Zarhpi Ni Dairy
Hmun dang ram dang ih um kan siih rualpi ngai awk cu a na ruangro ko. Thlakhat veikhat tong awk ding khal hi tumtahnak neih tengteng lo ahcun ton awk ding tla a awl lo. Lai lam vek ih zan riah ei theh veten leng awk dualdo cu a awl lo nasa. Vah sukso le tangka a tul. Kuhva man pai ih leng suah mei cu maul phonakah a suak tum men. Ning lam lam a zak. Cu lai lak ah, tlungnak ding ka nei nawn lo ih fanghra hrawng in i rak cawih duak aw tiih ri bualbi tlangval le siar cawk lo in kan thang deuh deuh. Hnatuan ngai ngai nei lo ih vak tawi le siar cawk ding kan si nawn lo. Tuihnu lawng te sungkhat unau kan tam deuh deuh ih khat lam ahcun hna a ngam thup men.
Biak inn kiangkap ih mi rak bawh, hmel thei le hnatuan tluang deuh raulpi ton veten an hnen ih ta censak ding hrawng ruat ih khuasa laimi tlangval kan tam deuh lai. Ca ngan tu ih thok in kan zaten hna tuan tluang loh lai timi caan te cu kan nei cio. Asinan Malaysia din hmun ah cun hna tuan nei lo ih thla hnih thum kan um cun kan zet ruang asi bik in ka hmu. Ziang ah tile hna tuannak ding hi malaysia ah a har lo. Thla hlawh lawngte kan co dan a bang aw lo men ding. Kha, nang tla na thei zoh kha. Ziang thluk in a har ti le ziang vek in na zuam timi khal kan thei aw thluh. Curuangah hna neih lo le hna tuan zet lam cu kan thup hrih ke! Cu lo le kan phuang aw mualpho thluh pang ding. Khui lam law roh ngai bang ih tiaw........Kan farah ruang ah kan law ti kha hngilh hlah aw la.......
Thla thar zarhpi ni hmaisa bik cu thlahlawh mal te hum hler hler in kl LCF biak inn lam cu bus sung ah it that phah in ka pan ngual ngo. It that ka ti ih sing tisehla a dik deuh ding. Bus a cawlh zawng le ka thang phah phah. Ka thang ve ten ka zal sung ah tangka mal te kha a um lai maw tiah ka zal puan te cu ka pur leuh leuh. Van that ah kl tiang cu ka hum feufeu thei.
Zarhpi ni le tha cawlh caan(holiday) thawn a pe aw ih, ram dang mi cu kotaraya hrawng ah a phul in kan phul nauh nauh. Beer thleh zawng ih phul hnak in kan phul deuh ding ah ka ruat. Kha... beer ti tel ruang ah na cil rak vawlh hlah maw. Pitar putar nauhak ti um lo. A hrek khat in bawngbi rek teng teng,ziang tin an ke ah a tleng thei tih ruah ding ko ih rek in an hruh. A hrek khat pawl le vui (sai) hruh ding ih an thit mi hmang tih ding khawp ih hlai dem dem bawngbi cu ti hluih hlo in an hruh. Fala herk khat le bawngbi tai hri lawng nei an hruh hmang tih ding khawp ih tawi hruh in an tak sa mawinak an lang ter. Ram thangso ih um tiah kut lawng thiam loih phone bia tawk le bo lo. Kotaraya hrawng cu ram dang mi siar cawk loin kan khat. Kawl rammi pawl le kam sen tleng tleng in kuam (kuhva) kan ei. Hmun kip ram kip ah a ti sen kan phut. Duh awknak ah kan hmang lai lai. Zu kan ri le kan luar bet lai.
LCF biak inn lam cu ripid kl bus ka to. Ka to ka ti ih ka ding sawn. Bus sung ih tv cu mit thep lo in ka zoh. A sangka le a phar thla langcu ka zut ih", Lai tlang lam ah teh hi vek bus hi so luailo ve sela a thlun khuh ( a par) ah teh kan to tho tho pei maw", ti ka ruat. Lai mi cu kan ral tha tuk ih kan to tho tho ding. Passport tuah loin Malaysia hman kan rat ngam si. Van that ah Pudu bazar bus cawlh hmun cu kan thleng lohli. Tum man lo ka phang ih a phar in ka phar. Pitar pakhat ka phah ngah pang. "I ngai thiam aw" ka ti nan tuluk tong in ring nawn a au ta. "Sorry" tih ka sal thiam si lo. Zin khat lam ka kan. Motor cycle in i pah zik te, taw lu thei lo in ka lan man fang fang.
