UNHCR Office Sungah Nikhat
Ring…..ring…ring…. timi thawm awn cun ka hna a virh. Mit nuai cupco in ka thang ih thawm thangnak lam ah ka kut cu ka hawi. Ziangmi saw awn ka ti rero lai ah mizan lam ih alarm ka ret mi kha ka mang sal. Ka tho vukvi. Khua lam ih kan hmuh dah lo tak le kan tham ban ding ih kan ruah dah lo mi computer panga kiang ah ka it ih zing thawh ka thei lo. Ka hna ngam tuk si ding. Dai bual ding in ka kam ih dai bual aw lai an rak um. Ram thang so ah kan um ih zingzan dai bual kan um ring ring ti kha ka mang sal. Khua lam ah cun um sehla dai bual ding cun zan lam teng teng hngak a tul theu silo sawm. Dai bual inn a lawng in ka lut ih di riam zet in dai ka khawlh aw.
Nazi (dar) ka zoh ih 7:00 a awn zik thlang. Tlai phang ah taw leh lu thei lo in ka phar. Thuam ka tuah aw. Mizan lam ih ka ret mi ca hnah kha ka retnak ka mang lo ih ka hawl buai. Tar hlan ih mol ce in i man khal hi thin a na nguai ngo pam. Ka bawngbi zal ka pur ih ka ca hawl tak cu ka hmu sal. Inn tek tei khal thang ta loin ka suak. Mi bang ih taxi sannak ding nei velo cu mai ke rori rin san in UNHCR office lam cu ka pan fual fo. Zin kap ih zuar mi thawhhlam (nasi lemak) cu ka fun ta.
Office hmai ka thlen hlan, hla ral deuh in ka hei hmu. Mipum zazik hrawng te cu a leng ah an her rero. A hrek khat pawl cu card dong ding ih hngak, ope hrang a pok na, thi zoh ding ih ra suak na, tiin a phun phun. Ngan cawk ding khal asi lo. Pakhat cu ka bet tho tho ding. Ziang mi kan cang, tu tiang ziang thu hman thei lo ti ih ra zing zoi le card ti hlo ruang ih card thar lole ca hlai pi ngah duh ih hngak tla, a phun phun. Ka thawh hlam fun tak cu ka suah sal. Ka ril rawng cu ka hnem aw ta. Pum te puar le hna te ngam anti theu kha. Cu hnu ah sangka kiang ih ding sangka kil tu (security) cu mizangfah za ka sinak ka card cu ka hmuh. A kiang ih ding pa sang lem lo, sam dung lam ar suang vek ih ding tlangval(tong lettu) note in ka card cu a lak. “ Lut aw”, I ti ih a sung ah ka lut hruam hro.
Kilhimnak tuan vo nei tu pawl in tha ten i dap(check) sal ih a sung na lut thei i ti. DHS thu suhnak lam ah ka card ka va ret. Rei ka to man hlan ah ka mi theih mi pakhat ka hnen lam pan in ra mi kha hmu. Kek suamsi, theih thiam ding nawn in ih hnih san. Cu ngai ngai, ka zum vek cekci,” tangka mal ten I cawih duak hnik, tlunnak ding ka nei nawn lo(ka bam) i ti ih, ka kiang ah cun a ra to. Ka neih sun lak ih mi fanghra te ka phawrh ih ka pek.” A nawi na nei lo maw, fangnga lawng si ka hai,” i ti. “ Nei lo, na duh le va ti nawi men aw,” ka ti ih a pok cih. Ziang mi a va lei ding ti cu ruah tam a tul lo nasa. Office kulh sung ah zuk hmuam lak luh sian asi lo nan a bawngbi sau ke bilnak sung ah a thup mi raja cu a phorh ih ih pek. Tangka hlei cu I pek ih a ni khal a hngaknak lam ah a kir sal.
A leng lam lawng ah kan tam hmang ka ti kha, a sung lam ah le a pit in kan pit tho tho. “A cu kel tete e”, ka ti ih zun thawh ding in ka va hngak ve. Zun inn lut ding khal ah din tlar a tul tho tho. Bei a dong duh nawn. Sup thei lo pa hrang ah cun thinhna cu a teu ruang ro ko. Nau te thawn hnawk riai riai ih a pok le hngak le siar cawk ding asi lo. Malaysia ah nau neih a awl cuang hmang ha tih pangnak. Nupi tong lo maw neih duh hrih lo cu theih hlah, mah te hngak khal kan tam nawn. To kham an ret mi cu mal tete ten kan khat cup co. Zing pa hra a kim, koh tih um lo. 11.00 a kim ko hrih cuang lo. Taw cu asat in asa hluah hlo zo. 12:00 kim, rawl ei ding in officer pawl an cawl hrih. Zan lam 1:00 akim cuahco. A hrek khat pawl cu office sung an lut, kut zung an nam, “Nan tlung thei” timi lawng an hngak. Cu lai ah kan ni pawl cu koh tih um lo. Thing bul bang ih to eau eau a tul. A can can le ka sing phah phah. Thawm thang a tam tuk ih mit sen riam riam in ka thang duk di sal theu. Ka kiang ih to, nu pi nu khal a sing cuah co. Ka pang thlang ta ih to nufa tei khal an buai nasa. Nau te in ek a thawh ih, a nau ek hruk ding in a kam. A tonak ah nau te cu a hlum ih a taw cu a hru fai. An pa in dai a va lei ih nau te si, nau te nu si a pek ih an in. Ka hmai ih to tlangval pakhat lawng te a hma tuamnak pawl thawn a buai ve nasa. A kut vawrhlam cu a hngawng ah puan te bat in a awrh. A biang khat lam (ke lam) cu a tuam len len. A taksa cu hma tuamnak in a khat liai liai tih sehla a sual lo. Ziang ruang ah cu vek na a nei tiam tiam tih lawng te zo hman in kan thei lo. A sut tu khal kan um lo. Ziang ah ti le a bawngbi sau ah thirhri pawl thuahthum hrawng in a tem aw(style).A kut zung nam ding hman nam thei lo in an thlung ter sal.
