nei bang ta sela............... Nan ni tla ruah ve uh la......"Salai ih a tong lak lawh lai ah,

                   "Kan ruat ve ho khaw.......", tiin Tleu Thang in a rak capoh.

                   " Ka tong a cem hrih lo, um hrih duak, ka tong ka peh sal ding. Laica in ngan sela Mizo pa hnen ah va zuar ter hnih, "poi tong ka thiam lo." a rak tive tengteng ding cu ka zum. Cun, thuthangtha an sim ih Bible bung cang an sim tik ah falam Bible ah cun cu tin a ngan ih Mizo Bible ah cun cu tin a um deuh. Curuang ah Mizo Bible kan zoh deuh ding" a ti mi hin thu ngai tu Laimi thinlung ah mizo Bible an siar duhnak a tam pang ding ka phang nasa. Mizo Bible a tha lo ka tihnak a silo, Lai Bible famkim lohnak rem tum lo ih a dang kan rinsan deuh cu poi ka ti nasa.

                  " Asi rori. Kei tla ka lo ruah ve ding, ka theih tawk te in. Tui hlan kum 20 ah cun mifim mi thiam ka nei mal tuk. Evangilist rel loh pastor hman kut zung khiak in siar an theih lai. Calai buaipi vutvo mino khal an umlo. Magazine, thu thang ca rel loh jubilee cabu hman a suah thei ceu fang hrawng silai. A thu thei deuh le fel deuh le kohhran lam ah pum pe aw in tan an rak la. Calai lam le miphun lam ih an thei tawk ten an tuan tik ah kohhran dan le upa pawl ih kham tong tla tampi an um lala. Cutik ah kan calai cu kai hrem tak calai ah a cang in ka thei. Thang so loin a tum deuh deuh, tiah Bil Theu in tui hlan hruai tu pawl thu mal lai a ruah.

                 "Bil theu, asile kan calai hi kohhran in rak kilkhawi lo sela tuvek kan bang kem maw tih tla ruah ding a um ve ho khaw!" tiah Salai in a el.

                  " A cu sawh cu thei hlah maw......? A tu lai mino pawl kan phur le ai thawh vek in upa pawl tha zang tla in pe sela that hnemnak a um ding ah ka ruah". Al Kheng in ati zawng ah

                  "Si, biazai, nun thu leng siseh a dang calai hmuah hmuah par ah upa pawl ih fakselnak a tul rori si," tiih a rel lai ah Pa Bik anti tak cu kuam a ra lei. A kam nam deuh ih a ti cunci. Salai le a rual pi pawl cu fiang ten a zoh ih "AW", tiin a tlan sal.

                   "Fakselnak na ti cu ka thei thiam ciah lo e,ziang tinak saw? ang hia hia in Bil Theu in asut.

                   "Papu....Tu tiang na thei lo maw?  A thatnak ah a that vek ih lawm ding. a that lonak ah a that lo vek in tar lang ding", tinak e.... tiah Salai in Bil theu ih liang kuah phah in a sim. "Inn tek nu, kuam kan ei lala kei cu...... he..he...." hni suamso Salai cu met phah in,

                   "Ziang tin e,i ko sal hnik" Capoh thu ngai in Salai cu a met sal.

                   " Hi mi dawr nei tu ka lo tinak e....", ningzak hmaisen deuh rumri in dim ten a sawn..

                    "Ha...ha..." an za ten an hni suak an sup aw thei lo ih an hni bung thluh....

                   "Mi tu ih kan thupi ah lut sal in, "LOVE SONG" kan ti mi duhdawtnak hla tla hi hla tha lo "setan hla" vek in in ruahsak nawn lo sela, ngai ngai thu ah tu ih kan theih kan sak rero mi love song hi tui hlan kum 20 ah rak cul nek nek zo ning, tu nak in kan calai hi a to hnget zo ding ah nan ruat ve lo maw? Tlangval pakhat in a duh mi fala a ngai nak hla, a au pi hi sual kan ti ding maw, duhdawtnak hla "love song"timi rori sual hla tiih kan thinlung ih hram in rak kho ter mi hi upa pawl, a hlei ce in nupa pawl an mawh deuh in ka hmu. Hi hla pawl a that lo an tih cun nupi pasal teh neih ngam ding asi nawn kem maw..... ha....ha....ha.."an zaten an hni hrut hri.