Biak inn hmai cu ka thleng ve riai. Tonak ka co nawn lo ding tiih ka ruah cu lam lam, zo hman an rak thleng mumal hrih lo. Kawl ram nun kan thin hrih lo si ke tiah ka ruat. Rualpi le hmel thei ka tawn ve pang ah ka tiih khua ka tang rero nan fala note pakhat lawng ka hmu. Mit thep thiam lo ih ka zoh rero lai ah a U maw, a tlangval saw ka thei lo, a kut no netni te kai in thawhlam ei ding in in pial san. Tlawng kai lai ih buh thing le hmakphekphawm thak nawn kan hawi lai kha ka mang ruangro. A ngai cu ka ngai tuk lo. "Kur....kuur... kuuur...." tiin ka pum a awn ve ih vainim suan zuarnak dawr lam ah ka pial ve, lai pa cang tete....
Khawm hram kan thok. Mipi kan tam dan cu ka mang hmuah a bang zik lam lam.Tui hlan kum hnih hrawng ih minung le tu ih mi pum ka ruat ih lai tlang ah teh kan tang lai kem maw tih tla ka ruat.Kan tang lai asi pei cu nitin mi thar kan thleng cupco si. Mi thu zir zawng ar thaw tawk tih bang in. Lai tlang lam ih hmuh ding um lo aircon thlidai lak ah to ngeu ngi khal a naum ve men. Zan lam 1:30 tiang caan kan nei nan a kim hlan ih taw kham man ring ring khal hi kan zet ruang asi pei maw tiah ka ruat. Khawm kan tam ruah in thang thatnak hla sak le thlacam thawm a thang lo tuk ih ka mang a bang. Rela le palik kan tih ruang teh asi pei maw?
Bawipa zan riah einak le in nak kan nei. Khawm kan tiak veten Biak inn hmai ih tangta lo ding tih an than mi ka mang puppi ih zin khat lam food court lam ah ka feh loh li. Biak inn kai tem, phar le a kiang kap ah kuva tii le hmawn pawl phut in tan lo ding tiih zangfah dilnak cu zo hman in kan pom sak duh lo si ding. Hmuh ding a um lai tho tho. "Lai mi cu a kawk in kawk aw sehla ka tha hnem sawn", tiih ka rual pa ih a tong mi kha ka mang dukdi.
Chin food special dawr ah lai rawl thaw te ei ding in ka to. Rei nawn ka hngak nan ka co thei lo. Mi bang in ka cal a kau lo ih rilrawng tuar dan ka thiam deuh lai. A hrek cu rawl puar kiar kiar in kuak fawp le raja hmuam tu an um hnuai hni zo. Ka mang bang deuh ih dawr nei tu ka va tong. " Nang mah ten rak lak aw men aw", hni siamso ten i fial. " Mahten lak aw paih sehla inn ah ka tlung tur to kei, rawl ka ei ding si", tiin ka thinlung ten ka phun lawk. Asinan thu awih tuk in rawl cu ka la. Ruai theh bang ih au cel cel rawl ei tu pawl ka zoh ih kan hmuan thlang tei lamkhuang kung ih suntam riak zik, ai culci kan bang.
Ka hmai cabuai ih to fala note cu rawl ei thiam loin ka zoh. A angki eng le bawng bi sau hruh mi cun a mawinak a lang ter sinsin in ka thei. A hai hman mi khi ka hmur sisehla tiah saduh ka that ih kei mah ten lawm tu nei loin ka hni hrut hri. A hmai ih to tih fam cu veikhat te mit a tong aw. Lirhnin ih lei lungpi tlir bang in ka thinlung cu a cang dukdi. Ka hmai hmuah asen theh. A kun zawng ih a tla mi sam cu a phial zawng ah i zoh sal. "Dup.....dup....dup....duuup..." Ka thin khir in ka awm ruh tiang a sawh pawp tum. Ka thin khir a ring tuk ih vate riak zik awn ai hnak in a thang sawn in ka thei. Zirh awk tul loih kan thiam theu mi duhdawtnak cu himi si pai maw tiah rualpi suh ka tum nan ka kiang ah zo hman an to loih ka sutsal lo. Vei thuamnak kan mit a tong aw sal. Ka zum ban lo thil a thleng. Zoh hnih uh....... I hnih san khi, a biangsum lang ko, a mawi tuk...rawl ei a tul nawn lo. Ka puar cih ual. Duh a nung tuk, biazai hman in a mawinak a tar lang thei lo ding tih tiang in ka ruat. A rei lo, ka lungawinak le hlimnak cu a hlo sal.
"Kan tin ding ei zang aw," thu peknak tong kam cu ka hna sung ah "virh" tiin a ra lut. A rawl ei lai cu a kam ih thu pe tu dung cu el ngam loin a tlun. A kam zawng ah veikhat te i zoh sal. Run tu nei lo tuu fa vek in i zoh. A mit hmai thim rumri cun ka thinlung ah ro ca bang in a tang ta.
