Zarhpi ni dairy II

     

Ka umnak veng(Puchong) ihsin U 60 ra ding cu thingkung thuai ihsin rem le rem loin ka rak bawh tengteng. Bus a rat veten tonak co lo phangah ka tlan turto ih bus pass cu ‘ku…lung’ tiin awn ko ka nam ih dunglam tonakah ka feh turto. Pitar putar le naukai nei pawl an um le um lo khal ka zoh man nawn lo!

Cutin nazi 1 zikte bus ka to hnuah Pasar Seni cu sing phah phah in ka thleng ve. Mi dang pawl an tum theh hnuah bus mawngtu in ‘Hey… pergi mana!’ a ti ih ka thang dukdi…

Bus dang U 40 cu to in Biak inn(LCF) lam cu ka pan sal. Bus sungah cun mi an rak to thepthep zo ruangah sangka kiangah ban pawk in ka ding feufeu. Mizan lam ka ih khawp tuk loah ka lu a na deuh hmiarhmi ih rei khal ka ding thei lo. Ka tluh zik cuapco. Vei khat cu bus a ding zawngah ka bah zik ih fala ngo hiarhi kawng ka pah ngah. Tong ding thei loah ‘Sorry’ cu ka hei ti ih a mit mawiten veikhat ih met ta. A hmel ka zoh cu “Aih.. cui ka thin, tuluk fala maw, lai fala timi ka ruat buai nawn!!

Ka thinlungten Pudu bus stop kan tum zawng ih a tum ve pang a siah cun kan lai mi a si tengteng ding tiah ruahnak ka nei. Thawng inn kiang traffic point ah rei tuk kan ding ih ka ke hmuah a hit thlut tum. A cang thei lo ka ti ih tonak ka bih rero. Nan ka hmu lo ih ka dingnak kelah lunghmui zet in ka ding sal.

Cui hnu rei kan feh hlanah Pudu bazaar bus stop cu kan tleng ve riai. Fala nute cu ka mit mei deuh ih ka tum hnu rei loah an ra tum ve. Asinan a kiang ih hnam dang tlangval thawn an si tikah ka thinlung mi a kam zet. An tong mi theih ka duh ruangah an mah hngak phah si in nuam naiten ka feh. Tlangleng zin thuai ka thleng zawngah in dawi man ih na tong mi cu ka thei ngah.

Kawl tong in “ Nga tawh maleih cinbu. Kei cu ka lo tlun paih lo” tiah a mipa tu cun a tong phut phi. A fala tu in “ In tlun ko aw, rei kan um ding lo pi, “kha nahli” tiah kawltong in a sawn sal. Cui sin cu “hmm” ka ti ih ka feh hloh hloh. Kan Chin fala cu kawl thluak in a neh lala a si ih tiah ka thinlungten ka ruat ih ka feh hmumhmo. Biak inn ka thlen hlan teah The Chin Times an zuar mi cu thuthang thar hlam le theih tha a um pangah tiah ka leisak ta. The Chin Times zuartu pawl khal kohhran upa pawl in Biak inn hmaiah ca zuar lo ding an ti ih Biak inn sirah a zuar. Biak inn sir khalah zuar lo ding tisehla teh khui nah a zuar ding ka ruat buai nawn!

Cui thuthangca cu ka fala zoh thup mi nute in a lei lai cu dunglet ka hawi phah in ka hei hmu. Chin ca a siar thiam ih ziate um deuh lai tiah kei mahten ka hnem aw lala. A tuan deuh lai ruangah zarh dang ih ka ti khel ten sabuti dawr lamah ka pial ta. Sabuti dawrah lailam ih kawhhawl le tisawp ei dah lo pawl bang in rualpi pawl cu cabuai an kil khat liailiai. An lakah tlem le tlem loin ka hnawh aw ve ih pa tum tuk lo ti fam cu ka rak tlem sapbei. Sabuti ei phah in The Chin Times cu ka siar ih ka rualpi pakhat in a sir te in a rak bih ve. “Na siar duh le va lei ve aw” ka ti ih “Na lei cia ka ring men ding” tiah capoh in a ti. “Asile ka ca lei mi na siar tum si sabuti ka ei man hi na kuan kem”

“Kuan hlah, ziangah ka kuan ding”

“Asile cu nangmah ten va lei ve aw”

“Tangka ka nei lo”

“Tangka ka nei lo ti si, sabuti man na pek mi RM 50 teh ?”

“Kha mi cu…………”

Tong ding a thei nawn lo ih a hni suamsi. Lai mi cu mita rin kan hmang tuk ruangah si ding nu thlawi khal kan duh hluahhlonak san. Chin fala pawl in le mai tuansuah mi rinsan ngam loin hnamdang pawl kan rin san betbet. Hnam dang pawl teh in kumkhua daih in duh ngai maw cu theih hlah. Kawl tlangval hrekkhat tongmi a sile “Chin fala pawl cu veikhat kan ko a sile vei hnih an ra cih tiah” capoh thu ngai in an rel theu ih ka thin cu “Vuk” tiah a sa humho theu. Lei nun a si theu pan he tiah ka hnem aw sal!

Khawm tan a nai vivo ruangah LCF Biak inn sung lut tum in lift ka bawh. Nauhak pawl in lehnak an hmang theu ruangah lift khal a siat phah thlang in ka thei. Biak inn sangka ka luh zawngah rinsan mi upa pawl in bulletin in rak pek mi la phah in tonak in khih hmu mi lamah to ding in hmailam ka pan.