A netnak neknak ah cun office sung lut ding in pa cang pakhat in I ra ko ve. Umm… ziang thei lo in ka thin cu dup….dup..…..duup… tiin a khir dup do. A dung ka thlun ih office sung ah in lut pi. Mirang mit pawl sam sen(buang) lam deuh cun ‘welcome’ tiin ci bei i rak buk. Sawn dan ding ka thei lo in ka hni suam si men. ‘To aw’ ih tinak ah ka to ih thu suhnak hram pi kan thok. Pakhat te ka hngilh ta duak… Na thu rel ding mi hi thu phan asi lo tiah thu kamnak I tuah ter ta. Thu kam awk thluk ih pelh aw ka thei lo ka ti ih ka kam ve mei.
Thu suhnak pawl kan theh in a leng ih sin hngak ding in in sim ih a mah kel ten ka va hngak lala. Sun vu ten to khal hi lei let pa cang vutvo hrang ah cun thil awl ai silo. Kut zung nam ding in in ra ko sal. Ka kut cu sahpian tii thawn fai ten in khawlh ter ta. Thil dang tham hrim hrim aw la maw tiah in sim bet. An thu ka ngai tuk, ka angki hlum hman ka tham ngam lo ih ka kut khawlhnak kiang ah ka tan ta. Lai mi cu kan rin um tuk an ti theu mi kha hi vek ah teh asi pei maw tiah ka ruat. Office sung pakhat ah in hruai lala. A sung ka lut cu, pa tum nawn, sam kawlh leu leu ngo tuk lo, hmur sah hleu hleu in in rak hmuak. Ka thin lung ten mi tu ih thu sut tu nu thawn cun an zoh tha dan a va bang aw lo ha ka ti hrut hro.
Kut zung nam kan theh in a leng ihsin hngak ding in in fial lala. Lei tlun ih thil har bik cu a hngak tu si hi an ti theu mi kha dik ka ti deuh deuh. Mi nung khal kan mal vivo. Tu cun kan mal sinsin. Panga (zanlam) khal a awn cuahco. Officer pawl an thlung cupco. Kan mah mi pa li nga lawng kan tang. Nupa tei le an fapa te. Kei leh tlangval pakhat lawng kan tang. A ra suak le a lut lam cu kan zoh thlun duahdo in”nan tlung thei” timi anka te hngak in kan to cuahco. A cu lai lai ah rin lo pi in ruahpi cu a duh er keng in a sur bet bet. Ka thinlung ten thawng zawn tu le ka nei si lo aw, ziang tin ka tlung ding tih mi cu ka ruat buai nasa. Ciar thlep thlep in ka tlun ding ka ruat ih ka khua a sik cia. Ka angki hlum cu hruh lo in ka pom feu feu ih officer asilo le tong let tu ra suak ding cu hngak hlap zet in kan hngak.
Ka raja neih tak kha ka mang sal ih duh er keng ih ka hlawm hnu ah ka ha le hmur kar lak ah ka ben tek tek. Ril rawng thawn cun mi a neh nasa. Ka lu lam ah a ra kai tum. Ka cil fim te cu phar ah ka va phut. CCTV in in rak zoh ding ka phang ih ka cil fim te cu ka ke in ka va cil sal. Tu cun nau te khal a ngam thei nawn lo, a ai zek zek. Dai a hlam thul, cumi kha mi tiah a tap. Sun vu te ih um hmun kel ih to cu a ning ve ko ding. Upa zo hman in kan phun rero ka ruah cun nau te tla cu rel siang ding khal asi lo. Van ruah pi cu ban lam a tum lo nasa. Thei tawp suah in a sur sin sin hmang ha ti ding khawp in a thawm a na.
Thinsau ten hngak rei man ah,” nan za ten nan tlung thei’ in ra ti cu kan tonak in kan kam lohli. Asinan ziang tin kan tlung ding. Thawng le keng lo, hmuak tu le nei velo. Ziang kha lo le ka ti ih a leng suak ding in ka feh. Feh ngaihnak um lo.. ruahpi cu a thlet in a thet aw bung lai. Beidong nawn in ka to sal. Beidong hnu le PaThian cu a cangvai theu kan tih bang in ka kaing ka zoh cu thawng pakhat a sen tial ka hmu. Pathian rem ruah dan hi theih thiam a va har ve tiih hla phuah tu ih a phuah mi ka thinlung ten ka sak ih ka suak ve. Ka thawng sar mi cu zo ta tih ka thei lo nan thii zoh (check) sal ding ih in koh asi le ka lak(sar)nak ah ka retsal ding. Cu mi tik le a nei tu in a ra la sal ko ding ti ka ruat ih ruah suar lak ah cun nuam nai ten ka kal cupco. UNHCR office cu a rei hlan ah ka liam hloh san miar mo ta.
No comments:
Post a Comment
Na ruahnak in hlawm ve aw