Ziang mi thu i cah ta lo nan theih thiam thup mi te ka nei. Sal bang a tang mi a thinlung te cu ruunsuak ding in kei mah ten thu ka bawt cat. Ziang tin ka tawl rel ding timi cu ka thei lo. A liam hloh hlan tiang ka cuannak ah ka hngawng hmuah a sau thluh in ka thei. Ka rawl ei lai tak ka bang ih kuak fawn ding in ka zal sung ta kuak cu ka phawrh. Mei tek(mei talh) ka neih lo ruang ah ka kiang cabuai ih to pacang hnen ah ka va cawng. " Mi tu fala cu na vah zoh nasa lawm mam ha, na mit hmuah a pawt thluh tum si," tiah i rak capoh. Khuilam ih ning zak nei bang in ka ning a zak. Um ngaihnak ka thei lo ih ka lu thak tuk lemlo cu ka khawih hruthro.
Tuah ding ciamco ka nei loih food court ih sin ka suak. Tuiziang ih ka ratnak lamzin zawh in ka kir sal. Lam zin ah police mawtaw rang ka hmu ih ka ding duk di. Ka fala hmel mawi khal ka hngilh thluh lawk. Van that ah ziang thu suhnak hman tong loin ka lan thei. Kotaraya lam feh ripid bus cu ka bawh sal. Rei nawn ka bawh hnu ah a ra suak lualo. Fangkhat ka pek ih tonak ka cuh lohli. Putar pakhat a ra kai ve ih tonak ka kian sal. Kei cu ka ding lala. Bus par ih to ve lo ding in ka suak hrim hrim maw si tiah ka raut buai nawn. Kotaraya ah cun mi nung an mal deuh tlang. Kotaraya hmai ih putar pai dawr ah dai ka lei. Dai riahri dai thiang ka vawn in cu lai tlang dai thiang ka ngai ruang ro, a thup ten.
Metro bus ka to sal. Tu cu inn tiang tlung ding asi ih tonak tha ka cuh lohli. Rei kan feh hnu cun ka mawlh cuahco ih ka it that. " Ka U, khui ah na feh ding, nang mah lawng maw? tiah fala aw nem te ka thei. A hmel ka zoh ih a fiang tuk lo. Ni in i et ih ka hmu fiang thei lo. " Aw,... Kei mah lawng," tiin hak cupco in ka sawn. Cule tonak ka thawn ih ka kiang ah a ra to. " Ka van tha tuk, tonak ka co ih, na kiang ngel cel sap bei," ti phah in a sam hmai cu a phial. Salai tha ten ruat hnik, na ton zo tak fala ho khaw, ziang ah na hmin sin lo, tha ten ruat aw," tiah ka thinlung ten nun kan sim aw rero. Aw... ka thei, ka mang sal. Police mawtaw ka hmuh ruang ih ka hngilh duak mi fala kha asi. A si rori, a mah rori si. A biangsum lang ko in i hni san lala.
Dangnal zutzo kha, tu ah cun aw a hak hrut hro. Ka aw ka thiangfai," Hem...hemm......" TB nat nei bang in ka hrawk bawr ah khak um vek in ka thei aw. " Khui... khui ah na feh ding.. Khui nah..... nan um? Sungkua in maw,..... maw.... pasal... e..eh.. pasal thawn nan um saw?" tiah hmai sawng vek si, ningzak vek si in ka sut. Nel um tak ih hni phah in," Ziang tin ka lo sim ding tla ka thei lo, tuih ka umnak cu a har tuk, thawngtla vek rori in ka tuar. Ka thu thu in ziang hman ka tuah ngam dah lo. Har ka ti tuk ih tu hi ka tlan mi si. ka rual pi hnen ah ka um tum," tiih i sim theh veten ka thin hnaka cu ...dup... duup..... duuup tiin a khir. Ka zangfah lainatnak cu sim sal tul loin ka mit in a lang pem pem zo. Ka lo bawm ding tisehla teh a duh pei maw. Asilole, ziang tin ka bawm ding. Bawm le ka duh, bawm dan ding le ka thei lo. Ka thinlung cu ralpi pahnihnak lai ih boom buak durdo vek in a sa hiam hiam zo. Ka tawng nawn lo ding tih tla ka thinlung thup ten ka phang.
"Ka hnen ah thinhna ngamten ra um aw, na hrang ziang hmuah hmuah ka huam aw. Tuini lawng ah kan tawng aw nan ziang hman hmai sawng awk ding a um lo," tiih ka thinlung ih um mi thu tak ka sim tih a thei ve ten ka tang ah a zau. I neih deuh deuh. Asinan ka hna in kala rim lawng ka thei. Ka kiang ih to lasi fala vek ih mawi lai fala rim cu asi thei lo tih cu ka thei fawn. A cui kala rim in i ur tuk ih ka mit ka meng cu ka kiang ah kala putar hi a rak sing . A lu cu ka lam ah a ra kun nguaingo theu hi a rak asi. "Aw ka mang si maw,mang lawng silo in a tak khal ih um ka va duh ha," tiah ka tiih ha lang lo in ka hni.
Kan umnak veng kan thleng ih bus par in ka tum............
By SALAI MITTHLI
No comments:
Post a Comment
Na ruahnak in hlawm ve aw