Bulletin cu fiangten ka zoh ih Bawipa zan riah ei ding mi ka hmu ih “Ka van a tha thei fualfo tiah”ka thinlungten ka ruat. Thlakhat vei khat khawmve sunte ah Bawipa zanriah ei ngah le in ngah in ka um theu ih sunglawi ka ti zet. Thlakhat veikhat off thei ciocio ah ka van tha hleice tiah hna ngam zet in ka um huahhi. Culai ah mithar hmuahcan a si ih dunglet ka hawi cu bus sung ih ka hmu mi fala le hnamdang tlangval cu ka dungte ah an to. Asinan a hlu an khawng ih tlangvalpa cun ziang thei loin RM 10 a thlah mi cu ka mit sirten ka hmu. Kei mah riangri ka ningzak sal. Zum lotu hman in RM 10 a pek laiah kei zumtu in tiaw le Pathian nung thei in RM 1 te ka rak thlak nuaino kha ka ning zak lo in ka um lo thei lo. Ka thinlung ten Chin fala nute cu ka fak zet lawk.

Sermon theh veten ka dung ih to tei pahnih cu an hloh lai ka thei lo. Dung let ka hawi cu an rak um nawn lo. Bawipa zanriah rori ei ta lo ih suak Chin fala nute cu ziang mi poi mawh a nei ding timi ka ruat ih Bawipa zan riah khal lunghlimten ka ei thei nawn lo. “Kei in ziangah ka ruat buai, ka unau khal a si lo, ka thei mi khal a si lo” ka ti rero nan dawnkhamnak te cu ka rak nei lai. “A nunau kha hnamdang  si in tlangvaltu kha Chin pa si sehla teh tuvek in ka ruat buai kem aw” timi tla ka ruat lamlam.

Khawm tiak ah sangka kiang ih Falam Times le hruaitu thuthang zuartu le VCD, DVD zuartu pawl cu an cabuai ah ding men le to men lo in ra suak pawl cu an rak kham, an lei aw . Hrekkhat Lift hngak in an ding tiai tiai. Khatlam ih khawm Senthang pawl le an lut lam a si ruangah hnawk celcel in a suak le a lut a si ih thlanhri a pawt zutzo. Kai tem in ka tum ih ka thawsa a dem zawngah The Chin Times pawl ih thuthang zuarnak a thuai bikah nuam naite feh a tul lala. Hmailam pawl in an lei cun dunglam pawl cu ding hrih a tul. Ka thinlungten LCF khal in Biak inn hmun lei ding in tawlrel men a tha ding tiah ka ruat phutphi.

Biak inn hmaiah rualpi ton ding hawl in ka her luailo laiah kohhran upa pakhat in “Kha..kha.. kan feh lohli kei uh, culo le palik pawl in in hahiau tuk ding”, tiah mipi ding khawm cu thu a ra sim. Mipi hrangah cun mitkem um zet nan kan hrangah thotho a si ti thei thiamtu pawl cu food court lamah rualpi le unau pawl hruai in an liam thluh. Kei khal cu rualpi thlun in food court lamah man hlap tuk in ka tlan turto. Lai dawr ih an rawl cu man khung zet nan loh thei lo dinhmun a si ruangah ka ei lala. “Lai suan…. Lai suan…” Pupa pawl ih pa hang an timi a hangbawl thak in khal hi ning cu a theih lo a si ih. Lai rawl ka ei rero laiah khawm lai ih suak tei pahnih cu lai rawl an ei ve hnuphno. Ka thinlungten hi tei cu an thu ngai men a bang tiah ka ruat rero.

Thla thum a rei hnuah…….

Hmel duh um, ngo hiarhi Chin fala nute cu khawm pan in bus sungah ka hmu sal ih ka kinagah a to. Phone a ra ih a biak rero laiah a tap ciamco. Ka thiamtawkten ka lem ve hnuaihno. A thinlung tuar mi pawl in ruah hnuphno. Cumilakah “Hnam dang tlangval rinsan in ka nuam awk rero ih tu cun ka pum sungah naute thlathum a um zo. Kan pa(hnamdang mi, kut sit ngaingai lo) in le ka fa si lo tiah a ti ih tu hi kawlramah in tlunsan tum. Tu cu bawmtu nei loin kei mah te lawng ka tang, UN sungah le ka rak thun ngah laklawh zo fawn. Ziangtin ka tuah ding khal ka thei nawn lo. Cu ruangah LCF ah ka feh phawt ding ih upa pawl hnenah zangfah ka dil ding. Asilole FRO ah zangfah dil in ka feh tul ding. Ka pum sung ih naute le ka thla duh si lo, a ni ni in ka tawl duahdo. Ka thin a bangtuk. Unau pawl in le kan thu na lung lo in ti ih ka thusim pakhat hman an ngai duh lo. Hnamdang tlangval ka rak kawp cu POI ka ti tawk, ka SIR aw tuk” tiah bus sungah a tap ciamco. Bus sung ih to pawl an mi zoh danah “Mai nupi tap rero khal lem duh lo” ti zoh in in zoh ih um ngaihnak ka thei lo tuk ah a liangah ka kuah ih “Tap nawn hlah, a nung kan biakmi Pa Pathian a um si, ziang hmuahhmuah a tuah thei, amah rinsan in um ko”, tiah a mitthli luang hnianghni te cu ka hnul sak. Biak inn tiang ka thlun ih cui hnu cu ziang a cang timi thuhla khal ka thei nawn lo, kei khal in ka zingzawi nawn lo. Malaysia dan vekten kei mai hnate ka tuan niakno men!!!!