                    Pa Bawk in" Pakhat ka lo ruah ve ding, Pastor pakhat le mino upa thu kam an el aw ka thei dah. Ka ngai thup cu asilo, an thu rel tak in ka hna sung loh theih loh in a ra tawt ih a ra cawl dam.

                   "Nang theu le, ziang khal sisela rel ko aw, a thiang..." Al Kheng in taw a tawk.

                    "Aw, mino ton awk khawmnak kan nei, kan tiak in Pastor pa in mino Upa hnen ah,"ka cabu suah tum tak tla i suah kelh kei aw, nan ni ziang thiam lo ih ca ka suah ding nan titla hi ka hnih a suak men. Ka mirang hngilh zat teh na thei ding maw si? tiin  a deu sawi. "Mino upa in le ziang ah a siar lo nasa, " Na mirang tong hngilh zat cu ka thiam lo, asinan ka ca sauh ding tak hi mirang asi lo, laica (CALAI) si ka suah tum," tiah a let ve. Tu tiang cu tei pahnih cu an rem awlo tata. Mino upa hi Pupa hla (fox song) thiam ngai ngai asi, Mirang tong thiam zet si, lai tong hak cupco pa hnak in ka uar deuh," tiah Pa Bawk in a ruahnak a rel ve.

                   " Pupa hla na rel ih, ka lo peh bet ding. Kan dung ah Pu Sui Ling ih Pipu Zai Hla Mawi a ngan mi ka siar ngah. A man hla nguarngo pam. A hi maw,zu in hla an rak tih. Pam hmai in ka ti rero. Tong thar le tong mawi hlir in a khat. Pakhat khal hrelh lo ih thiam ka cak nasa. Pupa hla kan pho suah thei cun kan tong a kim sinsin ding. Pakhat tla cu ka uar tuk ih a  thluk tiang in  ka zir cih. Ka sak ding, rak ngai au....

             Pa... Ka zuun aw, va zam aw law, thlizil hrang hnen ah

                     Lengnu ih *kheirem cung ah, va bang ai law

             Nu... Nang zuun ka #siang cung ah khuaihli bang to za seh

                     Hnai siang lolen ni sawm thum fang ul lai ing maw ........ tiih bawivung thawn mawi zet ih a vawn sak cu, thengre thawi tlak tak vek, dawr ih um hmuah hmuah cu mit hman thep thiam lo in Salai ih hlasak cu an ngai. A sak theh in za an beng vualvo. A za beng a thawm tuk ih khat lam inn ih pitar nu a thin heng, a phun phurpho. Ziang a rel cu zo si thei maw.

                     "Salai nang cing cing, Kei nu pinu hman in ka thei dah lo. Nan ni suak thuan ih hi vek nan buai pi hi kan Chin mi phun a lungawi lai ding. tu lawng ah ka fiang. Tiin Nu Len cu a cawl dukdi.

                      "Ziang mi maw," an zaten an tong rual ih....

                      "ha....ha........ha....." an hni thluh sal.

                      "Aw, ziang ah fala nan leng lo ti hi tu lawng ah ka fiang", Nu Len in kuam fun rero phah in a capoh bet.

                      " Ei, mi zan hnak in kan tong thaw si ding, zanmei (electric) hman ralrinnak(warning) a pek zo ual.

                      " Si ngai, caan a cem awl nasa, kha, kuam kha fun theh zo maw? Pa Bawk  ding phah in Nu Len cu a sut.

                       "Theh ciah, kha..... Kei tla dawr ka khar ta ding, sangka in kar bawm uh" tiah a dil hai.

                      " Ngah tuk lam, fanu na neih bet bet cun a ngah sin sin, haa.......ha.... " Al Kheng theu le a rawlh aw man ring ring.

                      Mang tha maw," Aw, nan ni tla mang tha au la," Sangka an khar theh cun Nu Len khal thawng tha tuk nawn lo cu a khum ih an inn lam pan in a so. Salai le a rual pi pawl khal mai inn lam ciar pan in "Mang tha aw, aw le.... Mang tha aw, aw le..... Mang tha aw,  awle"........

*tai le taw bawr

#taksa

Salai Mitthli